އުރީދޫ ނޭޝަންގެ 2026 ވަނަ އަހަރުގެ އީ-ސްޕޯޓްސް ހަރަކާތްތައް ރަސްމީކޮށް ފެށުމުގެ ގޮތުން ބާއްވާ "އޯޕަން ސީރީޒް ސީޒަން 1" ގެ މުބާރާތްތަކުގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ. މި ސީޒަނުގެ ފުރަތަމަ މުބާރާތްތަކުގެ ގޮތުގައި ކުރިއަށްދާނީ ކްލޭޝް ރޯޔާލް އަދި އީއޭއެފްސީ އަލްޓިމޭޓް ޓީމް މުބާރާތެވެ.
ކްލޭޝް ރޯޔަލް - އޯޕަން ސީރީޒް ސީޒަން 1
މި މުބާރާތުގައި ބައިވެރިވުމުގެ ސުންގަޑިއަކީ 3 ފެބްރުއަރީ 2026 ގެ 11:59 އެވެ. މުބާރާތް ރަސްމީކޮށް ފެށުމަށް ހަމަޖެހިފައިވަނީ 6 ފެބްރުއަރީ 2026 ގައެވެ. އޮންލައިންކޮށް ކުރިއަށްގެންދާ މި މުބާރާތުގެ ރަޖިސްޓްރޭޝަން ފީއަކީ 50 ރުފިޔާއެވެ. މި މުބާރާތުގެ އިނާމު ޕޫލަކީ 5,000 ރުފިޔާއެވެ.
އީއޭއެފްސީ އަލްޓިމޭޓް ޓީމް - އޯޕަން ސީރީޒް ސީޒަން 1
އީއޭއެފްސީ މުބާރާތުގައި ބައިވެރިވުމަށް ބޭނުންވާ ފަރާތްތަކަށް 12 ފެބްރުއަރީ 2026 ގެ ނިޔަލަށް ރަޖިސްޓަރީ ކުރުމުގެ ފުރުސަތު ވަނީ ހުޅުވާލާފައެވެ. މި މުބާރާތް ފެށުމަށް ހަމަޖެހިފައިވަނީ 16 ފެބްރުއަރީ 2026 ގައެވެ. މި މުބާރާތުގެ ވެސް ރަޖިސްޓްރޭޝަން ފީއަކީ 50 ރުފިޔާ ކަމަށްވާއިރު، މުބާރާތުގެ އިނާމު ޕޫލަކަށް ކަނޑައަޅާފައިވަނީ 5,000 ރުފިޔާއެވެ.
އުރީދޫ ނޭޝަން އިން ބުނި ގޮތުގައި މި މުބާރާތްތަކަކީ ރާއްޖޭގެ އެކި ކަންކޮޅުތަކުގައި ތިބި ގޭމް ކުޅޭ ފަރާތްތަކަށް އެމީހުންގެ ހުނަރު ދައްކާލުމާއި، ގޭމިން ކޮމިއުނިޓީއާ ގުޅުވައި، ވާދަވެރި ޕްލެޓްފޯމްތައް ފަހިކޮށްދިނުމުގެ ގޮތުން ބާއްވާ މުބާރާތްތަކެކެވެ. މުބާރާތްތައް އޮންލައިންކޮށް ބޭއްވުމުގެ މައިގަނޑު މަގުސަދަކީ ހުރިހާ އަތޮޅެއްގެ ކުޅުންތެރިންނަށް ހަމަހަމަ އުސޫލުން ބައިވެރިވުމުގެ ފުރުސަތު ފަހިކޮށްދިނުމެވެ.
އީ-ސްޕޯޓްސް މެދުވެރިކޮށް ޑިޖިޓަލް ހުނަރުވެރިން ކުރިއަރުވައި ޒުވާނުންނަށް ފުރުސަތުތައް ފަހިކޮށްދިނުމުގައި އުރީދޫ ނޭޝަން އިން ދަނީ މުހިންމު ދައުރެއް އަދާކުރަމުންނެވެ. މި އޯޕަން ސީރީޒަކީ އުރީދޫގެ ޑިޖިޓަލް ކޮމިއުނިޓީއެއް ބިނާކޮށް، ޓެކްނޮލޮޖީ އާއި ކަނެކްޓިވިޓީގެ ތެރެއިން އަންނަން އޮތް ޖީލު ބާރުވެރިކުރުވުމަށް އުރީދޫއިން ގެންގުޅޭ ތަސައްވުރުގެ ބައެކެވެ.
އުރީދޫ ނޭޝަންގެ 2026 ވަނަ އަހަރުގެ އީ-ސްޕޯޓްސް މޫވްމަންޓްގައި ބައިވެރިވުމަށް ރާއްޖޭގެ ހުރިހާ ގޭމަރުންނަށް މިހާރު ވަނީ ދައުވަތު އަރުވާފައެވެ. މުބާރާތްތަކުގައި ރަޖިސްޓަރީ ވުމަށް https://ore.do/arena ލިންކް ބޭނުންކުރެވޭނެއެވެ.