ލޭނު އަޅައިގެން މަސްވެރިކަން ކުރަން ހުޅުވައިލަން ނިންމެވި ނިންމެވުމަށް އަމަލުނުކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަށް ކުރީގެ ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.
ރާއްޖޭގައި ލޭނު މަސްވެރިކަން ކުރަން ހުޅުވައިނުލުމަށް ރައީސުލްޖުމްހޫރިއްޔާ މިއަދު ނިންމެވިއިރު، ލޭނު މަސްވެރިކަން ކުރަން ހުއްދަ ނުދިނުމަށް ބައެއް ފަރާތްތަކުން ގޮވާލަމުންދާ ދަނޑިވަޅެއްގައެވެ.
ލޭނު އަޅައިގެން މަސްވެރިކަންކުރަން ހުޅުވާލަން ނިންމެވި ނިންމެވުމަށް އަމަލުނުކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވުމުން ކުރީގެ ރައީސް މުހައްމަދު ނަޝީދު ވަނީ ރައީސުލްޖުމްހޫރިއްޔާއަށް މަރުހަބާ ވިދާޅުވެފައެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި މުޙައްމަދު ނަޝީދު ވިދާޅުވީ ލޭނު މަސްވެރިކަމަށް ހުއްދަ ދިންނަމަ ބައިނަލްއަޤްވާމީ ބާޒާރުގައި ރާއްޖޭގެ މަސްވެރިކަމަށް ލިބިފައިވާ އިތުބާރާއި ޤަދަރު ވެއްޓި، ފަތުރުވެރިކަމުގެ ދާއިރާއަށްވެސް އެކަމުގެ ނޭދެވޭ އަސަރުކުރާނެކަމަށެވެ. އަދި މިކަމާއި ގުޅިގެން ރައީސުލްޖުމްހޫރިއްޔާ ނިންމެވީ، ނިންމެވެން އޮތް އެންމެ ރަނގަޅު ނިންމުންކަމަށްވެސް ރައީސްަ ނަޝީދު ވިދާޅުވިއެވެ.
ރައީސް ނަޝީދުގެ ޓްވީޓްގައި ވިދާޅުވީ ރާއްޖޭގައި ދޮށީގެ މަސްވެރިކަން ކުރާއިރު، ރާއްޖެއަކީ އެންމެ ދެމެހެއްޓެނިވި ގޮތެއްގައި މަސްވެރިކަންކުރާ ޤައުމުކަމަށެވެ. އަދި ވިލާތުގެ ޤައުމުތަކުން ދާ އަޅައިގެން ކަނޑުގައި އޮންނަހާ އެއްޗެއް ނަގަމުންދާއިރު، ރާއްޖެފަދަ ދެމެހެއްޓެނިވި މަސްވެރިކަމެއް ކުރާ ޤައުމަކުން ޔޫރަޕުން އެކްސްޕޯޓްކުރާ މަހުން ޑިއުޓީ ނެގުން ބަދަލުކުރަންޖެހޭކަމަށެވެ.