މާލޭ
ސިޓީ ގްރޫޕް އޮފް ހޮސްޕިޓަލްސްއާއި އިސްރަށްވެހިންގެ ނާދީއާ ގުޅިގެން، އިސްރަށްވެހިންނަށް
އަމާޒުކޮށްގެން، އުމުރުން ދުވަސްވުމުގެ ސަބަބުން ގައިގެ ބާރު ދޫވުމާއި، ވެއްޓުން
ފަދަ ކަންކަމުން ރައްކާތެރިވުމާއި ގުޅޭ ހޭލުންތެރިކަމުގެ ޕްރޮގްރާމެއް ކުރިއަށް
ގެންގޮސްފިއެވެ.
މި ޕްރޮގްރާމް ކުރިއަށްގެންގޮސްފައިވަނީ، މާލެ
އިސްރަށްވެހިންގެ ނާދީގައެވެ. އާއިލާއާ ބެހޭ ވުޒާރާއިން ބުނީ މި ޕްރޮގްރާމުގައި ކުރިއަށްގެންގޮސްފައިވަނީ، މަސްތަކުގައި
ވަރުޖެއްސުމާއި، ޖިސްމާނީ ދުޅަހެޔޮކަން އިތުރުކުރުމަށް ކުރެވިދާނެ ލުއި
ކަސްރަތުތަކާ ބެހޭގޮތުން މުހިންމު މަޢުލޫމާތްތަކާ އެކުގައިކަމަށެވެ.
މިފަދަ
ޕްރޮގްރާމްތަކުގެ މުހިންމުކަން ފާހަގަކުރައްވަމުން، މި ޕްރޮގްރާމުގައި ބައިވެރިވި އިސްރަށްވެއްީސަކު ބުނީ ޕްރޮގްރާމްތަކުގައި ބައިވެރިވާން ފެށިފަހުން
ހަރަކާތްތެރިވުމަށް ފަސޭހަވެ، ގައިގައި ހުންނަ ކުދި ރިހުންތައް ފިލައި،
ފާހަގަކުރެވޭފަދަ ހެޔޮ ބަދަލުތަކެއް ހަށިގަނޑަށް އައިސްފައިވާ ކަމަށެވެ.
އިސްރަށްވެހިންނަށް ކުރިއަށްގެންދިޔަ ކަސްރަތު ޕްރޮގްރާމްގެ ތެރެއިން..
އެހެން
ބައިވެރިއަކު ބުނެފައިވަނީ މި ޕްރޮގްރާމްތަކުގައި ގިނަ އިރު ހޭދަކުރަންޖެހުނު
ނަމަވެސް، ފޫހިވުމެއްނެތި ޕްރޮގްރާމް ފުރިހަމަކުރެވޭ ކަމަށެވެ. އަދި މި
ސެޝަންތަކުގައި ބައިވެރިވުމުގެ ސަބަބުން ހަށިގަނޑަށް ލިބޭ ލުއިކަމުގެ އިތުރުން،
ނަފްސާނީ ގޮތުން އުފާވެރިކަމާއި ހިތްހަމަޖެހުން ލިބިގެންދާކަން ވެސް އެ ފަރާތުން
ފާހަގަކުރިއެވެ.
އިސްރަށްވެހިންނަށް ކުރިއަށްގެންދިޔަ ކަސްރަތު ޕްރޮގްރާމްގެ ތެރެއިން..
"ވަރަށް
ގިނަ މީހުންނަށް އަޅުގަނޑު ނަސޭހަތްތެރިވަން މިތަނަށް އަންނާށޭ، ކޮންމެ ދުވަހަކު
ނާދެވުނަސް ކަސްރަތު އޮންނަ ދުވަސް ދުވަހު އަންނަން ބުނަން، އެއީ އަޅުގަނޑުމެން
ދުވަސްވީ މީހުންނަށް ވަރަށް ރަނގަޅު ފުރުޞަތެއް މިތަނުން ދެއްވާ، އެހެންކަމުން
އެކަމަށްޓަކައި އަޅުގަނޑު ވަރަށް ޝުކުރުވެރިވަން." ޕްރޮގްރާމުގައި ބައިވެރިވި
އިސްރަށްވެއްސެއް ބުންޏެވެ.
އިސްރަށްވެހިންނަކީ
ހަރަކާތްތެރި ދިރިއުޅުމެއް އުޅޭ، ދުޅަހެޔޮ ބަޔަކަށް ހެދުމުގެ މަޤްސަދުގައި
އިސްރަށްވެހިންގެ ނާދީގައި މިފަދަ ތަފާތު ޕްރޮގްރާމުތައް އަބަދުވެސް ކުރިއަށް ގެންދެއެވެ.
މިގޮތުން އިސްރަށްވެހިންގެ ނާދީގައި ކޮންމެ އާދީއްތަ އަދި އަންގާރަ ދުވަހެއްގެ
ހަވީރު 04:15 އިން 05:15 އަށް ކަސްރަތު ޕްރޮގްރާމުތައް ކުރިއަށް ގެންދާކަމަށް އާއިލާއާ ބެހޭ ވުޒާރާއިން ބުންޏެވެ.
އިސްރަށްވެހިންގެ
ނާދީގައި ހިންގާ މިފަދަ ހަރަކާތްތަކުގައި ބައިވެރިވުމުގެ ފުރުޞަތު 55 އަހަރުން
މަތީގެ ކޮންމެ ބޭފުޅަކަށްވެސް ވަނީ ހުޅުވާލާފައެވެ. އިތުރު މަޢުލޫމާތު ސާފު
ކުރުމަށް އިސްރަށްވެހިންގެ ނާދީގެ ނަންބަރު 3027586 ގުޅުއްވުމަށް
އިސްރަށްވެހިންގެ ނާދީން އެދެއެވެ.