ދިވެހި މިއުޒިކީ ދާއިރާގައި ފާހަގަކޮށްލެވޭ، ގިނަ ބައެއްގެ ލޯބި ހޯދާފައިވާ މަޝްހޫރު ލަވަކިޔުންތެރިޔާ އިބްރާހިމް ރަޝީދު (ހާބުރި) ކުއްލިއަކަށް ބަލިވެ، އައިޖީއެމްއެޗްގައި އެޑްމިޓްކުރުމާ ގުޅިގެން އޭނާގެ ސަޕޯޓަރުން ކަންބޮޑުވުމެއްގެ ތެރެއަށް ވެއްޓިއްޖެއެވެ. އުމުރުން 79 އަހަރުގެ ހާބުރި އަށް ހޮސްޕިޓަލުގައި ފަރުވާދޭން ފަށާފައިވަނީ ރޭގެ ވަގުތެއްގައެވެ.
އާއިލާއާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ހާބުރި ހޮސްޕިޓަލުގައި އެޑްމިޓްކުރަން ޖެހުނީ ފުއްޕާމޭގައި ފެންހެދުމުގެ ސަބަބުންނެވެ. އޭނާ ބަލިވެ އުޅޭތާ މިހާރު ދުވަސްކޮޅެއް ވެފައިވާއިރު، އައިޖީއެމްއެޗުން ވަނީ އޭނާއަށް ފަރުވާދެމުންދާކަން ކަށަވަރުކޮށްދީފައެވެ. ނަމަވެސް ބައްޔާ ގުޅޭ އިތުރު މައުލޫމާތެއް ހޮސްޕިޓަލުން ހާމަކޮށްފައެއް ނުވެއެވެ.
ހާބުރިއަކީ ރާއްޖޭގެ މިއުޒިކް އިންޑަސްޓްރީގައި މެދުކެނޑުމެއްނެތި 50 އަހަރަށްވުރެ ދިގު މުއްދަތެއްގައި ހިދުމަތްކޮށްފައިވާ ފަންނާނެކެވެ. އަމިއްލަ ހާއްސަ ސްޓައިލެއްގައި ލަވަ ހުށަހަޅައިދޭ ހާބުރި ކިޔާފައިވާ ގިނަ ލަވަތަކަކީ އޭނާ އަމިއްލައަށް ރާގު ހަދައިގެން ނެރެފައިވާ އުފެއްދުންތަކެކެވެ. މީގެ އިތުރުން ބޮޑުބެރުގެ ދާއިރާއިންނާއި ތަފާތު އަލްބަމްތައް ނެރުމުގައި ވެސް އޭނާ ވަނީ ބޮޑެތި ކާމިޔާބީތަކެއް ހޯދާފައެވެ.
އުމުރުން ދުވަސްވީ ނަމަވެސް އޭނާގެ އަޑަށް ބަދަލެއް ނާންނަކަން ގިނަ ބަޔަކު ފާހަގަކުރެއެވެ. މިކަން އެންމެ ބޮޑަށް ފެނިގެންދިޔައީ މީގެ އަށެއްކަ އަހަރު ކުރިން ރާއްޖޭގެ މަޝްހޫރު ބޭންޑެއް ކަމަށްވާ “ޑިންބާ މިއުޒިކް” އާއެކު އޭނާ ކިޔާފައިވާ ރެގޭ ސްޓައިލްގެ ލަވަތަކުންނެވެ. އެ ލަވަތަކަށް ވެސް އާންމުންގެ ބޮޑު ތަރުހީބެއް ލިބިގެންދިޔައެވެ.
ރާއްޖޭގެ މުނިފޫހިފިލުވުމުގެ ދާއިރާގައި އަމިއްލަ މަސައްކަތުން ކުރިއަރައި، އަލިގަދަ ތަރިއެއްގެ ގޮތުގައި ވިދާލި ހާބުރިއަށް އައިޖީއެމްއެޗްގައި ފަރުވާދެމުންދާއިރު، އޭނާގެ ގިނަ އަދަދެއްގެ ފޭނުންނާއި މިއުޒިކަށް ލޯބިކުރާ ފަރާތްތަކުން ދަނީ އޭނާއަށް އަވަސް ޝިފާއަކަށް އެދި ހެޔޮ ދުއާ ކުރަމުންނެވެ. އޭނާގެ ހާލަތު ރަނގަޅުވެ، އަލުން އެނބުރި އައުމަކީ އެންމެންގެ ވެސް އުއްމީދެވެ.