2026 ވަނަ އަހަރުގެ ސްޓޫޑަންޓް ލޯނު ސްކީމަށް ސަރުކާރުން ބޮޑު ބަދަލެއް ގެނެސްފިއެވެ. ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވީ، މިއަހަރުން ފެށިގެން ލޯނަށް އެދި ހުށަހެޅުމަށް ވަކި ސުންގަޑިއެއް ނޯންނާނެ ކަމަށާއި، މުޅި އަހަރުގެ ތެރޭގައި ކޮންމެ ވަގުތަކުވެސް ދަރިވަރުންނަށް ލޯނަށް އެދި ހުށަހެޅޭނެ ކަމަށެވެ. މި ބަދަލު ގެނައުމަށްޓަކައި ޕޯޓަލް ތައްޔާރުކުރުމާއި އުސޫލުތައް އެކުލަވާލުމުގެ މަސައްކަތް މިހާރު ދަނީ ކުރަމުންނެވެ.
މިނިސްޓަރު ވިދާޅުވި ގޮތުގައި މީގެ ކުރިން ލޯނަށް އެދެން ވަކި މުއްދަތެއް ކަނޑައެޅިފައި އޮތުމުން، ބައެއް ދަރިވަރުންނަށް އެ މުއްދަތުގައި ލިޔުންތައް ހަމަކޮށް ލޯނަށް އެދުމަށް ބޮޑެތި ދަތިތަކަކާ ކުރިމަތިވެ، ފުރުސަތު ގެއްލޭގޮތް ދިމާވެއެވެ. ނަމަވެސް އަލަށް ގެނެވޭ ބަދަލާއެކު ދަރިވަރުންނަށް ވަރަށް ބޮޑު ފަސޭހައެއް ލިބިގެންދާނެއެވެ. “ދަރިވަރުންނަށް ދެމުންގެންދާ ހިދުމަތްތަށް އިތުރަށް ފުރިހަމަ ކުރުމަށްޓަކައި މި އަހަރުގެ ލޯނު ސްކީމަށް މުހިންމު ބަދަލުތަކެއްގެންނަން ސަރުކާރުން ވަނީ ނިންމާފަ. މި ފަހަރު އަލަށް ލޯނަށް ހުޅުވާލާ އިރު އެޕްލިކޭޝްން ޑެޑްލައިންއެއް ނުބާއްވާ ލޯނަށް އެދުމުގެ ފުރުސަތު މުޅި އަހަރަށް ހުޅުވާލެވިފައިވާނެ،” ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވިއެވެ.
މި އަހަރު ދޫކުރާ ލޯނަކީވެސް އެއްވެސް ސާވިސް ޗާޖެއް ނުނަގާ ގޮތަށް، ޝަރީއާ ކޮމްޕްލަޔަންޓް ލޯނެއްގެ ގޮތުގައި ދޫކުރާ ލޯނެކެވެ. ހަޔާ އެޑިއުކޭޝަން މިނިސްޓްރީން ބުނީ ކުރިއަށް އޮތް ބަންދު ދުވަސްތަކަށްފަހު ލޯނަށް އެދުމުގެ ފުރުސަތު ހުޅުވާލާނެ ކަމަށެވެ. ފުރިހަމަ އެޕްލިކޭޝަނެއް ހުށަހަޅާ ދަރިވަރުންނަށް، އެހެން އަހަރުތަކާ އަޅާބަލާއިރު ލޯނުގެ ކަންކަން ވަރަށް އަވަހަށް ހަމަޖެހިގެންދާނެ ކަމަށްވެސް މިނިސްޓަރު ވިދާޅުވިއެވެ. އެހެންކަމުން ލޯނަށް އެދެން ބޭނުންވާ ދަރިވަރުން ދުރާލާ ލިޔުންތައް ފުރިހަމަކޮށް ތައްޔާރުވުމަށް މިނިސްޓަރު އިލްތިމާސްކުރެއްވިއެވެ.