ރައީސް ގައުމު ތަމްސީލް ކޮށްދެއްވީ، ނުހަނު ވިސްނުންތެރިކަމާއެކު ކަމަށާއި ރާއްޖެއަކީ މުޅި ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން ސާބިތުކޮށްދެއްވާފައިވާ ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ. ޖުމްހޫރީ ޕާޓީގެ ލީޑަރުކަން ވެސް ކުރައްވާ ގާސިމް އެކްސްގައި ކުރެއްވި ދިގު ޕޯސްޓެއްގައި ވަނީ އދ. ގެ އާންމު މަޖިލީހުގައި ރައީސް މުއިއްޒު ދެއްވި ތަގުރީރަށް ތައުރީފު ކުރައްވައިފަ އެވެ. އދ. ގައި ރާއްޖޭގެ އަޑު އިއްވުމަށް ރައީސް ކުރެއްވި މަސައްކަތްޕުޅު ފާހަގަކުރައްވައި ގާސިމް ޝުކުރު އަދާކުރެއްވި އެވެ.އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް އެމެރިކާގެ ނިއު ޔޯކަށް ކުރެއްވި ހަފުތާއެއްގެ ދަތުރުފުޅު ނިންމާލެއްވުމަށް ފަހު ރައީސް މުއިއްޒު ވަނީ މިއަދު ހެނދުނު އެނބުރި މާލެ ވަޑައިގެންފަ އެވެ.ގާސިމް ވަނީ އޭނާ އާއި ޖުމްހޫރީ ޕާޓީގެ މެމްބަރުންގެ ފަރާތުން ރައީސަށް މަރުހަބާ ދަންނަވައިފަ އެވެ.ގާސިމް ވިދާޅުވީ އދ. ގައި ރާއްޖެ ތަމްސީލު ކުރެއްވުމުގައި ރައީސް، މި ގައުމަކީ ފަހުރުވެރި، ކެރޭ، ހަރުދަނާ، ދުރުވިސްނޭ، އިލްމާއި ހުނަރު ލިބިފައިވާ، ތަރައްގީއަށް އުންމީދު ކުރާ ތަސައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން، ސާބިތުކަމާއެކު ދައްކުވައިދެއްވާފައިވާ ކަމަށެވެ.‏އދ. ގެ އާންމު މަޖިލީހުގައި ރައީސް ދެއްވި ތަގުރީރަށް ދުނިޔޭގެ ސަމާލުކަން ލިބިގެންދިޔަކަންވެސް ގާސިމް ވަނީ ފާހަގަކުރައްވާފަ އެވެ. އެމަނިކުފާނުގެ ތަގުރީރުތަކުގައި މިއަދު ދުނިޔެއަށް މުހިންމު ކަންކަން ފާހަގަކުރައްވާފައިވާއިރު ރާއްޖޭގެ ވިންދާ ގުޅިފައިވާ ފަލަސްތީނުގެ މައްސަލައިގައި ސަޙްޔޫނީ ދައުލަތުން ހިންގަމުން ގެންދާ ޖަރީމާތައް ކުށްވެރިކުރައްވާ ދެއްކެވި ވާހަކަފުޅު މުޅި އިސްލާމީ ދުނިޔެއާއި، އަދި ދުނިޔޭގެ ގިނަ ގައުމުތަކުން ބަލައިގެންފައިވާކަމަށްވެސް ގާސިމް ވިދާޅުވި އެވެ.ޖުމްހޫރީ ޕާޓީގެ ލީޑަރުު ގާސިމް އިބްރާހީމް ވަނީ 2040 ގައި ދިވެހިރާއްޖޭގެ މިނިވަންކަމަށް 75 އަހަރު ފުރޭއިރު، އެހާތަނަށް ރާއްޖެއަކީ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި އޮތުމަށް ރައީސް ގެންގުޅުއްވާ ތަސައްވަރުތައް މުޅި ދުނިޔޭގެ ކުރިމަތީގައި ހާމަކޮށްދެއްވާ، ގައުމާއި ރައްޔިތުންނާމެދު ދައްކުވައިދިން ފަހުރުވެރި ނަމޫނާއަށްޓަކައި އެމަނިކުފާނަށް ޝުކުރު އަދާކުރައްވާފަ އެވެ.