ރާއްޖޭގެ އެންމެ ބޮޑު ގޭމިން ޕްލެޓްފޯމް، ދިރާގު ގޭމާސް ގިލްޑް (ޑީޖީޖީ)ން ކުރިއަށްގެންދާ 'ރޯދަ ކުއެސްޓް' ކާމިޔާބުކަމާ އެކު ފަށައިފި އެވެ.
ވީ ކިހިނެއް؟ - އަންނަ ހޯމަ ދުވަހުގެ ނިޔަލަށް ކުރިއަށްގެންދާ މި ހަރަކާތަކީ ގޭމިން ކޮމިއުނިޓީއަށް އަމާޒުކޮށްގެން ތަފާތު ގޭމިން ތަޖުރިބާތަކެއް ފޯރުކޮށްދިނުމަށް ބާއްވާ ހަރަކާތެކެވެ.
ތަފްސީލް - މި ފޯރިގަދަ މުބާރާތުގައި މިހާތަނަށް 200އަށް ވުރެ ގިނަ ކުޅުންތެރިން ވަނީ ބައިވެރިވެފަ އެވެ.
މި މުބާރާތުގެ ތެރޭގައި ހިމެނެނީ މަގުބޫލު ގޭމްތައް ކަމަށްވާ ބްރޯލްހާލާ، މޮބައިލް ލެޖެންޑްސް: ބޭންގް ބޭންގް، އީއޭއެފްސީ 26 އަދި ޓެކެން 8 ފަދަ ގޭމްތަކެވެ. 
ކޮންމެ ރެއަކު ވެސް ރޭގަނޑު 9 އިން މެންދަމު 12އަށް ކުރިއަށްގެންދާ މި ހަރަކާތަކީ، ގޭމް ކުޅުމަށް ޝައުގުވެރިވާ ފަރާތްތައް އެއްތަނަކަށް ޖަމާވެ، ވާދަވެރި މާހައުލެއްގައި ހުނަރު ދައްކާލުމަށާއި އިޖުތިމާއީ ގުޅުން ބަދަހިކުރުމަށް ހުޅުވާލާފައިވާ ފުރުސަތެކެވެ.
މި އިވެންޓުގެ ބައިވެރިންނަށް، އިވެންޓުގެ ޕާޓްނަރުން ކަމަށްވާ މިނިސޯ، ޝީޝާ، މެގަޗިޕް އަދި ވިލާމާޓުން ހުށަހަޅާފައިވާ ހާއްސަ އިނާމުތަކެއް ހޯދުމުގެ ފުރުސަތު ލިބޭނެ އެވެ. މީގެ އިތުރުން، އިވެންޓަށް ޒިޔާރަތްކުރާ ފަރާތްތަކަށް ހާއްސަކޮށްގެން ކުރިއަށްގެންދާ އެކި ހަރަކާތްތަކުގައި ބައިވެރިވެގެން ވެސް އަގުހުރި އިނާމުތަކެއް ހޯދުމުގެ ފުރުސަތު ވަނީ ހުޅުވާލާފަ އެވެ.
މި މުބާރާތްތަކުގައި ބައިވެރިވާން ބޭނުންވާ ފަރާތްތަކަށް އޮންލައިންކޮށް ރަޖިސްޓްރީ ކުރެވޭނެ އެވެ. އަދި އިވެންޓަށް ޒިޔާރަތްކުރާ ފަރާތްތަކަށް އެ ތަނުގައި ތައްޔާރުކޮށްފައިވާ ގޭމް ސްޓޭޝަންތަކުގައި ހިލޭ ގޭމް ކުޅުމުގެ ފުރުސަތު ވެސް ލިބިގެންދާނެ އެވެ.
ފާހަގަކޮށްލެވޭ - ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމަށްވާ ޑީޖީޖީން އަންނަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއް ކޮށް، އަންނަން އޮތް ޖީލުތަކުގެ ގޭމިން ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.