ކުރީގެ އޮންލައިން ނޫސް "ހަވީރު" ގެ ނޫސްވެރިންނަށް "ކަމެއް ކޮށްދިން" ކަމަށްބުނާ އޯޑިއޯއެއް ލީކުވެއްޖެއެވެ.މިއޯޑިއޯގައި އިވެނީ ކުރީގެ ޑިފެންސް މިނިސްޓަރު މުޙައްމަދު ނާޒިމްގެ އަޑެވެ. ނާޒިމް ވިދާޅުވަނީ ހަވީރު ނޫހުގައި ކަމެއް ނުކޮށްދޭ އެއްވެސް ނޫސްވެރިޔަކު ނުހުންނާނެކަމަށެވެ."އެކަމަކު އޭގެ މާނައަކީ އެ އަނެކަތި ކުރާ ވާހަކައެއް ނޫން. މިކަހަލަ އެއްޗިއްސަކީ ހަމަ ވަރަށް ކޮންފިޑެންޝަލް ވާހަކަ" ލީކުވެފައިވާ އޯޑިއޯގައި ނާޒިމް ވިދާޅުވެއެވެ.
ހަވީރު ނޫހުގެ ނޫސްވެރިންނަށް ރިޝްވަތު ދިންކަމަށް ދޭހަވާފަދަ ގޮތަކަށް ކުރީގެ ޑިފެންސް މިނިސްޓަރު ވާހަކަފުޅުދައްކަވާފައިވާއިރު އެނޫހުގެ ގިނަ ނޫސްވެރިން މިހާރު މަސައްކަތްކުރަނީ އޮންލައިން ނޫސް "މިހާރު" ގައެވެ. މިނިވަން ނޫސްވެރިކަމަށް ގޮވާލާ އެންމެ ބާރަށް އަޑުއުފުލަމުން އަންނަ އެއް ބަޔަކީ ކުރީގެ "ހަވީރު" މިހާރުގެ "މިހާރު" ގައި މަސައްކަތްކުރާ ނޫސްވެރިންނެވެ.
ރާއްޖެޓީވީގެ މިހާރުގެ ސީއީއޯ ފިޔާޒު މޫސާވެސް ކުރިން މަސައްކަތްކުރަމުން އައިސްފައިވަނީ ހަވީރު ނޫހުގައިކަން ފާހަގަކޮށްލެވެއެވެ.މިއޯޑިއޯއަކީ ކޮންކަމަކާ ގުޅުވައިގެން ނާޒިމް ދައްކަވާފައިވާ ވާހަކައެއްކަމެއް ސާފެއް ނުވެއެވެ. އަދި ނޫސްވެރިންނަށް ދިނީ ކޮން އެއްޗެއްކަމެއްވެސް ނާޒިމް ވިދާޅެއްނުވެއެވެ.