މެދު އިރުމަތީގައި މިވަގުތު ހިނގަމުންދާ ހަނގުރާމައިގެ ސަބަބުން ރާއްޖެއަށް ދުވާލެއްގެ މައްޗަށް ފަތުރުވެރިން އަންނަ އަދަދު 50 އިންސައްތަ ދަށަށް ގޮސްފިއެވެ. އިސްރާއީލުން އިރާނަށް ހަމަލާ ދިނުމާއި ގުޅިގެން މެދުއިރުމަތީގެ މަޝްރަހު މިދިޔަ ހޮނިހިރު ދުވަހު ހޫނުވަމާއި ގުޅިގެން އެ ސަރަހައްދުގެ ބައެއް ވައިގެ ބަނދަރުތައް ވަގުތީ ގޮތުން ވަނީ ބަންދުވެފައެވެ. އޭގެ ސަބަބުން ރާއްޖެ އަންނަން ޝެޑިއުލްކޮށްފައިވާ ގިނަ ފްލައިޓްތަކެއް ވަނީ ކެންސަލްވެފައެވެ. ޓޫރިޒަމް މިނިސްޓްރީގެ ތަފާސް ހިސާބުތަކަށް ބަލާއިރު، ހަނގުރާމަ ފެށުނު ފެބްރުއަރީ 28 ވީ މިދިޔަ ހޮނިހިރު ދުވަހު ރާއްޖެ އައި ފަތުރުވެރިންގެ އަދަދަކީ 8,929 އެކެވެ. އެއާ ޖެހިގެން އާދިއްތަ ދުވަހު 6،440 ފަތުރުވެރިން އައިއިރު އިއްޔެ ރާއްޖެ އައިސްފައި ވަނީ 4,107 ފަތުރުވެރިންނެވެ. މިއީ 50 އިންސައްތަ ދަށް އަދަދެކެވެ. ނިމިދިޔަ އަހަރުގެ ފަހުކޮޅުން ފެށިގެން، ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ ނިސްބަތް ރެކޯޑު އަދަދަކަށް އިތުރުވެ، އެއްދުވަހުން އަނެއްދުވަހަަށް އައީ ރޭކޯޑު ބުރޭކް ކުރަމުންނެވެ. އެގޮތުން މިދިޔަ މަހުގެ 15ގައި އެކަނި ވެސް 11،136 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. https://sun.mv/217956 ނަމަވެސް ހަނގުރާމައިގެ ސަބަބުން މިވަނީ ދުވާލެއްގެ މައްޗަށް އަންނަ ފަތުރުވެރިންގެ އަދަދު ވަރަށް ބޮޑަށް ދަށްވެފައެވެ. ދިވެހިރާއްޖެއަށް ދުވާލަކު އަންނަ ފަތުރުވެރިންގެ ތެރެއިން 35 އިންސައްތަ ފަތުރުވެރިންނަކީ މެދުއިރުމަތީގެ ފަތުރުވެރިން ކަމަށް ވާއިރު، ހަނގުރާމައިގެ ސަބަބުން ދެން އެ އަދަދު ވެސް ދަށްވާނެ ކަމަށާއި އޭގެ އަސަރު ވަރަށް ބޮޑަށް އާމްދަނީއަށް ކުރާނެ ކަމަށް ޓޫރިޒަމް މިނިސްޓަރު ތޯރިގު އިބްރާހީމް ވެސް ވަނީ ވިދާޅުވެފައެވެ. https://sun.mv/218529 މެދުއިރުމަތީގެ ވައިގެ ބަނދަރުތައް ބަންދު ކުރުމާއި ގުޅިގެން މިދިޔަ އާދިއްތަ ދުވަހުން ފެށިގެން ރާއްޖެ އަންނަން އޮތް ފުލައިޓް ތަކުގެ ޝެޑިއުލަށް ބޮޑެތި ބަދަލުތަކެއް އަންނަމުންނެވެ. އެގޮތުން އެދުވަހު އެކަނިވެސް 14 ފުލައިޓެއް ކެންސަލްވިއެވެ. ރާއްޖޭގެ އިގްތިސާދުގެ މައިގަނޑު ސިނާއަތަކީ ފަތުރުވެރިކަމަށް ވާއިރު، މިކަމުގެ ސަބަބުން ސީދާ ގޮތެއްގައި ރާއްޖޭގެ އިގްތިސާދަށް ނޭދެވޭ އަސަރު ކުރާނެކަން، ކަމާއި ބެހޭ ބައެއް ފަރާތްތަކުން އަންނަނީ ބުނަމުންނެވެ. އެގޮތުން ރާއްޖޭގެ އެންމެ ބޮޑު އެއް ޓްރެވަލް ކުންފުނި ކަމަށްވާ އިނާ މޯލްޑިވްސްގެ ސީއީއޯ މުޙައްމަދު ފިރާޤް ވެސް ވަނީ، މިކަމުގެ ކަންބޮޑުވުން ފާޅުކޮށްފައެވެ. އަދި މިފަދަ ހައްސާސް ދަނޑިވަޅެއްގައި ސަރުކާރުގެ އިދާރާތަކާއި ފަތުރުވެރިކަމާއި ޓްރެވަލް ދާއިރާގައި ހަރަކާތްތެރިވާ ފަރާތްތަކާއި ސްޓޭކްހޯލްޑަރުންނާއި އާންމުންގެ އެއްބާރުލުން މުހިންމުކަން ވެސް އޭނާ ވަނީ ފާހަގަކޮށްފައެވެ