ބޮލީވުޑްގެ ކޮމެޑީ އެކްޓަރު ރާޖްޕާލް ޔާދަވްއާ ދެކޮޅަށް ޗެކް ބައުންސްވި މައްސަލަ ހުށަހެޅި ފަރާތުން އެ މައްސަލަ ހުށަހެޅީ ބަދަލު ހިފުމުގެ މަޤްސަދުގައި ކަމަށް އެކްޓަރު ބުނެފިއެވެ. މި މައްސަލައާ ގުޅިގެން ޖަލު ހުކުމެއް ތަންފީޒުކުރަމުންދިޔަ އެކްޓަރު ކަފާލާތުގެ ދަށުން ދޫކޮށްލުމާ ގުޅިގެން ވަނީ ނޫސްވެރިންނާ ބައްދަލުކޮށްފައެވެ. ނޫސްވެރިންނަށް މައުލޫމާތު ދެމުން ރާޖްޕާލް ބުނީ، ލޯނުގެ ސެކިއުރިޓީއެއްގެ ގޮތުގައި އޭނާގެ މިލްކިއްޔާތުގައި ހުރި އެތައް ކްރޯޑް ރުޕީސްއެއްގެ އަގުހުރި ތަކެތި ހުށަހެޅި ނަމަވެސް، ޝަކުވާ ހުށަހެޅި ފަރާތުން އަބަދުވެސް ބޭނުންވީ އޭނާ ޖަލަށް ފޮނުވާލުމަށް ކަމަށެވެ. ރާޖްޕާލްގެ އިތުރުން އޭނާގެ ވަކީލު ވެސް ބުނީ، ކުރިން ބޭއްވި ނޫސްވެރިންގެ ބައްދަލުވުމެއްގައި ރާޖްޕާލް ޖަލަށް ފޮނުވާލުމުގެ ނިޔަތެއް ނެތް ކަމަށް ޝަކުވާ ހުށަހެޅި މާދަވް ގޯޕާލް ބުނެ އެކަމަށް އިންކާރު ކުރި ނަމަވެސް އެއީ ދޮގެއް ކަމަށެވެ. ރާޖްޕާލް ނޫސްވެރިންނަށް މައުލޫމާތު ދެނީ--ފޮޓޯ/އިންޑިއަންއެކްސްޕްރެސް އެގޮތުން 2018 ވަނަ އަހަރު ރާޖްޕާލް ކޯޓަށް ސެކިއުރިޓީ ފައިސާ ދައްކައި އޭނާގެ މުދަލުގެ ލިޔެކިޔުންތައް ހަވާލުކުރަން ތައްޔާރަށް ހުރިއިރުވެސް މާދަވް ގޯޕާލް އެކަމަށް އޭރު އިންކާރު ކުރި ކަމަށް ރާޖްޕާލްގެ ވަކީލު ވަނީ ބުނެފައެވެ. މި މައްސަލައާ ގުޅިގެން ރާޖްޕާލްގެ އަބުރު ކަތިލުމުގެ ނިޔަތުގައި އެކްޓަރާ ދެކޮޅަށް ދައުވާކުރި މުރާލީ ޕްރޮޖެކްޓްސްގެ އިސްވެރިން މަސައްކަތްކޮށްފައިވާ ކަމަށް ވެސް ވަކީލު ވަނީ ތުހުމަތުކޮށްފައެވެ. ނޫސްވެރިންނަށް މައުލޫމާތު ދިނުމަށް ބޭއްވި ހާއްސަ ބައްދަލުވުމުގައި ރާޖްޕާލް ބުނީ ހެޔޮއެދޭ އެކި ފަރާތްތަކުން މިހާތަނަށް އެހީގެ ގޮތުގައި އެއް ކްރޯޑު ރުޕީސްއަށް ވުރެ ގިނަ އަދަދަކަށް އޭނާއަށް ފައިސާ ފޮނުވާފައިވާ ކަމަށެވެ. އެ މީހުންގެ ނަންތައް ހިމެނޭ ބަޔާނެއް ރާޖްޕާލްގެ ޓީމުން ވަރަށް އަވަހަށް ނެރޭނެ ކަމަށާއި އެ ފަރާތްތަކުން އެކްޓަށް އެހީތެރިވެދީ ބެހެއްޓި އޯގާތެރި ކަމަށް އޭނާ ވަނީ ޝުކުރު އަދާކޮށްފައެވެ. ރާޖްޕާލް ބޭނުންވަނީ އޭނާއަށް އެހީތެރިވެދިން މީހުންގެ ފައިސާ އަނބުރާ ރައްދުކޮށް ދިނުމަށް ކަމަށާއި އެ ފަރާތްތަކުގެ ބޭންކު އެކައުންޓް މައުލޫމާތު ހިއްސާ ކުރުމަށް ވެސް ނޫސްވެރިންގެ މި ބައްދަލުވުމުގައި އެކްޓަރު ވަނީ އެދިފައެވެ. ދިއްލީ ހައި ކޯޓުން ކަފާލާތުގެ ދަށުން ރާޖްޕާލް ދޫކޮށްލާފައި ވަނީ މައްސަލަ ރައްދުވާ ކުންފުންޏަށް 1.5 ކްރޯޑު ރުޕީސް ޖަމާކުރުމުންނެވެ. ކަފާލާތުގެ ދަށުން އޭނާ ދޫކޮށްލާފައި ވަނީ އެއް ލައްކަ ރުޕީސްގެ ބޮންޑެއް ބެހެއްޓުމަށް ހުކުމްކޮށް ކޯޓުން އަންގާ ގަޑިތަކަށް ހާޒިރުވުމަށް ޝަރުތު ކުރުމަށްފަހުއެވެ. ރާޖްޕާލް ހައްޔަރު ކުރެވުނީ 2010 ވަނަ އަހަރު އޭނާ ޑައިރެކްޓް ކުރި ފިލްމު "އަތާ ޕަތާ ލާޕަތާ" އުފެއްދުމަށް މުރާލީ ޕްރޮޖެކްޓްސް ކިޔާ ކުންފުންޏަކުން ނެގި ފަސް ކްރޯޑު ރުޕީސްގެ ލޯނަކާ ގުޅިގެން އެ ފައިސާ އަނބުރާ ނުދެއްކި އޮތުމުންނެވެ.