ދޭދޭ ގައުމުތަކާ އެކު އޮންނަ ހާއްސަ ގުޅުންތަކަކާ ހެދި ސަރުކާރުގެ އެންމެ މަތީ ވެރިޔާއަށް، ބައެއް ހާލަތްތަކުގައި، އާންމުން އެ ބޭނުންވާ ގޮތަކަށް އަމަލެއްނުކުރެއްވެ އެވެ. ފަހަތުގައި ހުރި ސަބަބުތައް ރަސްމީ ހައިސިއްޔަތެއްގައި ކިޔައެއް ވެސް ނުދެއްވެ އެވެ. އަޅުގަނޑުމެން ކިތައްމެ ވަރަކަށް ހަޅޭއްލަވައި، ފާޑުކިޔައި، ހެއްދެވި ނުހެއްދެވިޔަށް ގޮވިޔަސް މެ އެވެ. 
ބައެއް ފަހަރަށް ސަރުކާރުތަކުން އަޅާ ފިޔަވަޅުތަކުގެ ބޭނުމަކީ ވެރިންގެ އަމިއްލަ މަސްލަހަތޭ ވެސް، އާންމުންނަށް ބުނެވިދާނެ އެވެ. އެކަމަކު އެހެން ބުނާ ހާލަތުގައި އެ ނޫން އެހެން ސަބަބެއް ވެސް އޮވެ އެވެ. ގައުމުގެ މަސްލަހަތު ވެސް ހިމެނެ އެވެ.
މިސާލަކަށް އީރާނުގެ ލީޑަރު އަލީ ހާމަނާއީއަށް އެމެރިކާ އާއި އިޒުރޭލުން ސީދާ ހަމަލާދީ އަވަހާރަކޮށްލުމެވެ. ދިވެހި ސަރުކާރަށް ރަސްމީކޮށް އެކަން ކުށްވެރިއެއް ނުކުރެވުނެވެ. އެކަމަކު ކުރީގެ ރައީސް މައުމޫން އަބްދުލްގައްޔޫމް ވަނީ 'އިހުލާސްތެރި މުސްލިމެއްގެ ހައިސިއްޔަތުން' ކުރީ ދުވަހު އެ ހަމަލާ ކުށްވެރިކުރައްވައިފަ އެވެ. އެއީ ވެސް އެކަން ހިނގިތާ 48 ގަޑިއިރު ފަހުންނެވެ. ވިސްނާލައްވަން ވަގުތުކޮޅެއް ނެންގެވީ ކަމަށް ބަލަމާ ހިނގާށެވެ.
އެކްސްގައި މައުމޫން ކުރެއްވި ޕޯސްޓާ އެކު އަޅުގަނޑުގެ ހަނދާންތައް ގޮސް ގުޅުނީ 1980ގައި ފެށި އިރާގު/އީރާންގެ ގަލްފް ހަނގުރާމައަށެވެ. އޭރުގެ ދިވެހި ހަބަރުތަކުގައި ހުންނާނީ ހަނގުރާމަ ފެށީ އީރާނުން ކަމަށެވެ. ދިވެހިރާއްޖޭގެ އަޑުން ކިޔާ ހަބަރުތަކާއި އޭރުގެ ނޫސްތައް ކަމަށްވާ 'ހަވީރު' އާއި 'އާފަތިސް'ގައި ވެސް ޖަހާ އެކަހަލަ ހަބަރުތައް ވެސް ލިޔަނީ ސަރުކާރުން ބުނާ ގޮތަކަށެވެ.
އިރާގު/އީރާން ހަނގުރާމަ، ސެޕްޓެމްބަރު 1980ގައި ފެށީ ސީދާ ސައްދާމް ހުސެއިންގެ އަމުރަށް އިރާގު ސިފައިން އީރާނަށް އަރައިގަނެގެންނެވެ.
ރައީސްކަމުގައި މައުމޫން ހުންނެވި އިރު ސަރުކާރުން އެ ހަގީގަތް ރައްޔިތުންނަށް ގަސްދުގައި އޮޅުވާލީ، އެއް ސަބަބަކީ، ގައުމީ މަސްލަހަތެވެ. އީރާނުގެ އިސްލާމީ އިންގިލާބުގެ އެހާ ކުރީކޮޅު އެ ނުރައްކާ އަރަބި އެހެން ގައުމުތަކަށް ފެތުރުމުގެ ބިރު އޮތުމާއި، ޝީއީންގެ އީރާނަށް ވުރެ ސުންނީންގެ އަރަބި ގައުމުތައް ހިމާޔަތްކުރުން، ދިވެހި ސަރުކާރަށް މުހިންމުވީ އެވެ. ދީނީ  ބަޔަށާއި އަރަބި ގައުމުތަކާ އޮންނަ ގުޅުމަށް ބަލައި ރާއްޖެއިން ކޮޅުނެގީ އިރާގު 'ހިމާޔަތްކުރާށެ'ވެ.
ހާމަނާއީ އަވަހާރަކޮށްލުމަކީ އެމެރިކާ އާއި އިޒުރޭލުގެ އަނިޔާވެރިކަމާއި އުދުވާނުގެ ވަރަށް ބޮޑު ހެއްކެކެވެ. ސޯޝަލް މީޑިއާގެ މި ޒަމާނުގައި، 1980އާ ހިލާފަށް، ދިވެހި ސަރުކާރަށް މައުލޫމާތެއް ނުހިފެހެއްޓޭނެ އެވެ. އެހެންކަމުން އެންމެން މި ތިބީ އެ މީހަކު ބޭނުން ދިމާލަކުން، އެމީހަކު ހިތްހަމަޖެހޭ ކަހަލަ މައުލޫމާތުތައް ހޯދަހޯދަ އެވެ. މައުމޫންގެ ވެރިކަމަށް ވުރެ އާންމުންނަށް އޮތް ހިޔާލު ފާޅުކުރުމުގެ މިނިވަންކަން ވެސް މިހާރު މާ ބޮޑެވެ. އޭގެ ނަތީޖާ ސޯޝަލް މީޑިއާއިން އެ ފެންނަނީ އެވެ.
ބައެއް މީހުން ބުނެފާނެ އެވެ. ރައީސް މުހައްމަދު މުއިއްޒު އެ ހުންނެވީ ސައުދީ އާއި ގަތަރާއި ޔޫއޭއީގެ 'ލާރިގަނޑުގައި ތާށިވެފަ' އެވެ. އިސްލާމީ ގައުމަކަށް ހަމަލާދީ ފުނޑާލައި، ވެރިން އަވަހާރަކޮށްލަމުން ދާއިރު ވެސް 'ޗުޕް' ވެސް ވިދާޅުނުވަނީ އެހެންވެ އެވެ. އޭގެ ބަދަލުގައި އެމަނިކުފާނު، މިދިއަ އާދިއްތަދުވަހު ވަނީ ޔޫއޭއީގެ ރައީސް ޝައިހް މުހައްމަދު ބިން ޒައިދު އަލް ނަހްޔާނާ ފޯނުން ގުޅުއްވައި، ރާއްޖެ އޮތީ ޔޫއޭއީއާ އެކު ކަމަށް ވިދާޅުވެފަ އެވެ. އެ ފޯނު ކޯލުގައި އީރާނުން އެގައުމުތަކަށް ދޭ ހަމަލާތައް ކުށްވެރި ވެސް ކުރެއްވި އެވެ.
އޭގެ އަނެއް ދުވަހު، މިދިއަ ހޯމަދުވަހު، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ހާމަނާއީ އަވަހާރަކޮށްލުން ސީދާ ކުށްވެރިކުރައްވަންތޯ ތަކުރާރުކޮށް ސުވާލު ކުރުމުން ވެސް ރައީސް ސީދާ ޖަވާބެއް ނުދެއްވަ އެވެ. އެކަމަކު އެމެރިކާ އާއި އިޒުރޭލުން ބޭނުންވީމާ އެގޮތަށް ހަމަލާ ނުދެވޭނެކަމާއި އެއީ ބައިނަލްއަގުވާމީ ގާނޫނުތަކާ ހިލާފު ކަމެއް ކަމަށް ވިދާޅުވި އެވެ.
ރައީސް ވަރަށް ސާފުކޮށް ހާމަކުރެއްވީ މިހާރުގެ ހާލަތުގައި ރާއްޖެ އޮތީ އަރަބި އިސްލާމީ ގައުމުތަކާ އެކުގައި ކަމެވެ.
"އަޅުގަނޑު ނުދަންނަވަން ތައުޒިޔާގެ މެސެޖެއް [ހާމަނާއީ އަވަހާރަކޮށްލުމުން] ނުފޮނުވާނަމެކޭ، އަޅުގަނޑު ދެންނެވީ އަރަބި އިސްލާމީ ގައުމުތަކާ އެކީގައޭ މި ސަރުކާރުން މި މަސައްކަތްކުރަމުން ދަނީ. އަރަބި އިސްލާމީ ގައުމުތައް އެއް ބްލޮކެއްގެ ގޮތުގައި، އެއް ޔުނިޓެއްގެ ގޮތުގައި މިކަމުގައި މަސައްކަތްކުރަމުން ދަނީ. އެހެންވެ އެ ޔުނިޓީ އަޅުގަނޑުމެން ހިފަހައްޓާނަން،" ރައީސް މުއިއްޒު ވިދާޅުވި އެވެ.
މެދުއިރުމަތީގެ އަރަބި ގައުމުތަކާ ދިވެހި ސަރުކާރުތަކުން ބާއްވާ ގާތް ގުޅުންތަކާއި ސައުދީ އަރަބިއްޔާ ފަދަ ގައުމުތަކުން ރާއްޖެއަށް އޮންނަ ނުފޫޒަކީ އާ ކަމެއް ނޫނެވެ. މިސާލުތަކެއް ނަގަން ކުރީގެ ރައީސް އަބްދުﷲ ޔާމީންގެ ސިޔާސަތަށް ބަލައިލުން ރަނގަޅުވާނެ އެވެ. އެގޮތުން އެ އަހަރުގެ ރޯދަމަހު، 5 ޖޫން 2017ގައި، ކުއްލިއަކަށް ގަތަރާ އެކު ސިޔާސީ ގުުޅުން ކަނޑާލީ އެވެ. ސައުދީ އަރަބިއްޔާއިން ގަތަރު ދެކެ ރުޅިއައިސް ސިޔާސީ ގުޅުން ކަނޑާލުމާ އެކު، ސައުދީގެ ފަހަތުންނެވެ. ސައުދީގެ ވެރިންގެ އެދިވަޑައިގަތުމަށެވެ.
އޭގެ އަހަރެއް ކުރިން، 17 މޭ 2016ގައި، ސައުދީގެ ނުފޫޒުގައި ޔާމީން ސަރުކާރުން އޮތީ އީރާނާ ވެސް ސިޔާސީ ގުޅުން ކަނޑާލައިފަ އެވެ. އެއީ އެހެން ގައުމަކާ އެކު އޮތް ސިޔާސީ ގުޅުން ރާއްޖެއިން އިސްވެ ކަނޑާލި ފުރަތަމަ ފަހަރެވެ.
މި ނިންމުންތަކާ އެކު މީޑިއާ އާއި އާންމުން ވެސް ސަރުކާރަށް ވަރަށް ބޮޑަށް ފާޑުކިޔެވެ. ލިއުންތައް ލިއުނެވެ. 
މިހާރު މި ފެންނަނީ އޭގެ ކުރިން ދުވަހަކު ވެސް މެދުއިރުމަތިން ފެނުނު ރުޅިވެރިކަމެއް ނޫނެވެ. އެމެރިކާ އާއި އިޒުރޭލުން އީރާން ފުނޑުކުރަމުން ދާއިރު، އެ ދެ ގައުމަށް ވާގިވެރިވާކަމަށް ބުނެ، އީރާނުން މެދުއިރުމަތީގެ އަރަބި ހުރިހާ ގައުމަކަށް ކަހަލަ ގޮތަކަށް ރައްދު ހަމަލާތައް ފޮނުވަނީ އެވެ. މުޅި ސަރަހައްދު އެ އޮތީ ހުއްޓިފަ އެވެ. އަމާންކަމުގެ ނަމޫނާއެއްގެ ގޮތުގައި ބެލުނު ޔޫއޭއީ ކަހަލަ ގައުމުތަކުގައި ބިރުވެރިކަމެވެ.
މި ހާލަތުގައި ދިވެހި ސަރުކާރަށް އެ އަރަބި ގައުމުތައް ދޫކޮށް އީރާނުގެ ދިފާއުގައި ނުކުމެވިދާނެ ގޮތެއް ނުވިސްނެ އެވެ. ޔާމީންގެ ވެރިކަމަށް ވުރެ ވެސް މިހާރު ސައުދީ އާއި ގަތަރު ފަދަ ގައުމުތަކުން ރާއްޖެއަށް އޮތް ނުފޫޒު ބޮޑެވެ. ސިޔާާސީ ކެމްޕޭންތަކަށް އޭގެ ބައެއް ގައުމުތަކުގެ ބޭފުޅުން ސީދާ ފަންޑުކުރައްވަ އެވެ. ގައުމުގެ އިގުތިސާދަށް ބަލާ ނަމަ އެ ގައުމުތަކުގެ އިންވެސްޓަރުން ރާއްޖޭގައި ކުރާ އިންވެސްޓްމެންޓްތަކުގެ އަގު މިނަން ޖެހޭނީ ބިލިއަން ޑޮލަރަށް ވުރެ މަތިންނެވެ. މިސާލަކަށް ގަތަރުގެ އެސެޓްސް ގްރޫޕް އާއި ދުބާއީގެ ކާޒްނާ އިންޓަނޭޝަނަލްއިން ރާއްޖޭގައި މިހާރު ހަދަމުން އަންނަ އެޓްލާންޓިސް ރިސޯޓެވެ. މައުލޫމާތު ހުރި ބައެއް ފަރާތްތަކުން ބުނާ ގޮތުގައި އެއީ ބިލިއަން ޑޮލަރަށް ވުރެ ބޮޑު އިންވެސްޓްމެންޓެކެވެ.
ވެލްޑޯފް އެސްޓޯރިއާ މޯލްޑިވްސް އިތާފުއްޓާއި އަލަށް ހެދި ރޯޒްވުޑް ރަންފަރު ރިސޯޓަކީ ގަތަރުގެ އެސެޓްސް ގްރޫޕްގެ އިންވެސްޓްމެންޓްތަކެވެ.
މެދުއިރުމަތީގެ މިކަހަލަ ގައުމުތައް ދޫކޮށްލާފައި ކުރިއަކުން ވެސް ރާއްޖެއަކަށް ކޮޅެއް ނުނެގުނެވެ. އެހެންވެ، އަޅުގަނޑުމެން ނޫސްވެރިންނާއި ސޯޝަލް މީޑިއާގައި އާންމު އެތައް ބަޔަކު ކިޔާ ފާޑުތަކަށް ސަރުކާރުގެ ވެރިން ދައްކަވާނީ ހިމޭންކަމެވެ. އަމިއްލަ މަސްލަހަތާއި ގައުމުގެ މަސްލަހަތު ވެސް އޭގެ ފަހަތުގައި އެބަ އޮތެވެ. 'ތިތިބީ ތެޔޮ ލާރިއަށް ވިކިފައޭ' ގޮވިޔަސް އަޅައެއްނުލައްވާނެ އެވެ. 'މިއީ މިނިވަން ގައުމެއްހޭ' ބުނެ ސުވާލު ކުރިޔަސް ޖަވާބެއް ނުދެއްވާނެ އެވެ. 'ދަށުވާން ވެސް ތިއީ ދެން ބޮޑުވަރޭ' ބުންޏަސް ރައްދެއް ނާންނާނެ އެވެ.
އާއެނކެވެ. ސަރުކާރާއި ސަރުކާރުގެ ވެރިންނާއި ސިޔާސީ ވެރިންގެ ކަންކަން އޮންނަނީ އާންމުން އަދި ތިޔަ ގަބޫލުކުރާ 'ހަމަޔަކު' ނޫނެވެ. ވެރިކަމުގައި ހުންނަވާއިރު އަމަލްކުރެއްވޭނެ ގޮތާއި އިދިކޮޅުގައި ތިއްބަވާ އިރު ދައްކަވާ ވާހަކައަކީ މުޅިން ތަފާތު ދެ ހަގީގަތެވެ.
ރައީސް މުއިއްޒު އާއި އޭރުގެ ޕީޕީއެމް ބޭފުޅުން، މިހާރު ނަމަ ޕީއެންސީގެ ވެރިން، އިންޑިއާއާ ބެހޭ ގޮތުން ދެއްކެވި ވާހަކަތައް ހަނދާންކޮށްލާށެވެ. އެމްޑީޕީ ސަރުކާރުން އިންޑިއާއާ އެކު ވީ އެއްބަސްވުންތައް ހާމަކުރައްވާނަމޭ ވިދާޅުނުވޭ ހެއްޔެވެ؟ ސަރުކާރުގެ ފުރަތަމަކޮޅު އިންޑިއާ ދޫކޮށް ޗައިނާ ކޮޅަށް ނުޖެހޭ ހެއްޔެވެ؟ 
ފަހުން ދެން އެވީ 'އެއްޗެއް' ފުރޮޅުނީ ސަރުކާރުގެ ރަސްމީ ސިޔާސަތަށެވެ. ރުޅިއަޔަސް ގަބޫލުކުރާށެވެ! ބައެއް ކަންކަން މި ބަދަލުވަނީ އޭގައި އަތްލެވޭ ވަރަށް ވުރެ މާ ހޫނު އެއްޗަކަށެވެ. އެ ހޫނުކަން ސޯޝަލް މީޑިއާގައި، އެކަނި އިނދެ، ހިތަށްއެރި އެއްޗެއް ލިއެ އަދި ގޮވިޔަކަސް، އިހުސާސެއް ނުކުރެވޭނެތާ އެވެ. އާއެނކެވެ. ނުކުރެވޭނެ އެވެ.