މި ސަރުކާރުގެ 'އާއިލީ ބޯހިޔާވަހިކަން' ޕްރޮގްރާމުގައި ހިމެނޭ ޚާއްސަ ކެޓަގަރީތަކަށް ފުލެޓަށް ކުރިމަތިލެވޭ ޝަރުތުތައް އިސްލާހުކޮށް، އާއްމުކޮށްފިއެވެ. ހައުސިން މިނިސްޓްރީން މިއަދުކުރި އިއުލާނުގައި ވަނީ ބޯހިޔާވަހިކަން ފޯރުކޮށްދިނުމުގައި ޚާއްސަ އިސްކަންދެވޭ ކެޓަގަރީތަކުގެ ލިސްޓުގައި ހިމެނޭ އިދާރާތަކާއި މުއައްސަސާތަކުގެ ކެޓަގަރީތަކަށް އެދި ހުށަހަޅާ ފަރާތްތަކުން އުސޫލުގައިވާ ޝަރުތުތަކުގެ އިތުރުން ފުރިހަމަވާންޖެހޭ ޝަރުތުތައް އިސްލާޙުކޮށް އާއްމުކޮށްފައެވެ. އަދި ކޮންމެ ކެޓަގަރީއަކަށް ދޫކުރުމަށް ކަނޑައަޅައިފައިވާ ފުލެޓުގެ އަދަދު ވެސް އާއްމުކޮށްފައިވެއެވެ. އެގޮތުން ޚާއްސަ ކެޓަގަރީގައި 1،000 ފުލެޓު ހިމެނެއެވެ. އޭގެ ތެރޭގައި: ޖުޑިޝަރީގެ މުވައްޒަފުންނަށް 100 ފުލެޓު ފުލުހުންނަށް 100 ފުލެޓު އެމްއެންޑީއެފަށް 100 ފުލެޓު ސިވިލް ސާވިސްގެ މުވައްޒަފުންނަށް 200 ފުލެޓު ކަރެކްޝަނަލް ސާވިސަސްއަށް 100 ފުލެޓު އެހެނިހެން ދައުލަތުގެ އިދާރާތަކަށް 400 ފުލެޓު މިއިން ކޮންމެ ގިންތިއެއްގެ މުވައްޒަފުން ވެސް ފުލެޓަށް ލުމުގައި ބަލާނެ އަސާސީ ޝަރުތުތަކުގެ ތެރޭގައި ތިން ކަމެއް ހިމެނެއެވެ. އެއީ: މާލޭ ސިޓީގައި އާއިލާ ބިނާކޮށްފައިވާ މީހަކަށްވުން. މަދުވެގެން މެދުނުކެނޑި ވޭތުވެދިޔަ 1 އަހަރު އެ އިދާރާއެއްގައި ޚިދުމަތްކޮށްފައިވުން. ބޯހިޔާވަހިކަން ހަވާލުކުރާ ތާރީޚުން ފެށިގެން އެ އިދާރާއަކުން ކަނޑައަޅާ ގޮތެއްގެމަތިން ވަޒީފާ އަދާކުރުމަށް އެއްބަސްވުން. އެހެނިހެން ދައުލަތުގެ އިދާރާތަކުގެ ތެރޭގައި މުލިއާގެ އަދި ހިލާލީގޭ މުވައްޒަފުން ހިމެނޭހެން ރައީސް އޮފީހާއި، މަޖިލީހާއި، އޭޖީ އޮފީސް، ޖޭއެސްސީ، އީސީ، އޭސީސީ ފަދަ މުހިންމު އިދާރާތައް ހިމެނެއެވެ. ހައުސިން މިނިސްޓްރީއިން ވަނީ 'ބޯހިޔާވެހިކަން އެންމެންނަށް' ސިޔާސަތުގެ ދަށުން 'އާއިލީ ބޯހިޔާވަހިކަން' ޕްރޮގްރާމުގެ ދަށުން މާލޭގައި ދިރިއުޅޭ ރައްޔިތުންނަށް، ދިރިއުޅުމަށް ބިމާއި ފްލެޓަށް އެދި ހުށަހެޅުމުގެ ފުރުސަތު މިހާރު އިތުރުކޮށްފައި ވާކަމަށް ބުނެފައެވެ. އެގޮތުން ގޯއްޗާއި ފްލެޓަށް އެދި ހުށަހެޅުން އަންނަ އޭޕްރީލް މަހުގެ 30ވާ ބުރާސްފަތި ދުވަހުގެ 23:59ގެ ނިޔަލަށް މިހާރު ވަނީ އިތުރުކޮށްފައެވެ. https://sun.mv/218415 ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ބޯހިޔާވަހިކަމުގެ ފުރަތަމަ ސްކީމަށް ހުށަހެޅުމުގެ ފުރުސަތު ހައުސިން މިނިސްޓްރީއިން ހުޅުވާލީ ނިމިދިޔަ ޖަނަވަރީ މަހުގެ 18 ވަނަ ދުވަހެވެ. އެ ޕްރޮގްރާމުގެ ދަށުން 7،900 ފްލެޓާއި 15،000 ގޯތި ދޫކުރަން ސަރުކާރުން ވަނީ ނިންމާފައެވެ. ޖުމްލަ 7،900 ފްލެޓު ދިނުމަށް ނިންމާފައި ވާއިރު އޭގެތެރެއިން 4،000 ފްލެޓު ދިނުމަށް ހަމަޖެހިފައި ވަނީ މާލޭގެ ރަށްވެހިންނަށެވެ. އަދި މާލޭގައި ރަށްވެހިވެފައިނުވާ މާލޭގައި ދިރިއުޅެމުން އަންނަ މީހުންނަށް 1،500 ޕްލެޓު ދިނުމަށް ނިންމާފައި ވާއިރު ބާކީ 2،400 ފްލެޓު ދިނުމަށް ނިންމާފައި ވަނީ ސަރުކާރުން ކަނޑައަޅާފައިވާ ޚާއްސަ ކެޓަގަރީތަކަށެވެ.