ރައީސް މުއިއްޒުގެ ސަރުކާރު ގެނައުމަށް އެމްޑީޕީއާއި ދެކޮޅުވެ، ރައީސް މުއިއްޒު އާއި ރާއްޖޭއިން 3 ޕާޓީއެއް ގުޅިވަޑައިގަތެވެ. ރަސްމީ ކޮށް ކޯލިޝަނެއް އުފަން ނުކުރިއަސް މަސައްކަތް ކުރީ އެމްޑީޕީއަށް އިންތިހާބު ކާމިޔާބު ކޮށް ނުދިނުމަށެވެ.
ޖުމްހޫރީ ޕާޓީ
ޖުމްހޫރީ ޕާޓީއިން ރިޔާސީ އިންތިހާބުގައި އެމްޑީޕީއަށް ތާޢީދު ނުކުރި ސަބަބު ބަޔާންކޮށް، ގާސިމް އިބްރާހިމް ވިދާޅުވެފައި ވަނީ “ލައިގެން ހުރި ޖަންގިޔަލަށް” ދަންދެން ހާމަ ކުރަން ޖެހޭނެ ކަމަށާއި، އިންޑިޔާއާއި އެކު ހެދި އެއްބަސްވުންތައް އެމްޑީޕީއިން ހާމަ ނުކުރާ ކަމަށެވެ.
މިއަދި އޭރު ދެއްކި އެއްވެސް ވާހަކަ އަކަށް ސަމާލުކަމެއް ނުދެއްވައެވެ. ގާސިމް އިބްރާހިމް ރިޔާސީ އިންތިހާބުގެ ފުރަތަމަ ބުރުގައި ވާދަކޮށް ލިބިވަޑައިގެންނެވި މަދު ވޯޓޯއި އެކު، ތާއީދު ކުރީ މުއިއްޒަށެވެ. މިއަދު ގާސިމް ބޭނުންވާ ފަރާތްތައްވެސް ވަޒީފާ ތަކުގައި އެބަހުއްޓެވެ. ހުރިހާ ސަރުކާރެއްގައި ގާސިމް ހޯދަން ބޭނުންވާ މާލީ މަންފާތައް ދަނީ ހޯދަމުންނެވެ. ސަރުކާރުގެ ކޯލިޝަންއެއްގައި ރަސްމީ ބައިވެރިވުމެއް ނެތި ގާސިމް އިބްރާހިމް މި ވެރިކަމުން ހޯދާ މަންފާތަކަކީ އަގު ނުކުރެވޭ ވަރުގެ މަންފާތަކެކެވެ. ނުކުރެވޭ ކުދި ކުދި ކަންކަމުގައި ބޮޑާހާކާލައިގެން އެކަން ކުރުމުގެ މަގަން ކަންތައްތައް ދަނީ ފަހި ކުރަމުންނެވެ. އޭގެ ބަދަލު ރައްޔިތުންނާއި ދެކޮޅަށް މަޖިލީހުގައި ނިންމާ ނިންމުންތަކުގައި ގާސިމް އިބްރާހިމްގެ ތާއީދާއި ރައީސް މުއިއްޒަށް ލިބެނީ ސަނާގެ ބަސްފުޅުތަކާއި އެކީ މެއެވެ.
ޑިމޮކްރެޓްސް
އެމްޑީޕީއަށް ގެއްލުނު ވޯޓެއް ގެއްލި އިންތިހާބުން ހޮވަން ބޭނުންވި ޕަސެންޓޭޖް ނުލިބުނީ ރައީސް ނަޝީދު އާއި ހުރެއެވެ. ޕާޓީ ތެރޭ ފިތުނަ އުފައްދައިގެން ޑިމޮކްރެޓްސްގެ ނަމުގައި އެމްޑީޕީގެ ލިބަރަލް ފިކުރެގެ ޕާޓީއެއް އުފައްދައިގެން އެމްޑީޕީގެ އަސާސްތައް ނަގަހައްޓަމުން ދަނީ ތިމަންނާމެންކަމަށް ބުނެ އުފެއްދި ފިތުނައިންނެވެ. ދޮގު ތުހުމަތު ތައް ރައީސް ސޯލިހުގެ މައްޗަށް ކޮށްގެންނެވެ. ދޮގު ތުހުމަތުތައް އެމްޑީޕީގެ ސަރުކާރުގެ މައްޗަށް ކޮށްގެންނެވެ. ރައީސް ނަޝީދުގެ ހުރި ހަސަދަ ވެރިކަމެއްގެ ބޮޑުކަމުންނެވެ.
މިއަދު ރައީސް ނަޝީދު ރާއްޖެއިން ބޭރުގައި ދިރިއުޅޭ ލަގްޒަރީ ދިރިއުޅުމާއި، އެ ގެންގުޅުއްވާ އެންޖީއޯ ތަކަށާއި، ތިމާވެށީގެ ޗެމްޕިއަން އަކަށްވެ، އެ ހޯދާ ފައިސާތަކަށް މަގުފަހިކޮށްދިނުމަށް ރާއްޖޭގެ ސަރުކާރުން ބޭނުންވާ ލިޔެ ކިޔުންތައް ފަސޭހަކަމާއި އެކު މުއިއްޒުގެ ސަރުކާރުން ދަނީ ރައީސް ނަޝީދަށް ފޯރުކޮށް ދެމުންނެވެ. ވެރިކަމަށް މުއިއްޒު ގެނެސް ރައީސް ނަޝީދު އުޅުއްވަނީ ރާއްޖެއިން ބޭރުގައި ނުހަނު އަރާމު ދިރިއުޅުމެއްގައެވެ.
އޭނާގެ ޕާޓީ ޑިމޮކްރެޓްސް އަށް ވަނީ ބޭނުންވި ގިނަ ވަޒީފާތައް ހަމަ ޖައްސާފައެވެ. އެ ޕާޓީގެ އިސް މެމްބަރެއް ކަމުގައިވާ، ނަމަވެސް، ބާއްވާ ހުރިހާ އިންތިހާބަކުން ބަލިވާ އަލައިކާ އަށް އެކަނިވެސް 3 މަގާމު ޑިމޮކްރެޓްސް ބޭނުންވެގެން ހުށައެޅިއެވެ. ފަހުން އެއިން މަގާމެއް ބޭނުންފުޅު ނުވާކަމަށް ހާމަ ކުރިއިރު، މަގާމުތައް ހަމަޖައްސައި ދިނީ ޑިމޮކްރެޓްސް އިން އެދިގެންނެވެ. ސިންވާރު ހުންނެވީ އެމްބަސީގައެވެ. ޑިމޮކްރެޓްސްގެ އަނެއް މައުތްޕީސް، ލޫކަސް ޖަލީލު ހުންނެވީ އަބްދުއްރަހީމްގެ މުސާރާގައެވެ. އަދިވެސް ޑިމޮކްރެޓްސްގެ ޒުވާން އެކި ފަރާތްތަކަށް ދިޔަވަރަށް އެނގިގެން ވަޒީފާ ދީފައިވެއެވެ. ނަމަވެސް ވަޒީފާތަކުގައި ތިބީ ކިހާ ބައެއްކަމެއް، ޑިމޮކްރެޓްސްއިންނެއް ހާމައެއް ނުކުރެއެވެ.
މުއިއްޒު ގެނައުމަށް ޑިމޮކްރެޓްސް އިން ކޮށް ދިން މަސައްކަތުގެ ބަދަލުގައި، ޑިމޮކްރެޓްސްގެ އިސް ފަރާތްތަކަށް ދަނީ އެތައް މިލިއަން ރުފިޔާގެ ޕްރޮޖެކްޓްތައް ދެމުންނެވެ. އެހެން ސަޕްލަޔަރުންނާއި، ކޮންޓެކްޓަރުންނަށް ނުލިބޭ ފައިސާ، ޑިމޮކްރެޓްސްގެ ހާއްސަ މެމްބަރުންނަށް ރައީސް މުއިއްޒު ދެއްވައެވެ.
މިވަގުތު ޑިމޮކްރެޓްސްގެ ލީޑަރޝިޕް ތިބީ ބަރުލަމާނީ ގެނައުމުގެ ބޭނުމުގައި ކުރާ މަސައްކަތުގައި އަބްދުއްރަހީމް އާއި އެކީއެވެ.
ދާދި ފަހުން، ސަރުކާރާއި ދެކޮޅުވުމަށް ތައްޔާރު ވުމަށް އެ ޕާޓީއިން ބޭއްވި “ވޯކްޝޮޕް” އިން ނިންމީ، ސަރުކާރުން ކޮށްފައިވާ މަސައްކަތުގެ (ތަރައްގީއާއި ޤައުމަށް ކޮށްފައިވާ އެހެނިހެން މަސައްކަތުގެ) ރިޕޯޓެއް ސަރުކާރުން މައުލޫމާތު ހޯދައިގެން އެކުލަވާލުމަށެވެ. ތަރުހީބު ކުޑަ މި “ވޯކްޝޮޕުން” ނިންމި ނިންމުމުން އެމީހުން ފެންވަރާއި، ސިޔާސީ ގޮތުން ރައްޔިތުންނާއި ހުރި ދުރުމިން ހާމަވެގެން ދިޔަ ނިންމުމެކެވެ. މި ސަރުކާރުން ރައްޔިތުންނަށް ކަމެއް ކޮށް ނުދެއެވެ. ނަމަވެސް ވޯކްޝޮޕުން ދައްކަން މަސައްކަތް ކުރީ ސަރުކާރުން ބައިވަރު ކަންކަން ކޮށްފައިވާކަމެވެ. މި ސަރުކާރުން ބަޔަކަށް ލޯނެއް ދިނަސް އެކަމަށް ބޮޑު ހަފްލާއެއް ބާއްވައެވެ. ސިޓީކައުންސިލުން ކަމެއް ކުރިއަސް އެއީ ރައީސް މުއިއްޒު ކުރެއްވި ކަމެއް ކަމަށް ބުނެ ރައީސް އޮފީސް ވެބްސައިޓްގައި ލިޔެއެވެ. ނަމަވެސް ޑިމޮކްރެޓްސް އިން ނިންމީ ރައީސް މުއިއްޒު ކުރެއްވި މަސައްކަތުގެ ރިޕޯޓެއް އެކުލަވާލުމަށެވެ.
އެމްޑީއޭ
ރިޔާސީ އިންތިހާބުގެ ފުރަތަމަ ބުރުގައި އެމްޑީއޭ ގަދަ ކޮށް އޮތީ އެމްޑީޕީއާއި އެކުގައެވެ. ދެވަނަ ބުރުގައި މުއިއްޒު މޮޅުވާނެ ކަމަށް ބެލެވި، ހުތުރުކޮށް ކޮޅު ބަދަލު ކުރިއެވެ. މިއަދު އެމްޑީއޭ އެތައް ބަޔަކު ސަރުކާރުގެ 5500 ސިޔާސީ މަގާމުތަކުގެ ތެރޭ އެބަތިއްބެވެ. މީގެ 2 ހަފްތާ ކުރިން އެއިން 4 މީހަކު ވަޒީފާއިން ވަކި ކުރުމުން، ސިޔާމު ފަރާތުން މުއިއްޒަށް ގުޅުއްވައި އަލުން އެ ވަޒީފާތައް އެފަރާތްތަކަށް ދިނެވެ.
އެމްޑީއޭ ސަންޓްރަވަލްސް ސިޔާމު ހުންނެވީ އަންނަ ރިޔާސީ އިންތިހާބުގައި ވާދަ ކުރާނެ ކަމަށްވެސް ވިދާޅުވެގެންނެވެ. މަސައްކަތް ކުރައްވަނީ އެގޮތަށް ކިޔަމުންނެވެ. އެހެން ކިޔަންފެށީ، ސޮވެރިންގ ގެރެންޓީ ނުލިބޭނެ ކަމަށް ރައީސް މުއިއްޒު ވިދާޅުވުމުންނެވެ. އެވަރުންވެސް މުއިއްޒުގެ ސަރުކާރާއި ދެކޮޅުވާކަށް ނުކެރުނެވެ. ލިބޭ މަންފާއާއި ފައިދާ ބޮޑު ކަމުންނެވެ.
އެމްޑީޕީގެ މެމްބަރުންނާއި ދިވެހިރައްޔިތުންނަށް މި ޕާޓީތަކުގައި ފެންވަރާއި، ޕާޓީ ހަދައިގެން ރައްޔިތުންނަށް ކޮށްދިން ކަމެއް ނެތްކަން އެނގެން ޖެހެއެވެ. ޤައުމަށް މިވަރުގެ އަނިޔާވެރި ވެރިއަކު ފާވީ، އެމްޑީޕީ ބަލިކަށި ކުރުމަށް މި ޕާޓީތަކުން ކުރި މަސައްކަތާއި، މި އަނިޔާވެރި ވެރިކަން ގެނައުމަށް ކުރި މަސައްކަތުންނެވެ. އަދިވެސް ކުރަމުންދަނީ އެ މަސައްކަތެވެ. އޭގެ ތެރެއިން ބަޔަކު މީހުން ސަރުކާރާއި ދެކޮޅުކަމަށް ދައްކަނީ ރައްޔިތުންގެ ލޮލުގައި އަނދުން އެޅުވުމަށެވެ.