"ހަވީރު"ގެ އެންމެ މަޝްހޫރު ކޮލަމްގެ ގޮތުގައި 1980ގެ އަހަރުތަކުގެ ތެރޭގައި ދެމިއޮތް "ރައްޔިތު އަހަންމަދުގެ ދޭސީ ޚިޔާލު" އާއި އޭގެ ފަހުން ޖެހި "ދެ ވަނަ ވިސްނެވުމަކަށް" ލިއުއްވީ ސީނާ އަހުމަދު ޒާހިރުކަން "ހަވީރު"ން ރޭ ރަސްމީކޮށް ހާމަކޮށްފި އެވެ. ރެއާ ހަމައަށް ސިއްރެއްގެ ގޮތުގައި ބޭއްވި ނަން، "ހަވީރު"ގެ 35 ވަނަ އަހަރީ ހަފުލާގައި ހާމަކުރީ އެކަމަށް ސީނާ ޒާހިރު ދެކޮޅު ނުހެއްދެވުމުންނެވެ. ޚިޔާލު ފާޅުކުރުމުގެ މިނިވަންކަން ހަނިކޮށް އޮތް ދުވަސްވަރު "ރައްޔިތު އަހަންމަދުގެ ދޭސީ ޚިޔާލަ"ކީ ގިނަ މައްސަލަތަކެއް ކިއުންތެރިންގެ ސަމާލުކަމަށް ގެނައި އަދި ބައެއް ކަންކަމާ މެދު ފާޑުކިޔުމުގެ ކޮލަމެކެވެ. އެ ކޮލަމް އޭރު މަޝްހޫރުވީ ވެސް އޭގެ ލިޔުންތަކުގެ ފެންވަރު ރަނގަޅުވުމާއި ފާޅުކުރާ ޚިޔާލުތައް ކިޔުންތެރިންނަށް ކަމުދާތީ އެވެ. އޭރު ވެސް ސިއްރު ލިޔުންތެރިޔަކީ ސީނާ ޒާހިރުކަން ބައެއް މީހުންނަށް އެނގެ އެވެ. އަދި އެ ކޮލަމް ލިޔުއްވުން ހުއްޓަވާލެއްވުމަށް ފަހު "އަލިފު"ގެ ނަމުގައި "ދެ ވަނަ ވިސްނެވުމަކަށް" ކޮލަމް "ހަވީރު"ގައި ޖަހަން ފެށި އެވެ. މި ކޮލަމްގެ ލިޔުންތެރިޔަކީ ވެސް ޒާހިރުކަން ބައެއް މީހުން ކަށަވަރުކަމާ އެކު ބުނެފައިވެ އެވެ. "ދޭސީ ޚިޔާލު" ޖެހި ދުވަސްވަރު ޒާހިރަށް ނިސްބަތްކޮށް "ރައްޔިތު އަހަންމަދޭ" ވެސް ކިޔަ އެވެ. "ބައެއް ކިޔުންތެރިން ސީދާ އެއީ ސީނާ ޒާހިރޭ ބުނުމާ ރަސްމީކޮށް ހަވީރުން ލިޔުންތެރިޔާގެ ނަން އިއުލާންކުރުމާ އެއީ ތަފާތު ދެ ކަމެއް. އެގޮތަށް ބަލައިގެން ރޭ އަޅުގަނޑުމެން ނިންމީ އެކަހަލަ ހަފުލާއެއްގައި ޒާހިރުގެ ނަން ހާމަކުރަން،" އެޑިޓަރު މޫސާ ލަތީފު، ވިދާޅުވި އެވެ. "ރޭގެ ހަފުލާ ތަފާތުކޮށްލަން ވިސްނި ވިސްނުމުގައި އެ ޚިޔާލު އައީ. ދެން އަޅުގަނޑު ސީނާ ޒާހިރަށް ގުޅާފައި ދެންނެވިން އެއްވެސް މައްސަލައެއް އެބަ އޮތްތޯއޭ ނަން ހާމަކުރަން. ދެން ވިދާޅުވީ ނޫނެކޭ، މިހާރު އެއީ މައްސަލައެއް ނޫނޭ." ޒާހިރަކީ ރާއްޖޭގައި އުފެދުނު މޮޅު ލިޔުންތެރިއެކެވެ. ނޫސްވެރިއެކެވެ. އޭނާ ވަނީ އަމިއްލަ ނޫހެއް ކަމަށްވާ "ހަފުތާ" ނެރުއްވާފައިވެ އެވެ. "ހަވީރު"ގެ ކޮލަމިސްޓެއްގެ ގޮތުގައި ފެނުނީ އަމިއްލަ ނޫސް ނެރުއްވުން ހުއްޓާލެއްވިތާ އަހަރުތަކެއް ފަހުންނެވެ. "ހަވީރު"ގެ އެކި ދުވަސްވަރުގެ އެޑިޓަރުން ފާހަގަކުރައްވާ އެއް ކަމަކީ ޒާހިރުގެ ކޮލަމް ގަވާއިދުން ކުރިއަށް ގެންދެވި ގެންދެވުމެވެ. "ރާއްޖެ އިން ބޭރަށް ވަޑައިގަންނަވާ ނަމަ ބައެއް ފަހަރު ދެ ކޮލަމް ފޮނުއްވާފައި ވެސް އެބަ ހުރި. އެއީ ދެ ހަފުތާ ތެރޭގައި ރާއްޖެ ވަޑައިނުގެންދެވިދާނެ ކަމަށް ބައްލަވައިގެން. އިންޓަނެޓް ނެތް ދުވަސްވަރު އެގޮތަށް ކަންތައްކުރެއްވީ،" މޫސަ ވިދާޅުވި އެވެ. "ދެ ވަނަ ވިސްނެވުން ކޮލަމް ކުރިއަށް ގެންދެވި އިރު އަޅުގަނޑު ހުރިން އެކްޓިން އެޑިޓަރަކަށް. އޭރު ވެސް އެއްވެސް ހާސްކަމެއް ނޯންނާނެ ޒާހިރުގެ ކޮލަމް ނައިސްގެންނެއް. ޔަގީންކަން އޮވޭ ކަނޑައަޅާފައި އޮންނަ ދުވަހަށް ފޮނުއްވާނެކަމުގެ. އެއީ ލިޔުއްވަން އެ މަނިކުފާނުގެ ހުރި ޝައުގުވެރިކަން." ރޭގެ ހަފުލާގައި ޒާހިރުގެ ނަން ހާމަކުރީ ބްރޭކިން ނިއުސްއެއްގެ ގޮތުގަ އެވެ. އެއީ ހަފުލާގެ ބައިވެރިންނަށް ވަރަށް ކަމުދިޔަ އައިޓަމަކަށްވި އެވެ.