ރާއްޖޭގައި އިހުތިރާމު ލިބެނީ ވައްކަން ކުރާ މީހުންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީހުގެ ޖަލްސާގައި ރޭ ވާހަކަދައްކަމުން ޔާމީން ވިދާޅުވީ ކޮންމެ ތަނަކުން ވެސް ކުރަނީ ވައްކަން ކަމަށާއި އެގޮތުން ބިންކޮޅެއް، ނުވަތަ ވެލިކޮޅެއް ފެންނަން އޮތިއްޔާ ވެސް ކުރަނީ ވައްކަން ކަމަށްވާއިރު އެއީ ރާއްޖޭގެ މިއަދުގެ ހާލަތު ކަމަށެވެ. އަދި ޖިނާއީ އަދުލުގެ ނިޒާމުގެ ކަންކަން އޮންނަ ގޮތާއި މެދު ލަދުވެތިވެވަޑައިގަންނަވާ ކަމަށްވެސް ޔާމީން ވިދާޅުވި އެވެ.
"ކޮބައިތޯ އެމްއެމްޕީއާރުސީގެ ގާތްގަނޑަކަށް 400 މިލިއަން ޑޮލަރުގެ ވައްކަން؟ ކޮބައިތޯ އެކަމުގެ ޒިންމާތައް އުފުލާ އަމިއްލައަށް އިއުތިރާފުވެ، ކޯޓުތަކުގައި އެކަމަށް އެއްބަސްވި އަދީބާއި ޒިޔަތާ؟ އެތިބީ މާފުވެގެން ގޮއްސަ، ހައްގުތައް ވަރަށް ކުރިއަރުވައިފަ އެހެރީ،" ޔާމީން ވިދާޅުވި އެވެ.
ޔާމީން ވިދާޅުވީ ރާއްޖޭގައި ވައްކަން ކުރާނަމަ، ކުރަންވާނީ ބޮޑެތި އަދަދުން ކަމަށާއި އެފަދަ ކުށްތައް ކުރާ މީހުން ހުކުމް ތަންފީޒު ނުކޮށް ތިން ދުވަހުން ޖަލުން ނިކުންނާނެ ކަމަށެވެ. އޭގެ ބަދަލުގައި ކުދި ވައްކަންތައް ކުރާ މީހުން ހުކުމް އެއްކޮށް ތަންފީޒުކުރަންޖެހޭ ކަމަށާއި ބޮޑެތި ވައްކަންތައް ކުރާ މީހުންނަށް އިއްވާ ހުކުމްތައް ރާއްޖޭގައި ނުހިނގާނެ ކަމަށްވެސް ޔާމީން ވިދާޅުވި އެވެ. އަދި ރާއްޖޭގެ ޖިނާއީ ނިޒާމަކީ ވެސް ކޮރަޕްޝަންގެ ނިޒާމެއް ކަމަށް ވިދާޅުވި އެވެ.
"ރާއްޖޭގައި ހިމާޔަތް ވެސް މި ލިބެނީ ވައްކަން ކުރާ މީހުންނަށް. ވައްކަން ކުރާ މީހުން ރައްޔިތުން އިހުތިރާމް ވެސް ކުރަނީ. އެއީ ވަގަށް ނަގާ ފައިސާ އެބަ ބަހާތާ،" ޔާމީން ވިދާޅުވި އެވެ.