ބޯހިޔާވަހިކަމުގެ ގިނަ ފުރުސަތުތަކެއް ލިބޭ ގޮތަށް ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ) އިން ބޮޑު 15 ޕްރޮޖެކްޓެއް އިފްތިތާހު ކޮށްފިއެވެ.
ހުޅުމާލޭ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތުގައި، އެ ޕްރޮޖެކްޓްތައް އިފުތިތާހު ކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
ްޓްރާންސްފޯމިންގ ޓުމޯރޯގެ ނަމުގައި އެޗްޑީސީން އިފްތިތާހުކުރި މި ޕްރޮޖެކްޓުތަކުގެ ތެރޭގައި ބޯހިޔާވަހިކަމުގެ އިތުރުން، މުޅި މާލެ ސަރަހައްދުގެ ތަރައްގީއާ ގުޅުން ހުރި ގިނަ މަސައްކަތްތަކެއް ހިމަނާފައި ވެއެވެ. އޭގެ ތެރޭގައި މި ސަރަހައްދަށް އާ ބައެއް މަޝްރޫތައް ވެސް ހިމެނެއެވެ.
މި މަޝްރޫއުތަކަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މެނިފެސްޓޯއާ އެއްގޮތަށް، އެޗްޑީސީގެ ބެލުމުގެ ދަށުގައި އޮތް ރަށްތައް ތަރައްގީ ކުރުމަށް އިފުތިތާހު ކުރި މަޝްރޫއުތަކެކެވެ. އޭގެ ތެރޭގައި ހުޅުމާލޭގެ އިތުރަށް ރައީސުލްޖުމްހޫރިއްޔާ ފައްޓަވާފައިވާ ރަސްމާލެ މަޝްރޫއުގެ މަސައްކަތްތައް ވެސް ހިމެނެ އެވެ.
ރަސްމާލެ ތަރައްގީކުރުމަށް ނިންމާފައިވާ ގޮތުގެ ކުރެހުމެއް--- ފޮޓޯ: އެޗްޑީސީ
އެޗްޑީސީން އިފްތިތާހުކުރި މަޝްރޫތަކުގެ ތެރޭގައި މައިގަނޑު ގޮތެއްގައި ހިމެނިފައިވަނީ ބޯހިޔާވަހިކަމުގެ މަސައްކަތްތަކެވެ. އެގޮތުން ރަސްމާލެ ޕްރޮޖެކްޓާއި ހުޅުމާލޭގައި ހިންގާ އިތުރު ދެ ސޯޝަލް ހައުސިންގެ މަޝްރޫއު އާއި ރޯ ހައުސް މަޝްރޫއެއް އަދި ބިންވެރިޔާ ސްކީމުން ގޯތި ލިބިފައިވާ މީހުންނަށް ހާއްސަ ކޮށްގެން ކުރިއަށް ގެންދާ ޕްރީ ފެބް ގެތަކުގެ މަޝްރޫއެއް ވެސް އިފްތިތާހު ކޮށްފައި ވެއެވެ. ރޯ ހައުސް މަޝްރޫއުގެ ތެރޭގައި 32 ރޯހައުސް ހިމެނޭ އިރު 2،100 އަށް ވުރެ ގިނަ ފްލެޓު އެޅުމަށް ވެސް މި ޕްލޭނުގައި ހިމަނާފައި ވެއެވެ.
ރަސްމާލެ މަޝްރޫއަށް ބަލާއިރު، ހުޅުމާލެއަށްވުރެ 3 ގުނަ ބޮޑު މި އީކޯ-ސިޓީގައި 325،000 މީހުން ދިރިއުޅެވޭގޮތަށް ވަނީ ރާވާފަ އެވެ. މިއީ ރާއްޖޭގައި މިހާތަނަށް ހިންގާ އެންމެ ބޮޑު އަދި އެންމެ އީޖާދީ ބިންހިއްކުމުގެ މަޝްރޫއަށް ވެގެންދާނެ އެވެ. އެޗްޑީސީން ބުނިގޮތުގައި ރަސްމާލެ ތަރައްގީކުރާނީ ތިމާވެއްޓާ ރައްޓެހި ވަސީލަތްތަކާއެކު، އިޔާދަކުރަނިވި ހަކަތައިގެ ނިޒާމުތަކާއި، ގަސްގަހާގެހީގެ ސަރަޙައްދުތަކާއި، ތިމާވެށްޓަށް ކުރާ އަސަރު ކުޑަކުރުމަށް ސްމާޓް ޓެކްނޮލޮޖީ ބޭނުންކޮށްގެންނެވެ. 65،000 ހައުސިންގ ޔުނިޓާއި އެކު، މި އީކޯ-ސިޓީގައި އާންމު ޕާކުތަކާއި ވިޔަފާރި ސަރަޙައްދުތައް ހިމެނޭނެ އެވެ. އަދި މީގެ މަގްސަދަކީ ރައްޔިތުންނަށް އެއް މާޙައުލެއްގައި ދިރިއުޅެ، މަސައްކަތްކޮށް، ކުރިއެރުން ހޯދޭނެ އަމިއްލައަށް ފުދުންތެރި މުޖުތަމައުއެއް އުފެއްދުން ކަމަށް އެޗްޑީސީން ބުނެފައިވެ އެވެ.
ފަރުކޮޅުފުށި ތަރައްގީކުރުމަށް އެޗްޑީސީން އެކުލަވާލާފައިވާ މަޝްރޫއުގެ ކުރެހުމެއް---
ހުޅުމާލޭގެ ދެވަނަ ފިޔަވަހި ހިއްކުމުގެ މަޝްރޫއުގައި، އެ ސަރަހައްދު ފަރުކޮޅުފުށި ހިމަނާފައިވާއިރު، އެޗްޑީސީން އިފްތިތާހުކުރި ޕްލޭންގެ ތެރޭގައި ފަރުކޮޅުފުށި ތަރައްގީކުރަނީ ލަގްޒަރީ ލިވިންގ ސްޕޭސްއެއްގެ ގޮތުގަ އެވެ. އެތަން ވެގެންދާނީ ރިސޯޓް ސްޓައިލަށް ގާއިމްކޮށްފައިވާ ރެސިޑެންޝަލް ސަރަހައްދަކަށް ކަމަށް އެޗްޑީސީން ބުނެ އެވެ. އެގޮތުން އެ ސަރަހައްދުގައި ފަސް ތަރީގެ ލަގްޒަރީ ހޯޓަލަކާއި، އިންޑޯ ސްޕޯޓް ކޮމްޕްލެކްސް އަދި، އެހެނިހެން ވެސް ލަގްޒަރީ ޚިދުމްތައް ލިބެން ހުންނާނެ ކަމަށް އެ ކުންފުނިން ބުނެފައިވެ އެވެ.
މީގެ އިތުރަށް ވެއާހައުސަކާއި، އެސްއެމްއީ އިމާރާތެއް، އަދި ހިސްޓޮރިކަލް އިމާރާތަކާއި، ޓުއަރިޒަމް ޕްރޮޖެކްޓުތައް ވެސް މީގެ ތެރޭގައި ހިމެނެ އެވެ.