އެމެރިކާއާ އެކު މިވަގުތު އެއްވެސް މަޝްވަރާއެއް ނުކުރާނެ ކަމަށް އީރާނުން ބުނުމާ އެކު، ޕާކިސްތާނުން އިސްނަގައިގެން ކުރަމުން އަންނަ މަސައްކަތްތަކަށް ހުރަސް އެޅިއްޖެ އެވެ.
އިސްލާމްއާބާދުގައި އެމެރިކާއާ އެކު ބޭއްވުމަށް ރޭވިފައިވާ އާ ބުރުގެ މަޝްވަރާތަކުގައި ބައިވެރިނުވާނެ ކަމުގެ އިޝާރާތެއް އީރާނުން ވަނީ ދީފަ އެވެ. މީގެ ސަބަބުން، ކުރިއަށް އޮތް މަދު ދުވަސްކޮޅެއްގެ ތެރޭގައި މުއްދަތު ހަމަވާ، ނާޒުކު ހާލަތެއްގައި އޮތް ހަނގުރާމަ މެދުކަނޑާލުމުގެ އެއްބަސްވުން އިތުރުކުރުމަށް ކުރަމުންދާ މަސައްކަތްތަކާ މެދު ވަނީ ސުވާލު އުފެދިފަ އެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބާގާއީ ވަނީ، ހަނގުރާމަ މެދުކަނޑާލުމުގެ އެއްބަސްވުމަށް އަމަލުކުރަން ފެށީއްސުރެ ވޮޝިންޓަނުން އެއާ ހިލާފުވަމުންދާ ކަމަށް ތުހުމަތު ކުރައްވާފަ އެވެ. މިގޮތުން، ހޮރްމޫޒް ކަނޑުއޮޅި އެމެރިކާގެ ކަނޑުގެ ސިފައިން ބަންދުކުރުމާއި އީރާނުގެ މުދާ އުފުލާ ބޯޓެއް ހިފެހެއްޓި މައްސަލަ އޭނާ ފާހަގަކުރެއްވި އެވެ. އޭނާ ވިދާޅުވީ މިފަދަ އަމަލުތަކަކީ ބައިނަލްއަގުވާމީ ގާނޫނުތަކާ ހިލާފު ކަންތައްތަކެއް ކަމަށާއި އެމެރިކާގެ ފަރާތުން ކުރިމަތިވާ ކޮންމެ އުދުވާނަކަށް އީރާނުގެ ސިފައިން އެކަށީގެންވާ ރައްދު ދޭނެ ކަމަށެވެ.
"ކުރީގެ ތަޖުރިބާތަކުން އެމެރިކާއަކަށް ފިލާވަޅެއް ނުލިބޭ. މީގެ ސަބަބުން ދުވަހަކުވެސް ރަނގަޅު ނަތީޖާއެއް ނުނިކުންނާނެ،" ބާގާއީ ވިދާޅުވި އެވެ.
އެމެރިކާއިން އެއްބަސްވުމާ ހިލާފުވެފައިވާ ކަމަށް ބުނާ ކަންކަން، މި މައްސަލައިގައި މެދުވެރިއެއްގެ ދައުރު އަދާކުރާ ޕާކިސްތާނަށް މިހާރު އަންގާފައިވާނެ ކަމަށް ވެސް އޭނާ ވިދާޅުވި އެވެ.
މި ނުތަނަވަސްކަން އިތުރުވެފައި މިވަނީ، އެމެރިކާގެ މަންދޫބުން މަޝްވަރާތަކަށް އިސްލާމްއާބާދަށް ދާނެކަން ރައީސް ޑޮނަލްޑް ޓްރަމްޕް އިއުލާނު ކުރެއްވުމާ ގުޅިގެންނެވެ.
ނަމަވެސް، ޓްރަމްޕް ވަނީ މި ނިންމުމާ އެކު އީރާނަށް އާ އިންޒާރުތަކެއް ވެސް ދެއްވާފަ އެވެ. އޭނާ ވިދާޅުވީ އީރާނުން އެއްބަސްވުމަކަށް ނައިސްފި ނަމަ، އެ ގައުމުގެ ހުރިހާ އިންޖީނުގެތަކަކާއި ބްރިޖުތަކެއް އެމެރިކާއިން ސުންނާފަތިކޮށްލާނެ ކަމަށެވެ. އަދި ދެން އޯގާތެރިކަމެއް ނޯންނާނެ ކަމަށް ބުނެ އޭނާ ވަނީ ހަރުކަށި އިންޒާރެއް ދެއްވާފަ އެވެ.
އޮމާން ކަނޑުން ދަތުރުކުރި އީރާނުގެ ދިދަ ޖަހާފައިވާ މުދާ އުފުލާ ބޯޓެއް އެމެރިކާ ސިފައިން ހިފެހެއްޓި ކަމަށް ޓްރަމްޕް ވިދާޅުވުމާ އެކު މަސްލަހަތު ވަނީ އިތުރަށް ގޯސްވެފަ އެވެ. އީރާނުން ވަނީ މިއީ ކަނޑުފޭރުމުގެ އަމަލެއްގެ ގޮތުގައި ސިފަކޮށް، އެކަން ހަރުކަށި އިބާރާތުން ކުށްވެރިކޮށްފަ އެވެ.
ހަނގުރާމަ ހުއްޓާލުމުގެ މުއްދަތު އިތުރުކުރުމާ ގުޅޭ ގޮތުން ގިނަ ދުވަސްތަކަކަށް ދެމިގެންދާ މަޝްވަރާތަކެއް ބޭއްވުމަށް ތައްޔާރުވަމުންދާ ޕާކިސްތާނުން ބުނީ، އަދިވެސް އުންމީދު ކަނޑާނުލާ ކަމަށެވެ. ނަމަވެސް، ފަހުގެ ހާދިސާތަކުގެ ސަބަބުން މަޝްވަރާތަކުގެ ކުރިމަގާ މެދު ޔަގީންކަމެއް ނެތްކަން އެ ގައުމުގެ އޮފިޝަލުން ގަބޫލުކުރެ އެވެ.
އީރާނުގެ ދައުލަތުގެ މީޑިއާއިން ވަނީ މަޝްވަރާތައް ވަރަށް އަވަހަށް ފެށޭނެ ކަމަށް ދެކެވޭ ވާހަކަތައް ދޮގުކޮށްފަ އެވެ. އެ މީޑިއާއިން ބުނި ގޮތުގައި، މަޝްވަރާތަކުގައި ކުރިއެރުމެއް ނުލިބެނީ އެމެރިކާގެ ދަހިވެތިކަމާއި އަމަލާއި ބަހާ ދިމާނުވާތީ އެވެ. އަދި މިހާރު އޮތް ހާލަތުގައި ނަތީޖާ ނެރެވޭނެ ފަދަ މަޝްވަރާއެއް ކުރެވޭނެ އެއްވެސް ފުރުސަތެއް ނެތް ކަމަށް ވެސް ބުނެފައިވެ އެވެ.
ފާޅުގައި މިފަދައިން ބުނި ނަމަވެސް، ދިރާސާކުރާ ފަރާތްތަކުން ގަބޫލުކުރާ ގޮތުގައި އީރާނުން އަދިވެސް ދަނީ ޑިޕްލޮމެޓިކް ދޮރުތައް ހުޅުވާލާފަ އެވެ. ބައެއް މާހިރުން މިކަން ސިފަކުރަނީ ދެ ގޮތަކަށް ގެންގުޅޭ އުކުޅެއްގެ ގޮތުގަ އެވެ. އެއީ ބޭރުފުށުން ހަރުކަށިކަން ދެއްކި ނަމަވެސް، ސިއްރުގެ ތެރެއިން ގުޅުންތައް ދެމެހެއްޓުމެވެ.
އީރާނުގެ ނިއުކްލިއާ ޕްރޮގްރާމާއި ހޮރްމޫޒް ކަނޑުއޮޅީގެ ކޮންޓްރޯލް ފަދަ އަސާސީ މައްސަލަތަކަށް ހައްލެއް ނުލިބި އޮތުމާ އެކު، މަޝްވަރާތައް ކުރިއަށް ދިޔަ ނަމަވެސް، މިވަގުތަށް ނެރެވޭނެ އެންމެ އަވަސް ނަތީޖާއަކީ ހަނގުރާމަ ހުއްޓާލުމުގެ މުއްދަތު ކުޑަ ދުވަސްކޮޅަކަށް އިތުރުކުރުން ކަމަށް އޮފިޝަލުން ލަފާކުރެ އެވެ.