ރައްޔިތުން ބޭނުންނަމަ މަޖިލިސް މެންބަރުން މަގާމުން ވަކިކުރެވޭނެ ފުރުސަތު އޮންނަން ޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.މަޖިލީހުގެ ރައީސް މިހެން ވިދާޅުވީ ޖުމްހޫރީ ދުވަހާ ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުގަ އެވެ. އަބްދުއްރަހީމް ވިދާޅުވީ ރައީސުލްޖުމްހޫރިއްޔާ މަގާމުން ދުރުކުރެވޭނެ ގޮތް ގާނޫނުއަސާސީން ފަހިކޮށްދީފައިވާއިރު ރައްޔިތުން އިންތިހާބުކުރާ މެންބަރުން މަގާމުން ވަކިކުރެވޭނެ ފުރުސަތު ނެތުމަކީ ޒަމާނަށް ފައިހަމަކުރާ އުސޫލެއް ނޫން ކަމަށެވެ.އަބްދުއްރަހީމް ވިދާޅުވީ ގާނޫނުތަކާއި ސިޔާސަތުތައް އެކުލަވާލުމުގައި ޒަމާނަށް އަންނަ ބަދަލުތަކަށް ރިއާޔަތް ކުރަންޖެހޭ ކަމަށެވެ."އެންމެ މަތީ ވެރިޔާ ބަދަލުކުރުމުގެ ފުރުސަތު އޮވޭ. އޭގެ ދަށަށް އިންތިހާބުކުރާ މީހުން ވަކިކުރެވޭނެ ފުރުސަތު ނެތުމަކީ މި ޒަމާނަށް ފެތޭ ކަމެއް ނޫން،" އަބްދުއްރަހީމް ވިދާޅުވި އެވެ. ޢަބްދުއްރަޙީމް ވިދާޅުވީ މުޅިން އައު މުހިންމު ޤާނޫނުތަކެއް ގެނައުމާއި ޤާނުނުތަކަށް ބޭނުންވާ ބަދަލުތައް ގެނައުމުގެ މުހިންމު މަސައްކަތްތަކެއް 20ވަނަ މަޖިލީހުގެ ދަޢުރުގައި ކުރައްވާނެކަމަށެވެ. އަދި މިހާރުވެސް އޭގެ ވަރަށް ގިނަ މަސައްކަތްތައް ކުރިއަށްދާކަމަށެވެ.ޢަބްދުއްރަޙީމް ވިދާޅުވީ ދަޢުލަތުގެ އާމްދަނީއާއި ގުޅޭ ބަދަލުތައް ގެނައުމަށް ހުށައެޅުމަކީ މެންބަރުންނަށް އޮންނަ ފުރުޞަތަކަށް ނުވާތީ، މާލީ ދާއިރާއާއި ގުޅޭ އިސްލާހުތައް ގެނައުމުގައި ވަގުތު ނަގާނެކަމަށެވެ.މިހާރުގެ މަޖިލީހުގެ އަމާޒަކީ ހަމަހުރެފައި ޤާނޫނުތަކަށް ބަދަލު ގެނައުން ނޫންކަމަށާއި، ދެމެހެއްޓެނިވި ގޮތުގައި ކުރިއަށްދެވޭނެ ބަދަލުތަކެއް ގެނައުންކަމަށް ޕީއެސްއެމްއަށް ދެއްވި ހާއްސަ އިންޓަވިއުގައި ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވި އެވެ.