ކޮންމެ ދެމަފިރިއަކުވެސް އެންމެ ބޮޑަށް އެދޭނެ ކަމަކީ އެދެމީހުންގެ ޒަވާޖީ ޙަޔާން ކާމިޔާބުވުމެވެ. އުފާވެރިކަމުގައި ދިރިއުޅެވުމެވެ. ތަނަވަސްކަން އަންނާނީވެސް އުފާވެރިކަމުގެ ފަހަތުންނެވެ. ސަބަބަކީ ތަނަވަސްކަން ލިބިފައިވީނަމަވެސް އުފާވެރިކަން ނެތްނަމަ އެއީ "ވާގިނެތިފައިވާ" މިހާރުގެ ބަހުރުވައިންނަމަ ޕެރެލައިޒްވެފައިވާ ޒަވާޖީ ޙަޔާތަކަށްވާތީއެވެ.  
ޒަވާޖީ ޙަޔާތް އުފާވެރިކުރަން ވިސްނާއިރު ފުރަތަމަ ކަމަކީ ޒަވާޖީ ޙަޔާތް ކާމިޔާބުކުރުމެވެ. ޒަވާޖީ ހަޔާތް ކާމިޔާބުވުމާއި ނުވުން އޮތީ އެކަކު އަނެކަކަށް މާފަށް އެދެން ކެރޭ މިންވަރެއްގެ މައްޗަށްކަން އެއީ އެންމެ ޔަޤީން ތަޖުރިބާއެވެ. ޒަވާޖީ ޙަޔާތުގެ އުފާވެރިކަން އެންމެ ބޮޑަށް ޙާޞިލުކުރެވިފައިވަނީ މާފަށް އެދުން ގިނަކުރި މިންވަރެއްގެ މައްޗަށެވެ. މާފަށް އެދެން އިސްނަގާ ދެމަފިރިންގެ މެދުގައި ޙައްލު ނުކުރެވޭނެ އެއްވެސް ކަމެއް ނޯންނާނެކަން އެއީ ހަމަ ޔަޤީންކަމެކެވެ. ޔަޤީން ތަޖުރިބާއެކެވެ. ޒަވާޖީ ޙަޔާތް އުފާވެރިކުރުމުގެ ތަޅުދަނޑިއަކީ މާފަށް އެދެން އަވަސްވެގަތުންކަމަށް ބުނެވެނީ މިފަދަ ސަބަބުތަކަށްޓަކައެވެ.  
ފިރިމީހާއަށް ކުށެއް ކުރެވުނު ނަމަވެސް އަދި އަނބި މީހާއަށް ކުށެއް ކުރެވުނު ނަމަވެސް ކުށަށް އިޢްތިރާފްވެ މާޢާފަށް އެދުމަކީ ދެމަފިރިންގެ މެދުގައި އިތުބާރު ބޮޑުވެ، ލޯބި އިތުރުވެ އަދި ގުޅުން ވެސް ބަދަހިވާ ކަމެކެވެ. ދޮގު ހަދައި ކުށުން ރެކެން މަސައްކަތް ކުރާނަމަ އިތުބާރު ގެއްލޭނެއެވެ. އަދި ގުޅުން ދާނީ ހީނަރުވަމުންނެވެ. ލޯބި ނަފްރަތަށްވެސް ބަދަލުވަމުންނެވެ.  
ކަންކަން ކާމިޔާބު ކުރެވޭނީ ކުށެއް ކުރެވިއްޖެ ނަމަ ކުށަށް އިޢްތިރާފްވެ އެކަމަކުން ގެއްލުން ލިބުނު ބައެއްގެ ކިބައިން މަޢާފަށް އެދެން ކެރޭ މީހުންނަށެވެ! އަމިއްލަ ދިރިއުޅުންވެސް ކާމިޔާބު ކުރެވޭނީ ކުށެއް ކުރެވުމުން ކުށަށް އިޢްތިރާފްވެ މަޢާފަށް އެދެން ކެރޭ މީހުންނަށެވެ.  
ކުށެއް ކުރެވުމުން ކުށަށް އިއްތިރާފްވެ މަޢާފަށް އެދޭނަމަ އެކަމުން އަނގައިދެނީ އެމީހަކީ ޒިންމާދާރު މީހެއް ކަމެވެ. އެއީ ފިނޑި އަމަލެއް ކަމަށް ބައެއް މީހުންނަށް ޤަބޫލު ކުރެވުނު ނަމަވެސް އެއީ ރަނގަޅު ވިސްނުމެއް ނޫނެވެ. ކުށަށް އިއްތިރާފްވެ މޢާފަށް އެދުމުން ދައްކައިދެނީ އެމީހެއްގެ ހަރުދަނާ ކަމެވެ.  
ފާފައެއް ކުރެވުނު ނަމަވެސް އަވަހަށް ތައުބާވުމަކީ ހަރުދަނާ މުސްލިމުންގެ ސިފައެކެވެ. ތައުބާ ނުވުމުން އަނގައިދެނީ އެމީހެއްގެ ކިބައިގައި އެއްވެސް ހަރުދަނާ ކަމެއް ނެތްކަމެވެ. ގިނަގިނައިން ތައުބާވާން ޖެހެނީ މި ސަބަބަށްޓަކައެވެ. ކުށެއް ކުރެވިއްޖެނަމަ އަވަހަށް ތައުބާވުމުގެ މަތިވެރިކަމުގެ ވާހަކަ އަބަދުވެސް މިގެންދަނީ ކިޔައިދެމުންނެވެ.
ފާފައެއް ކޮށްފިނަމަ އެމީހަކު ތައުބާވޭތޯ ބައްލަވަން ފަތުގައި ނުލިޔުއްވަވައި މަލާއިކަތުން 6 ގަޑިއރު އިންތިޒާރު ކުރައްވަވާކަމަށާއި ލިޔުއްވަވާނީ 6 ގަޑިއިރުވާއިރުވެސް ތައުބާ ނުވުމުން ކަމަށް އޮވެއެވެ. މިކަމުން އެކަނިވެސް ކުށެއް ކުރެވިއްޖެ ނަމަ ވީ އެންމެ އަވަހަކަށް ތައުބާވެ ހެޔޮ އަމަލު ކުރުން އިތުރުކުރުމުގެ މުހިންމުކަން އެނގިގެންދެއެވެ.  
މިކަމުން ކޮންމެ ދެމަފިރިއަކު ވެސް ޙާޞިލުކުރަން ޖެހޭ ފިލާވަޅެއް ވެއެވެ. އެއީ ކުށެއް ކުރެވިއްޖެ ނަމަ ވީ އެންމެ އަވަހަކަށް މަޢާފަށް އެދުމާއި ކުރެވުނު ކުށުގެ ކައްފާރާއެއްގެ ގޮތުގައި އިޚްލާޞްތެރިކަން އިތުރުކުރުމެވެ. ލޯބި ދިނުން އިތުރުކުރުމެވެ. އިސްލާމް ދީނުގައި ހުރި މިފަދަ މުހިންމު ފިލާވަޅުތަކުން ޢިބްރަތް ޙާޞިލުކޮށް އަމަލުކުރާނަމަ ހަޔާތުގައި އަބަދުވެސް ދާނީ އިތުރު ކުރިއެރުން ލިބެމުންނެވެ! އިން ޝާ ﷲ! 
އަދިވެސް ވިސްނައިލާށެވެ! މިޘާލަކަށް އަނެކާ ހިތް ނުރުހޭނެކަމެއް ކުރެވުނީއެވެ. އެކަން ކޮންމެވެސް ގޮތަކުން އެނގުމުން މާފުކުރަން އުނދަގޫވާނެއެވެ. ޖެހޭނެ މައްސަލަތައްވެސް ގިނަވާނެއެވެ. ވީމާ އެހެން މީހެއްގެ ކިބައިން ނުވަތަ އެނޫންވެސް ގޮތަކުން އަނެކާއަށް އެނގުމުގެކުރިން އަވަހަށް މާފަށް އެދޭށެވެ. އެއިރުން މައްސަލަ ޙައްލުވެ އުފާވެރިކަން ލިބުމުގެ ފުރުޞަތު ބޮޑުތަނުން ބޮޑުވެގެންދާނެއެވެ. އިން ޝާ ﷲ  
ޢަޖުމަ ބަލައިލަން ނަމަވެސް ނިކަން ދެމަފިރިންވެސް މިބުނި މަގުން ވާދަކޮށްބަލާށެވެ! ދެމަފިރިންގެ ދެމެދަށް ވަދެވޭނެ ހަމައެކަކުވެސް ނުހުންނާނެއެވެ. އިން ޝާ ﷲ
 
- އިސްލާމީ ތިލަފަތުގެ ދަރުސަކުން