ރާއްޖޭގެ ބޭރުގެ ދަރަނި ދެއްކުމަށް އެއްވެސް ކަންބޮޑުވުމެއް ނެތް ކަމަށާއި މިއަދު ދައްކަން ޖެހުނަސް ފައިސާ އެބަހުރި ކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، 500 މިލިއަން ޑޮލަރުގެ ސުކޫކް ދެއްކުމަށް އެއްވެސް ކަންބޮޑުވުމެއް ނެތް ކަމަށާއި މިއަދު އެ ފައިސާ ދައްކަން ޖެހުނަސް އެއްވެސް ދަތި ކަމެއް ނެތި ފައިސާ ދައްކާނެ ވަރަށް ފައިސާ އެބަހުރި ކަމަށެވެ.
"މިހާރު އަޅުގަނޑުމެންގެ އަތުގައި ރައްކާ ކޮށްފައި އެބަހުރި 650 މިލިއަން ޑޮލަރު. 500 މިލިއަން ޑޮލަރުގެ ސުކޫކްގެ ފައިސާ ދައްކާފައި ބާކީ 150 މިލިއަން ޑޮލަރު ހުންނާނެ،" ރައީސް މުއިއްޒު ވިދާޅުވިއެވެ.
މި ފައިސާގެ ތެރެއިން ސޮވެރިން ޑިވެލޮޕްމަންޓް ފަންޑުގައި (އެސްޑީއެފް) 320 މިލިއަން ޑޮލަރު ހުންނާނެ ކަމަށާއި ޔޫސަބަލް ރިޒާވްގައި 330 މިލިއަން ޑޮލަރު ރައްކާ ކޮށްފައި އެބަހުރި ކަމަށް ރައީސް މުއިއްޒު ވިދާޅުވިއެވެ. އެމަނިކުފާނު ވިދާޅުވީ ސުކޫކް ދައްކަން އޮތީ އަންނަ އޭޕްރީލް މަހުގެ 8ވަނަ ދުވަހު ކަމަށެވެ. އެ ދުވަހަށް އެ ފައިސާ ދައްކާނެ ކަމުގެ ޔަގީންކަން ރައީސް ވަނީ ދެއްވަވާފައެވެ.
"އަޅުގަނޑުމެންގެ ގްރޮސް ރިޒާވްގައި މިހާރު ރާއްޖޭގެ ތާރީހުގައި ދުވަހަކުވެސް ގްރޮސް ރިޒާވް މައްޗަށް ނުދާ ވަރަށް ވަނީ ގެންދެވިފައި 1.27 ބިލިއަން ޑޮލަރު. ރިޔާސީ ބަޔާނުގައިވެސް އަޅުގަނޑު ދެންނެވި އަދަދު (1.13 ބިލިއަން ޑޮލަރު) އެއީވެސް ރިކޯޑެއް. އެއަށްވުރެ ވެސް މައްޗަށް ރިޒާވް މައްޗަށް ގޮސްފައި މިވަނީ،" ރައީސް މުއިއްޒު ވިދާޅުވިއެވެ.
ރައީސްގެ ވިދާޅުވީ އެ ފައިސާތަކަކީ މިހާރު މެދުއިރުމަތީގައި ހިނގަމުންދާ ހަނގުރާމައާ ގުޅިގެން ކުރިމަތިވެދާނެ ކަންކަމަށް ބޭނުން ކުރަން ވެސް ހުންނާނެ ފައިސާ ކަމަށް ވަނީ ވިދާޅުވެފައެވެ.