އަންނަ މަހުގެ 09 ވަނަ ދުވަހު ބޭއްވުމަށް ހަމަޖެހިފައިވާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ އެތެރޭގެ އިންތިހާބުގައި، ހުޅުމާލެ އުތުރު ދާއިރާގެ ނައިބު ރައީސްގެ މަމާގަށް ވާދަކުރައްވާ މަލްޝާ ޝަރީފަކީ މި އިންތިހާބުގެ ވާދަވެރިންގެ ތެރެއިން އެންމެ މަޝްހޫރު، އާއްމުންނާ ގާތް އެއް މޫނެވެ.
ޕީއެންސީގެ ފިކުރުގެ މީހުންނަށް މަލްޝާ އަކީ އައު ނަމަކަށް ނުވާނެއެވެ. ޔަގީނުންވެސް މީސްމީޑިއާއާ ރައްޓެހި ކޮންމެ މީހަކަށް ވެސް، ޔޫތު މިނިސްޓްރީގެ ކުރީގެ ޑެޕިއުޓީ މިނިސްޓަރު މަލްޝާ އެނގޭނެއެވެ. ދީލައިނުލާ، އެއް ފިކުރެއްގައި ހުރުމަކީ ގިނަ މީހުންނަށް މާ ފަސޭހަ ކަމަކަށް ނުވިޔަސް، ގޮންޖެހުންތަކާއެކުގައި ވެސް މަލްޝާ ސާބިތުކަމާއެކު އަބަދުވެސް ހުންނެވީ ޕީއެންސީގެ ފިކުރުގައެވެ.
މިހާރު ހައުސިން ޑިވެލޮޕްމަންޓް ކޯޕަރޭޝަން(އެޗްޑީސީ)ގައި ވަޒީފާ އަދާ ކުރައްވަމުން ގެންދަވާ މަލްޝާ އަކީ ރައްޔިތުންނާ ގުޅުން ހުރި ކަންކަމުގައި، ޕީއެންސީގެ ފިކުރާ އެއްގޮތަށް މީީސްމީޑިއާގައި ވަކާލާތު ކުރެއްވުމުގައި ވަރަށް އަޑު ގަދަ ފަރާތެކެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މި ސަރުކާރު ގެނައުމަށް އެމަނިކުފާނުގެ ސަޕޯޓަރުން ކުރަމުންދިޔަ މަސައްކަތުގައި އިސް ދައުރެއް އަދާ ކުރެއްވި އެއް ސޯޝަލް މީޑިއާ އެކްޓިވިސްޓަކީ ވެސް މަލްޝާއެވެ.
 
ރިޔާސީ އިންތިހާބުގެ ކެމްޕެއިންގެ ތެރޭގައި މަލްޝާ، ޔޫތު މިނިސްޓްރީގެ ކުރީގެ ޑެޕިއުޓީ މިނިސްޓަރު މަރިޔަމް ޝިއުނައާއެކު
 
ވާދަވެރިންނަށް ރައްދު ދެއްވައި، އޭނާ ތާއީދު ކުރާ ”ފިކުރު“ ދިފާއުކުރައްވައި ޕްރޮމޯޓް ކުރެއްވުމުގައި ދޫނުދެއްވާ މަލްޝާއަށް، މިކަމުގެ ތެރޭގައި އެތައް ފާޑުކިޔުމަކާ ފުރައްސާރައެއް ވެސް ކުރިމަތިވިއެވެ. އެހެންނަމަވެސް، އެ ފާޑުކިޔުންތަކާ ނުރުހުމުގެ ބަސްތަކުން ފަހަތަށް ޖެއްސޭ ވަރަށްވުރެ، މަލްޝާގެ ހިތްވަރު މާ ގަދައެވެ. އޭނާ މިއަދު ވެސް އެ ހުންނެވީ، ޕީއެންސީގެ ފިކުރުގައި، ޕާޓީއަށްޓަކައި މަސައްކަތް ކުރައްވަން ތައްޔާރަށެވެ.
މަލްޝާ ”އަސުރަށް“ ވިދާޅުވީ ޕީއެންސީގެ އެތެރޭގެ އިންތިހާބުގައި، ހުޅުމާލެ އުތުރު ދާއިރާއަށް ވާދަ ކުރައްވަން ނިންމެވީ ދަފްތަރު ރައްޔިތުންގެ ހައްގުގައި ވަކާލާތުކޮށް، ބޭނުންވާ ކަންކަން ފަހިކޮށްދޭން މަސައްކަތް ކޮށްދިނުމަށް ކަމަށެވެ.
 
މަލްޝާ، ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަރިހުގައި
 
މަލްޝާ ވެސް ނިސްބަތްވެވަޑައިގަންނަވާ އެ ދާއިރާގެ ރައްޔިތުންނަށް ބޭނުންވާ ކަންކަން ރަނގަޅަށް އެނގިވަޑައިގަންނަވާތީ، ދާއިރާގެ ރައްޔިތުންނަށްޓަކައި މަސައްކަތް ކޮށްދެއްވުމަކީ ވަރަށް ބޮޑު އުފަލަކަށް ވާނެ ކަމުގައި ވެސް މަލްޝާ ވިދާޅުވިއެވެ.
”ދާއިރާގެ ރައްޔިތުންނާއި ހާއްސަކޮށް ޕީއެންސީ މެމްބަރުންނަށް ދޭން ބޭނުންވާ މެސެޖަކީ، ހުޅުމާލެ އުތުރުގެ ތަރައްގީއަށް އެޑްވޮކޭޓް ކުރާނަންކަން، އަދި ދަފްތަރު ރައްޔިތުންނަށް ބޯހިޔާވަހިކަން ފޯރުކޮށްދޭ ވެރިކަން ކުރާ ޕާޓީގެ ދާއިރާގައި މަސައްކަތްކުރާ އިސްމީހެއްގެ ގޮތުގައި ހުރިހާ ފިކުރެއްގެ ރައްޔިތުންނާ ގުޅިގެން ދާއިރާ ކުރިއަރުވަން މަސައްކަތް ކުރާނަންކަން.“ މަލްޝާ ވިދާޅުވިއެވެ.
އިންތިހާބުގެ ކެމްޕެއިން ވަރަށް ފޯރީގައި ކުރިއަށްދާއިރު، ހުޅުމާލެ ފޭސް2ގައި ހަރަކާތްތެރިވާ އެންމެ ބޮޑު ދެ އެންޖީއޯ، ހިޔާ ޔޫނިއަން އަދި ކޮމަނާސް އިން ވަނީ މަލްޝާއަށް ތާއީދުކޮށްފައެވެ. މިއީ، މި ކެމްޕެއިނުގައި މަލްޝާއަށް ލިބުނު ބޮޑު ހިތްވަރަކަށް ވާނެއެވެ.
ޕީއެންސީއަށް އަބަދުވެސް ވަފާތެރި މަލްޝާ މިފަހަރު އެދިވަޑައިގަންނަވަނީ، އެ ޕާޓީގެ މެމްބަރުންގެ ތާއީދާ ލޯތްބަށެވެ. އޭނާ އަށް އިތުބާރުކޮށް ވޯޓު ދީފިނަމަ، މާޔޫސް ވާާން ނުޖެހޭނެ ކަމުގެ ޔަގީންކަން މަލްޝާ ވަނީ ދެއްވައިފައެވެ.
ޕީއެންސީގެ އެތެރޭގެ އިންތިހާބުގައި ވޯޓުލުމުގެ ހައްގު ލިބޭނީ މި މަހު 24 ގެ ކުރިން އެ ޕާޓިގެ ދަފްތަރުގައި ހިމެނޭ ފަރާތްތަކަށް އެކަންޏެވެ.