ކުރީގެ ރައީސް މައުމޫން އަބްދުލްގައްޔޫމް އުފައްދަވާ ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް )ޕީޕީއެމް( އުފެއްދުމުގެ ހުއްދައަށް ހުށަހަޅަން ޖެހޭ 50 މީހުންގެ ސޮއި އިލެކްޝަންސް ކޮމިޝަންއަށް މިއަދު ހުށަހަޅައިފި އެވެ.
ޕީޕީއެމް އުފެއްދުމުގެ ހުއްދައަށް އެދިވަޑައިގެން 50 މީހުންގެ ސޮއި އިލެކްޝަންސްގެ ރައީސް ފުއާދު ތައުފީގަށް މިއަދު ހަވީރު 3:50ގައި ހުށަހެޅުއްވީ މައުމޫންގެ ދޮށީ ދަރިކަލުން ފާރިޝް މައުމޫން އާއި ޑީއާރުޕީގެ އެޑްވައިޒަރީ ބޯޑުގެ ހިއުމަން ރިސޯސަސް އެޑްވައިޒަރަކަށް ކުރިން ހުންނެވި ޑރ. މުހައްމަދު ސައުދު އެވެ. ޕާޓީ އުފެއްދުމުގެ ލިޔެކިޔުންތައް ހުށަހެޅުއްވި ރަސްމިއްޔާތުގައި ޑީއާރްޕީން ދާދީ ފަހުން ވަކިވެވަޑައިގެންނެވި މަޖިލިސް މެންބަރުންނާއި ޒެޑް ފެކްޝަންގައި އިސްކޮށް ހަރަކާތްތެރި ވެވަޑައިގަންނަވާ ބޭފުޅުން ބައިވެރިވެވަޑައިގެންނެވި އެވެ.
ޕާޓީ އުފެއްދުމުގެ ލިޔެކިޔުންތައް ހުށަހެޅުއްވުމަށް ފަހު ފާރިޝް މައުމޫން މިއަދު ވިދާޅުވީ ޕީޕީއެމް އުފެއްދުމުގެ ޝައުގުވެރިކަން ފާޅުކޮށް ހުށަހެޅި ލިޔެކިޔުންތަކަކީ ސިޔާސީ ޕާޓީތަކުގެ ގަވާއިދުގެ )6( މާއްދާގެ ދަށުން ފުރިހަމަކޮށްފައިވާ ލިޔެކިޔުންތަކެއް ކަމަށެވެ. އަދި ވިދާޅުވީ ޕާޓީ އުފެއްދުމުގައި އެ ބޭފުޅުން އަމަލު ކުރަމުންދާނީ ރާއްޖޭގެ ގާނޫނު އަސާސީ އާއި ގަވާއިދުތަކާ އެއްގޮތްވާ އުސޫލުގެ މަތިން ކަމަށެވެ.
ފުއާދު ތައުފީގު މިއަދު ވިދާޅުވީ ސިޔާސީ ޕާޓީއެއް އަލުން އުފެދިގެން އައުމަކީ ރާއްޖޭގެ ޑިމޮކްރަސީއަށް ލިބޭނެ އިތުރު ފުރިހަކަމެއް ކަމަށެވެ. އަދި ޕާޓީއެއް އުފެއްދުމުގެ ލިޔެކިޔުންތައް ފުރިހަމަވެގެން އެ ޕާޓީ އަވަސް މުސްތަގުބަލެއްގައި ރަޖިސްޓްރީ ވެގެންދާނެ ކަމަށް އުންމީދު ކުރައްވާ ކަމަށް ފުއާދު ވިދާޅުވި އެވެ.
"އިތުރު ޕާޓީއެއް އުފެދުމަކީ އަޅުގަނޑު ދެކޭ ގޮތުގައި ރާއްޖޭގެ ޑިމޮކްރަސީއަށް ޓަކައި ލިބޭ އިތުރު ފުރިހަމަ ކަމަކަށް ވެގެންދާނެ. އުންމީދު ކުރަނީ ހަމަކުރަން ޖެހޭ ލިޔެކިޔުންތައް ހަމަކުރައްވައި އަވަސް މުސްތަގުބަލެއްގައި މި ޕާޓީ ރަޖިސްޓްރީ ވެގެންދާތަން ދިވެހިރައްޔުތުންނަށް ވެސް ފެނުން،" ފުއާދު ތައުފީގު ވިދާޅުވި އެވެ.
އިލެކްޝަންސް ކޮމިޝަނުގެ ނައިބު ރައީސް އަހުމަދު ފަޔާޒް ހަސަން ވިދާޅުވީ ޕާޓީ ހެދުމަށް ކޮންމެ ފޯމް ހުށަހަޅާ އިރު އެހެން ޕާޓީއަކަށް ނިސްބަތްވާ ބޭފުޅުން ނަމަ އެ ބޭފުޅަކު ހުރި ޕާޓީން ވަކިވެވަޑައިގެން ފޯމް ހުށަހެޅުއްވުމަކީ މުހިންމު ކަމެއް ކަމަށެވެ. އަދި ރަޖިސްޓްރީވެފައިވާ ޕާޓީން ވަކިވުމަށް އެ ޕާޓީއަކަށް ހުށަހަޅައިގެން ވަކިނޮކޮށްފި ނަމަ، އިލެކްޝަންސް އިން އެ ބޭފުޅަކު އެ ޕާޓީން ވަކިކޮށްދޭނެ ކަމަށް ފަޔާޒް ވިދާޅުވި އެވެ.
ސިޔާސީ ޕާޓީތަކުގެ ގަވާއިދުގެ 6 މާއްދާގެ )ނ( ގައި ބުނެފައި ވަނީ ޕާޓީއެއް އުފެއްދުމުގެ ޝައުގުވެރިކަން ބަޔާންކޮށް އެ ގަވާއިދުގައިވާ ގޮތުގައި މަތީން ހުށަހެޅުމުން ޕާޓީ އުފެއްދުމަށްޓަކައި ސޮއި ހޯދުމާއި، ޕާޓީ އުފެއްދުމަށްޓަކައި ކުރަން ޖެހޭ އެހެނިހެން ކަންތައްތައް ކުރިއަށް ގެންދިއުމުގެ ހުއްދަ ލަސްވެގެން ސަރުކާރު ބަންދު ނޫން ތިން ދުވަހުގެ ތެރޭ ކޮމިޝަނުން ލިޔުމަކުން ދޭންވާނެ އެވެ. އިލެކްޝަންސް އިން ބުނީ ޕާޓީ އުފެއްދުމުގެ ހުއްދައާ މެދު ތިން ދުވަހުގެ ތެރޭ ގޮތެއް ނިންމައި ޖަވާބެއް ދޭނެ ކަމަށެވެ.