މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ނައިބު ލީޑަރު ކަމަށް ހައުސިން މިނިސްޓަރު ޑރ. މުހައްމަދު މުއިއްޒު އައްޔަން ކުރައްވައިފި އެވެ. އިންތިހާބަކާ ނުލާ އޭނާ އެ މަގާމަށް އައްޔަން ކުރެއްވީ އެ ޕާޓީގެ އަސާސީ ގަވައިދުން ޕާޓީގެ ލީޑަރަށް ލިބިދީފައިވާ ބާރުގެ ދަށުންނެވެ. އެމްޑީއޭގެ ކޮންގްރެސްގެ މިއަދު މެންދުރު ފަހުގެ ދަންފަޅީގައި އެ ޕާޓީގެ ލީޑަރުގެ މަގާމަށް، ކުރިން ވެސް އެ މަގާމުގައި ހުންނެވި މީދޫ ދާއިރާގެ އަހްމަދު ސިޔާމް މުހައްމަދު ވަނީ ހޮވިވަޑައިގެންފަ އެވެ. އިތުރު މެމްބަރަކު ވާދަ ނުކުރައްވާތީ އޮޓަމެޓިކުންނެވެ. އެމްޑީއޭގެ ލީޑަރު އަހްމަދު ޝިޔާމް މުހައްމަދު އެގޮތަށް ނިންމެވި ކަން އިއުލާންކުރެއްވީ ދެންމެ ނިމިގެންދިޔަ އެ ޕާޓީގެ ކޮންގްރެސްގަ އެވެ. އިއްޔެ އިން ފެށިގެން ކުރިއަށް ގެންދިޔަ އެމްޑީއޭގެ ފުރަތަމަ ކޮންގްރެސްގައި އިންތިހާބުވާ ޕާޓީގެ ނައިބު ލީޑަރުގެ މަގާމަށް ކުރިމަތިލެއްވާފައިވަނީ ތިން ބޭފުޅުންނެވެ. އެހެން ކަމުން އެ މަގާމުތަކަށް ވެސް ވާދަކުރުމަކާ ނުލައި މެންބަރުން ވަނީ އިންތިހާބުވެވަޑައިގެންފަ އެވެ. އެ ޕާޓީގެ ނައިބު ލީޑަރު ކަމަށް އިންތިހާބުވީ އިންތިގާލީ މަރުހަލާގައި ވެސް ނައިބު ލީޑަރުގެ މަގާމުގައި ތިއްބެވި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހްމަދު އާމިރާއި ކެނދިކުޅުދޫ ދާއިރާގެ މެމްބަރު އަލީ މައުރޫފުގެ އިތުރުން އައިޝަތު ރަފިއްޔާ އެވެ. އެ ޕާޓީގެ ކައުންސިލަށާއި އަންހެނުންގެ މަޖިލީހުގެ ރައީސާއި ނައިބު ރައީސާއި އަދި ޒުވާނުންގެ މަޖިލީހުގެ ރައީސާއި ނައިބު ރައީސްގެ މަގާމަށް މެމްބަރުން ވަނީ އިންތިހާބުކޮށްފަ އެވެ.