މި އަހަރުގެ ރިޔާސީ އިންތިޚާބަށް، ސިޔާސީ އެއްވެސް ޕާޓީއެއްގެ ފަހަތަށް އަރައިވަޑައިނުގަންނަވާނެ ކަމަށާއި، ބޯކިބާގެ އެއްވެސް ބައެއް ބޭނުންވެނުލައްވާ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު ވަނީ ރިޔާސީ އިންތިޚާބުގައި ވާދަ ކުރައްވަން ނިންމެވިކަން ހާމަ ކުރައްވައި، ކެމްޕެއިން ވެސް ފައްޓަވައިފައެވެ. ނަމަވެސް، މި ފަހަރު ޖޭޕީއާއެކު ކޯލިޝަން ހެދުމަށް އޭނާއަށް ދައުވަތު އަރުވައި، އެ ޕާޓީން ސިޓީއެއް ފޮނުވި ކަމަށް ދެކެވޭ ވާހަކައާ ގުޅިގެން، އުމަރު "ދެން"އަށް ވިދާޅުވީ، އެއްވެސް ސިޔާސީ ޕާޓީއެއްގެ ފަހަތަށް އަރައިވަޑައިގަތުމުގެ ވިސްނުމެއް ނެތް ކަމަށެވެ.
އުމަރު ނަސީރުގެ އިތުރުން، މި އަހަރުގެ ރިޔާސީ އިންތިޚާބުގައި ރައީީސް އިބްރާހީމް މުޙައްމަދު ޞާލިޙާއި، އިދިކޮޅު ލީޑަރު ރައީސް ޔާމީން އަބްދުލްޤައްޔޫމާއި، ޖޭޕީގެ ލީޑަރު ޤާސިމް އިބްރާހީމާއި، އެމްއެންޕީގެ ރައީސް މުޙައްމަދު ނާޒިމް ވެސް ވާދަ ކުރައްވަން ވަނީ ނިންމަވައިފައެވެ. އުމަރަކީ ރިޔާސީ އިންތިޚާބުގައި ވާދަ ކުރައްވާނެ ހަމައެކަނި މިނިވަން ކެންޑިޑޭޓަށް ވުން ގާތެވެ.
އޭނާ މީގެ ކުރިން ވަނީ، ރާއްޖޭގެ ސިޔާސީ ޕާޓީތައް ފެއިލްވެފައިވާ ކަމަށާއި، ސިޔާސީ ޕާޓީތައް ނޫން ގޮތެއް ރާއްޖެއަށް ބޭނުންވާ ކަމަށް ވިދާޅުވެފައެވެ. އަދި ޕާޓީތަކުގެ ސަބަބުން ރައްޔިތުންނަށް ލިބުނީ ހަމައެކަނި ގެއްލުން ކަމަށް ވެސް އުމަރު ކުރިން ވިދާޅުވެފައިވެއެވެ.