ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމަށްވާ ދިރާގު ގޭމާސް ގިލްޑް (ޑީޖީޖީ) އިން ކުރިއަށްގެންދާ "ރޯދަ ކުއެސްޓް" ކާމިޔާބުކަމާއެކު ފަށައިފިއެވެ. އަންނަ ހޯމަ ދުވަހުގެ ނިޔަލަށް ކުރިއަށްދާ އެ ހަރަކާތަކީ ގޭމިން ކޮމިއުނިޓީއަށް އަމާޒުކޮށްގެން ތަފާތު ގޭމިން ތަޖުރިބާތަކެއް ފޯރުކޮށްދިނުމަށް ދިރާގުން ބާއްވާ ހަރަކާތެކެވެ. ދިރާގުން ބުނި ގޮތުގައި އެ ފޯރިގަދަ މުބާރާތުގައި 200 އަށްވުރެ ގިނަ ކުޅުންތެރިން ވަނީ ބައިވެރިވެފައެވެ. އެ މުބާރާތުގެ ތެރޭގައި މަގުބޫލު ގޭމްތައް ކަމަށްވާ ބްރޯލްހާލާ، މޮބައިލް ލެޖެންޑްސް: ބޭންގް ބޭންގް، އީއޭއެފްސީ 26 އަދި ޓެކެން 8 ފަދަ ގޭމްތައް ހިމެނޭ ކަމަށް ދިރާގުން ބުނެއެވެ. އަދި އެ ހަރަކާތް ފަރުމާކޮށްފައިވަނީ ހުރިހާ ފެންވަރެއްގެ ގޭމް ކުޅުންތެރިންނަށް ބައިވެރިވެވޭ ފަދަ ގޮތަކަށް ކަމަށް ދިރާގުން ވަނީ ބުނެފައެވެ. ދިރާގުން ބުނީ ކޮންމެ ރެއަކުވެސް ރޭގަނޑު 9:00 އިން މެންދަމު 12:00އަށް ކުރިއަށްދާ އެ ހަރަކާތަކީ ގޭމް ކުޅުމަށް ޝައުގުވެރިވާ މީހުން އެއް ތަނަކަށް ޖަމާވެ، ވާދަވެރި މާހައުލެއްގައި ހުނަރު ދައްކާލުމަށާއި އިޖުތިމާއީ ގުޅުން ބަދަހިކުރުމަށް ހުޅުވާލެވިފައިވާ ފުރުސަތެއް ކަމަށެވެ. އަދި މިއީ ރާއްޖޭގައި ފުޅާވަމުން އަންނަ އީ ސްޕޯޓްސްގެ ސަގާފަތް ތަޖުރިބާ ކުރުމަށް ލިބޭ ރަނުގެ ފުރުސަތެއް ކަމަށް ދިރާގުން ވަނީ ބުނެފައެވެ. ދިރާގުން ބުނީ މި އިވެންޓުގެ ބައިވެރިންނަށް، އިވެންޓުގެ ޕާޓްނަރުން ކަމަށްވާ މިނިސޯ، ޝީޝާ، މެގަޗިޕް އަދި ވިލާމާޓުން ހުށަހަޅާފައިވާ ޚާއްސަ އިނާމުތަކެއް ހޯދުމުގެ ފުރުސަތު ލިބޭނެ ކަމަށެވެ. އަދި އިވެންޓަށް ޒިޔާރަތްކުރާ މީހުންނަށް ޚާއްސަކޮށްގެން ކުރިއަށްގެންދާ އެކި ހަރަކާތްތަކުގައި ބައިވެރިވެގެން އަގުހުރި އިނާމުތަކެއް ހޯދުމުގެ ފުރުސަތު ހުޅުވާލައިފައިވާ ކަމަށް ދިރާގުން ބުނެއެވެ. މި މުބާރާތްތަކުގައި ބައިވެރިވާން ބޭނުންވާ މީހުންނަށް ދިރާގު ގޭމާސް ގިލްޑްގެ ވެބްސައިޓް މެދުވެރިކޮށް ރަޖިސްޓްރީ ކުރެވޭނެ ކަމަށާއި އިވެންޓަށް ޒިޔާރަތްކުރާ މީހުންނަށް އެ ތަނުގައި ތައްޔާރުކޮށްފައިވާ ގޭމް ސްޓޭޝަންތަކުގައި ހިލޭ ގޭމް ކުޅުމުގެ ފުރުސަތު ވެސް ލިބޭނެ ކަމަށް ދިރާގުން ބުނެއެވެ. ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމަށްވާ ޑީޖީޖީން ދަނީ ރާއްޖޭގެ އެކި ކަންކޮޅުތަކުގައި އީ ސްޕޯޓްސް ކުރިއެރުވުމަށް ގިނަ މަސައްކަތްތަކެއްކޮށް، އަންނަން އޮތް ޖީލުތަކުގެ ގޭމިން ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެެވެ. ޑީޖީޖީ އިން ކުރިއަށް ގެންދާ ހަރަކާތްތަކުގެ އެންމެ ފަހުގެ މައުލޫމާތުތައް ވެބްސައިޓް މެދުވެރިކޮށް ލިބޭނެއެވެ.