ހުވާ ނުކިޔާ ކަމަށް ބުނި ފުލުސް މީހާ ދޫކޮށްލީ ގޯސްކޮށް: ހައި ކޯޓު

ފުލުހުންގެ ހުވާ ނުކިޔާ ކަމަށް ބުނި، ވޭޕް އާއި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ގދ. ތިނަދޫން ހައްޔަރުކުރި ފުލުސް މީހާ ބަންދުން ދޫކޮށްލުމަށް ތިނަދޫ މެޖިސްޓްރޭޓު ކޯޓުން ހުކުމް ކުރީ ގޯސްކޮށް ކަމަށް ހައި ކޯޓުން މިއަދު ހުކުމް ކޮށްފި އެވެ.
ވީ ކިހިނެއް؟ - އެ މައްސަލާގައި މިދިޔަ މަހު ހައްޔަރުކުރީ ފުލުހުންގެ ސްޕެޝަލް ކޮންސްޓްބްލަރީ މުހައްމަދު ސާޖިދު އަހުމަދެވެ. އެގޮތުން:
އޭނާ ދިރިއުޅޭ ގެ ބަލައި ފާސްކުރީ ވޭޕް ގެންގުޅޭ ކަމުގެ ތުހުމަތުގައި
ތިނަދޫގައި އުޅޭ މީހުންނާއި ކުޑަކުދިންނަށް ވެސް ވޭޕް ވިއްކާ ކަމުގެ ތުހުމަތުކުރެވޭ
ގެ ބަލައި ފާސްކުރި އިރު 191.92 ގްރާމުގެ މަސްތުވާތަކެތި ވެސް ފެނިފައިވޭ
ހައްޔަރުކުރީ މަސްތުވާތަކެތި ޓްރެފިކް ކުރުމުގެ މިންގަނޑަށް ފެތޭ ވަރަށް މަސްތުވާތަކެތި ގެއިން ފެނުމުން
މި މައްސަލަ ހައި ކޯޓަށް ދަނީ ސާޖިދު ހައްޔަރުކުރީ ގާނޫނާ ހިލާފަށް ކަމަށް ތިނަދޫ މެޖިސްޓްރޭޓް ކޯޓުން ހުކުމްކުރުމުން އެ ހުކުމް ދައުލަތުގެ ފަރާތުން ހައި ކޯޓުގައި އިސްތިއުނާފު ކުރުމުންނެވެ. އެގޮތުން، ދަށު ކޯޓުގެ ހުކުމުގައި ވަނީ:
މަދަނީ ކުށެއްގެ ތުހުމަތުގައި ތަނެއް ބަލައި ފާސްކުރުމުގެ އަމުރެއް ނުހޯދޭނެ
ދުންފަތް ކޮންޓްރޯލް ކުރުމުގެ ގާނޫނުގައި މަނާކޮށްފައިވާ ކަމެއް ކުރުމަކީ މަދަނީ ކުށެއް؛ އެއީ ޖިނާއީ ކުށެެއް ނޫން
ތަފްސީލް - މައްސަލައިގެ އިސްތިއުނާފު އަޑުއެހުމުގައި ސާޖިދު ވަނީ ފުލުހުން ހުވާކުރުމުގެ ރަސްމިއްޔާތުގައި ސާޖިދު ބައިވެރިވި ނަމަވެސް ފުލުހުންގެ ހުވާ ނުކުރާ ކަމަށް ބުނެފަ އެވެ.
އެ މައްސަލާގައި ހައި ކޯޓުން މިއަދު ކުރި ހުކުމްގައި ވަނީ، ސާޖިދު ދޫކޮށްލުމަށް ތިނަދޫ މެޖިސްޓްރޭޓު ކޯޓުން ނެރުނު އަމުރަކީ ގާނޫނާ ހިލާފު އަމުރެއް ކަމަށެވެ.
އެ އަމުރު ބާތިލްކޮށް ސާޖިދުގެ ބަންދާ މެދު އަލުން ގޮތެއް ނިންމުމަށް ފުލުހުން ހުށަހަޅައިފި ނަމަ، އެގޮތަށް ހުށަހަޅާ ތާރީހުން ފެށިގެން ދެ ދުވަހުގެ ތެރޭ އޭނާގެ ބަންދާމެދު ގޮތެއް ނިންމުމަށް ހައި ކޯޓުން އަމުރު ކޮށްފައިވެ އެވެ.
ހައި ކޯޓުގެ އަމުރުގައި، ދައުލަތުގެ ވަޒީފާ އާއި މަގާމުތަކަށް ކުރިމަތިލާ، އެފަދަ މަގާމުތަކަށް ހޮވޭ މީހުންގެ ފަރާތުން ވަޒީފާގެ ހައިސިއްޔަތުން ކުރަން ޖެހޭ ހުވަ އާއި ހުވާގެ އިގުރާރުގައި ސޮއިކުރުމުގެ ގާނޫނީ ނަތީޖާ ސާފުވާގޮތަށް ނިޒާމު ހަރުދަނާ ކުރަންޖެހޭނެކަން ވަނީ ފާހަގަކޮށްފަ އެވެ.
މީގެ އިތުރުން:
ވަޒީފާ އަދާކުރުމަށް ކުރަންޖެހޭ ހުވާގެ ރަސްމިއްޔާތުގައި ސާޖިދުގެ ދުލުން ހުވާ ނުކިޔާ ހުރި ކަމަށް ހައި ކޯޓުގެ ޝަރީއަތުގެ އަޑުއެހުމުގައި ބުނެފައިވަނީ އަދުލުއިންސާފުގެ ތަސައްވުރަށް އެއްވެސް ޖެހިލުމެއް، ފަރުވާލެއް ނެތި ކަމަށް ވެސް ހައި ކޯޓުގެ ހުކުމްގައި ފާހަގަކޮށްފައިވޭ
ޝަރީއަތުގެ އަޑުއެހުމުގައި، ހުވާ ނުކޮށް މުސާރަ ލިބުމުގައި ގޯހެއް އޮތް ކަމަށް ނުދެކޭ ކަމަށް ބެލެވޭ ބީދައިން ސާޖިދު ވާހަކަ ދެއްކި ކަމަށް ވެސް ވަނީ ފާހަގަކޮށްފައި
މިއީ މާތްﷲ ގަންދީ ހުވާކުރުމާ ގުޅޭ ގޮތުން ކަންވެގެންވާނެ ގޮތް ނުވަތަ ޝަރީއަތުގައި އެފަދަ ހުވައަކާ މެދު އެއްވެސް މީހެއްގެ ބަސްމަގު ހުންނަންވާނެ ގޮތް ކަމަށް ނުދެކޭ ކަމަށް ފަނޑިޔާރު ދީބާނާޒް ފަހުމީގެ ރައުޔުގައި ފާހަގަކުރައްވާފައިވޭ
އަރުޝީފަށް ނެގީ
އެންމެފަހުން އަޕްޑޭޓްކުރީ