ކުރީގެ ރައީސް އަބްދުﷲ ޔާމީން އަބްދުލްގައްޔޫމާ ދެކޮޅަށް ދައުލަތުން ފަހުން ހުށަހެޅި އާ ހެކިތައް ބަލައިނުގަނެވޭނެ ކަމަށް ކަނޑައަޅައި ހައި ކޯޓުން އިއްވި ހުކުމް ސުޕްރީމް ކޯޓުން މިއަދު ދަމަހައްޓައިފިއެވެ.
މިއީ ޔާމީނުގެ މައްޗަށް ދައުލަތުން އުފުލާފައިވާ ކޮރަޕްޝަންގެ ބޮޑެތި ދައުވާތަކާ ގުޅިގެން ހިންގާ ޝަރީއަތްތަކުގައި ޔާމީނަށް ލިބުނު ކާމިޔާބީއެކެވެ.
މި މައްސަލައަކީ ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑާ ކުރި ކަމުގެ ކުށުގައި ޔާމީންގެ މައްޗަށް އިއްވި ޖަލު ހުކުމް ބާތިލްކޮށް، މައްސަލަ އަލުން ބަލަން ހައި ކޯޓުން އެންގި އެންގުމާ ގުޅިފައިވާ މައްސަލައެކެވެ.
މައްސަލަ އަލުން ބަލާއިރު، ޖިނާއީ އިޖުރާއަތުގެ ގާނޫނުގެ 135 ވަނަ މާއްދާގެ ދަށުން ދައުލަތުން ފަހުން ހުށަހެޅި އާ ހެކިތައް ބަލައިނުގަތުމަށް ހައި ކޯޓުން އެންގި އެންގުން ދައުލަތުން އޮތީ ސުޕްރީމް ކޯޓުގައި އިސްތިއުނާފު ކޮށްފައެވެ.
މިއަދުގެ އަޑުއެހުމުގައި ރިޔާސަތުގައި އިންނެވި ފަނޑިޔާރު އާއިޝާ ޝުޖޫން މުހައްމަދު ވިދާޅުވީ، ދަށު ކޯޓުގައި ހުށަނާޅާ ނުކުތާއެއް މަތީ މަރުހަލާގެ ކޯޓެއްގައި ބެލޭނީ އެ ނުކުތާއެއް ހުށަހެޅުމުގެ އެއްވެސް ފުރުސަތެއް ކުރިން ލިބިފައި ނެތް ނަމަ އެކަނި ކަމަށެވެ.
ހައި ކޯޓުން އެ ހެކިތަކަކީ އިޖުރާއަތާ ހިލާފަށް ހުށަހަޅާފައިވާ ހެކިތަކެއް ކަމަށް ނިންމި ހާލަތުގައިވެސް، އެއީ ސުޕްރީމް ކޯޓުގެ ކުރީގެ ނިންމުމެއް ކަމަށްވާ "ޢަލީ ޒުބައިރު މައްސަލަ" އަށް ރިއާޔަތްކޮށް ރަނގަޅު ކުރެވިދާނެ އިޖުރާއީ އައިބުތަކެއް ކަމަށް ބުނެ ދައުލަތުން ހައި ކޯޓުގައި ވަކާލާތުކޮށްފައި ނެތްކަން ފަނޑިޔާރު ފާހަގަކުރެއްވިއެވެ.
ކޯޓުގެ ޒިންމާއެއް ނޫން: ހައި ކޯޓުގައި އެ ނުކުތާ ފާހަގަކުރުމުގެ ފުރުސަތެއް ނުލިބޭ ކަމަށް ދައުލަތުން ބުނާ ވާހަކައިގައި ބުރަދަނެއް ނެތް ކަމަށާއި، ދައުލަތުގެ އިޖުރާއީ ގޯސްތައް ހޯދައި ފާހަގަކޮށްދިނުމަކީ ކޯޓުގެ މައްޗަށް އޮތް ޒިންމާއެއް ނޫން ކަމަށްވެސް ހުކުމްގައިވެއެވެ.
ސުޕްރީމް ކޯޓުގެ މި ނިންމުމާއެކު، ރައީސް ޔާމީނާ ދެކޮޅަށް ދައުލަތުން ހުށަހެޅި ބައެއް ހެކިތައް މިހާރު ވަނީ މައްސަލައިން އެއްކޮށް އެއްފަރާތްކުރެވިފައެވެ.
އެއީ:
އަޙްމަދު ނަރީޝްގެ އެމްއެންޑީއެފް ހާޒިރީ: ޔާމީންގެ ފަރާތުން ހެކިބަސް ދިން، ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް ކުރިން ސިފައިންގޭގައި އުޅުނުއިރުގެ ހާޒިރީ ރެކޯޑުތައް.
ޑޮލަރު މާރުކޮށްގެން ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ލިބެންޖެހޭ ދިވެހި ރުފިޔާގެ ނަގުދު ފައިސާ ހަވާލުކުރަން ދިޔަ ކަމަށް ނަރީޝް ބުނި ބުނުމަކީ ދޮގެއް ކަމަށް ދަށު ކޯޓުން ކުރިން އޮތީ ކަނޑައަޅާފައެވެ.
އީވައިސީގެ ޔައުމިއްޔާ: ރައީސް ޔާމީންގެ ވެރިކަމުގައި އޮތް ކެބިނެޓް ކޮމިޓީއެއް ކަމަށްވާ އިކޮނޮމިކް ޔޫތު ކައުންސިލް ގެ ބައެއް ޖަލްސާތަކުގެ ރަސްމީ ޔައުމިއްޔާތައް.
މި ހުކުމާއެކު، ކްރިމިނަލް ކޯޓުން އާރަށު މައްސަލަ އަލުން ބަލާއިރު ދައުލަތުން ހުށަހެޅި މި ބުނެވުނު އައު ހެކިތަކަށް އެއްވެސް ވަރަކަށް ރިއާޔަތެއް ނުކުރެވޭނެއެވެ.
ފަނޑިޔާރު ޢާއިޝާ ޝުޖޫން މުޙައްމަދު އިއްވެވި ހުކުމްގައި ފާހަގަކުރެއްވި ގޮތުގައި، ޖިނާއީ މައްސަލަތަކުގައި ދައުލަތުން ދައުވާ ކުރަނީ އަމިއްލަ ފަރުދުންނާ ދެކޮޅަށް ކަމަށްވާއިރު، އެކަށީގެންވާ ވަސީލަތްތަކާއި ބާރުވެރިކަން އޮންނަނީ ދައުލަތަށެވެ. އެހެންކަމުން، އެކަށީގެންވާ ޝައްކެއް ނެތް މިންވަރަށް ކުށް ސާބިތުކޮށްދިނުމުގެ ބުރަ އުފުލަންޖެހޭނީ ދައުލަތުން ކަމަށާއި، ދައުލަތުން ހަދާ އިޖުރާއީ ގޯސްތަކަށް ކޯޓުތަކުން ފަރުވާ ދީ ހެދުމަކީ ޝަރީއަތް ހިންގުމުގެ ހަމަހަމަކަމުގެ އުސޫލާ ހިލާފު ކަމެއް ކަމަށް ހުކުމްގައިވެއެވެ. އަދި އާ ހެކިތަކާ ގުޅޭގޮތުން ކުރިން ހައި ކޯޓުގައި ފާހަގަނުކުރާ ނުކުތާތަކެއް ސުޕްރީމް ކޯޓުގައި ދިފާއުކުރަން ޖެހޭ ފަދަ އިސްތިސްނާ ހާލަތެއް އޮތްކަން ސާބިތުކޮށްދޭން ދައުލަތް ނުކުޅެދުނުކަންވެސް ބެންޗުން ފާހަގަކުރެއްވިއެވެ.
ފަނޑިޔާރު ޝުޖޫންގެ ރައުޔަށް ބެންޗުގައި ދެން ތިއްބެވި ފަނޑިޔާރު ޑރ. މުހައްމަދު އިބްރާހީމް އަދި ފަނޑިޔާރު ޢަބްދުﷲ ޙަމީދު ވަނީ ތާއިދުކުރައްވާފައެވެ. ސުޕްރީމް ކޯޓުގެ މި ނިންމުމާއެކު، މީގެ ކުރިން މަޑުޖައްސާލާފައި އޮތް އާރަށު މައްސަލައިގެ ޝަރީއަތް ކްރިމިނަލް ކޯޓުގައި އަލުން ފެށޭނެއެވެ. ނަމަވެސް، ދަށު ކޯޓުން މައްސަލަ އަލުން ބަލާއިރު ދައުލަތުން ފަހުން ހުށަހެޅި އެއްވެސް އާ ހެކިތަކަކަށް ރިއާޔަތެއް ނުކުރެވޭނެއެވެ. ޔާމީންގެ މައްޗަށް ރ. ފުއްގިރި މައްސަލާގައި ކުރާ ދައުވާގެ ޝަރީއަތްވެސް ކްރިމިނަލް ކޯޓުގައި ހިނގަމުންދާއިރު، އެސްކްރޯ އެކައުންޓެއްގައި ހުރި އެއް މިލިއަން ޑޮލަރު ހޯދުމަށް އެމަނިކުފާނު ކުރައްވާ ދައުވާގެ މައްސަލައެއްވެސް ހައި ކޯޓުގައި އެބައޮތެވެ.