އަޅުގަނޑު ވަރިވީ ކޯޓަށް ގޮސްގެންނެވެ. ކޯޓަށްދާންޖެހުނީ އަންތބަކަށް އަދާކޮށްދޭންޖެހޭ އެއްވެސް ޙައްޤުެއް އަދާކޮށްނުދީ 6 މަސްދުވަސްފާއިއތުވިއިރު އެކުގައި އެއްދާން ނުކުރާތާވެސް 4 މަސްވުމުން އަނިޔާލިބެން އިންނަން ބޭނުންނުވެގެންނެވެ. އެކަންކަމަށް ކެތްނުކުރެވިގެންނެވެ.
ކޯޓުން ކައިވެނި ރޫޅާލައިދިނުމުން އަޅުގަނޑާއި އެކުވެރިންނާއި އަދި ޢާއިލާއާއިމެދުވެސް މައްސަލަޖެހޭފަދަ ސިއްރުތައް އެބަހާމަކުރެއެވެ. އެވާހަކަތައް ބުނެވުނީ އެކުގައި އުޅެވުނުއިރު ކުރެވުނު އިތުބާރުންނެވެ. އެގޮތަށް ސިއްރުތައް ހާމަކުރުން ދީނުގައި ހުއްދަތޯ؟
ސުވާލުގެ ޖަވާބަކަށް ފުރަތަމަ ބުނެލަން އޮތީ ނަޞޭޙަތުގެ ބަސްކޮޅެކެވެ. ކިތަންމެ ބޮޑަށް މީހަކަށް އިތުބާރުކުރެވުނަސް ސިއްރުތައް ހާމަނުކުރާށެވެ. ހާމަކުރެވޭނަމަ ގިނަ ފަހަރަށް އޮންނާނީ ހިތާމަކުރަންޖެހިފައެވެ. ތިރީގައިވާ ލިޔުންވެސް ވިދާޅުވެލައްވާށެވެ!
ކައިވެނި ރޫޅެން ބޭނުންނުވި ނަމަވެސް ކައިވެންޏަކީ ރޫޅޭ އެއްޗެކެވެ. އެކަކު ދަމަހައްޓަން ހުރިނަމަވެސް އަނެކަކު ދަމަހައްޓަން ބޭނުންނުވާ ޙާލަތުގައި ކައިވެނި ރޫޅިގެންދާއިރު އެކަކު ވާނީ އެކަމާއި ދެރަވެ ހިތާމަކުރާނެ މީހަކަށެވެ. އެޙާލަތުގައި ރުޅިވެސް އައުދެވޭނެއެވެ. އެހެންކަމުން އެޙާލަތުގައިވެސް ވިސްނައިލަންޖެހޭނެ ކަންކަން އެބަހުއްޓެވެ.
އަބަދުވެސް ބުނާފަދައިން ކޮންމެ ކައިވެންޏަކީވެސް ވެވޭ އަހުދުނާމާއެކެވެ. އެއަށް ޢަމަލުކުރުން ލާޒިމް އަހުދުނާމާއެކެވެ. އެ އަހުދުނާމާގެ ބައެއް މާއްދާތަކަކީ އަހުދުނާމާ އުވައިލި ނަމަވެސް ދެމަފިރިން ނުވަތަ ދެމަފިރިންކުރެ އެކަކު ނަމަވެސް ދިރިތިބިހާ ދުވަހަކަށް ދެމިގެންވާނެ މާއްދާތަކެކެވެ. އެއީ އެއްވެސް ހިސާބަކުން އުވައި ނުލެވޭނެ މާއްދާތަކެކެވެ. މުޅި އުމުރަށް ދަމހައްޓަން ޖެހޭނެ ކަންތައްތަކެކެވެ.
އެއިގެ ތެރެއިން އެއްކަމަކީ އަނެކާގެ ދިރިއުޅުމުގެ ސިއްރުތަކާއި ހަށިގަނޑުގެ އެތެރެފުށާއ ބޭރުފުށުގައި ހިމެނިގެންވާ ސިއްރުތަކެވެ. ވީމާ ކޮންމެ ފަދަ ސަބަބެއް މެދުވެރިވެގެން ދެމަފިރިން ވަކިވާން ޖެހުނު ނަމަވެސް އަނެކާގެ އުނިސިފަތަކާއި އައިބު ކަންކަން އެއްވެސް މީހަކަށް ކިޔައިދީ ހާމަކޮށްގެން ނުވާނެއެވެ. ފަހުން އިތުރު މީހަކާއި ކައިވެނިކުރިނަމަވެސް އެމީހަކަށްވެސް ކިޔައިދީގެންނުވާނެއެވެ.
ދެމަފިރިންގެ މެދުގައި ވަރަށް ގިނަ ވާހަކަތައް ދެކެވިފައި ހުންނާނެއެވެ. އެއިގެ ތެރޭގައި ބޮޑެތި ސއްރުތައްވެސް ހިމެނޭނެއެވެ. އަނެކާއާއިމެދު އެހެން މީހުންގެ ހިތުގައި ނަފްރަތު އުފެދޭނެ ފަދަ އެއްވެސް ކަމެއްގެ ވާހަކަ ބޭޒާރުކުރުން ހުއްދައެއް ނޫނެވެ.
އެކަންކަން ކޮށްފިނަމަ އެކުރެވެނީ ފާފައެކެވެ. ސަބަބަކީ ކައިވެނީގެ ފުރަތަމަ ޝަރުޠުތަކުގެ ތެރޭގައި ހިމެނޭ އެއްކަމަކީ އެކަކު އަނެކެއްގެ ސިއްރުތައް ހިފެހެއްޓުމެވެ. ވީމާ ކައިވެނިކޮށްގެން އެކުގައި އުޅެފައި ކައިވެނި ރޫޅައިލުމަކުން ކައިވެނީގެ މުއްދަތުގައި ދެމަފިރިންގެ މެދުގައި ކުރެވުނު ކަންކަމާއި ދެކެވުނު ވާހަކަތަކާއި ފެނުނު ކަންކަމާއި އިވުނު އަޑުތައް ބޭޒާރުކުރުމުގެ ހުއްދަ ހަމައެކަކަށްވެސް ލިބިގެނެއް ނުދެއެވެ.
އެހެންކަމުން ޢިލްމުވެރިން ބަޔާން ކުރައްވާ ގޮތުގައި މީހަކު ސުވާލުކޮށްފިނަމަ، އޭނާއަކީ ރުޅިގަދަ، ނުވަތަ ރުޅި މަޑު މީހެއްކަމަށް ބުނެވިދާނެއެވެ. އެއީވެސް މީހަކު ސުވާލުކޮށްފިނަމައެވެ. މީހަކު ސުވާލުކުރިނަމަވެސް އޭނާގެ ހަށިގަނޑުގެ ސިފަ ނުވަތަ އެއްވެސް ޢައިބުކަމެއްގެ ވާހަކަ ދައްކައިގެން ނުވާނެއެވެ. އެކަމެއް އެހެން ބައަކަށް އެނގުމުން އޭނާ ދެރަވާނެ އެއްވެސް ކަމެއްގެ ވާހަކަ ދައްކައި ބޭޒާރުކޮށްގެން ނުވާނެއެވެ.
ކައިވެނި ރޫޅެން ޖެހުނު ނަމަވެސް އަދި ދެ މީހުންނަކީ ދުރުގައި ތިބޭނެ ދެ މީހުން ކަމުގައިވީނަމަވެސް އެއްވެސް ޙާލެއްގައި ދެމީހުންނަކީ ދުޝްމިނުން ކަމުގައިވެގެން ނުވާނެއެވެ. ދެމީހުންވެސް ވާންޖެހޭނީ ހަމަ އެކުވެރިން ކަމުގައެވެ. އެކަކު އަނެކަކަް ހެޔޮ އެދޭ މީހެއް ކަމުގައެވެ. އެއްވެސް ޙާލެއްގައި ދެ ހަތުރުންނަށް ބަދަލުވެގެން ނުވާނެއެވެ.
--އިސްލާމީ ތިލަފަތުގެ ދަރުސަކުން