ޔުއެފާ ޗެމްޕިއަންސް ލީގުގެ ދެވަަނަ ބުރުގެ ޕްލޭ އޮފްގައި ސްޕެެއިންގެ ރެއާލް މެޑްރިޑާއި ޕޯޗުގަލްގެ ބެންފީކާ އަނެއްކާވެސް ވާދަކުރަން ޖެހިއްޖެއެވެ. ޕްލޭ އޮފްގައި ރެއާލް މެޑްރިޑާއި ބެންފިކާ ވަނީ ދާދިފަހުން ބައްދަލުކޮށްފައެވެ. އެ މެޗު 4-2 ގެ ނަތީޖާއަކުން ކާމިޔާބުކުރީ ބެންފިކާއެވެ. އެއާއެކު ބެންފިކާއިން ވެސް ޕްލޭއޮފްގެ ޖާގަ ކަށަވަރުކުރިއެވެ. ރެއާލުން ޕްލޭއޮފުގައި ވާދަކުރަންވެސް ޖެހުނީ ބެންފިކާ އަތުން ލިބުނު މި ބައްޔާއެކު އެވެ. އެންމެ ފަހުން މި ދެ ޓީމުގެ ކުރިމަތިލުމުގައި މެޗުގެ އެންމެ ފަހު ސިކުންތުގައި ބެންފީކާގެ ކީޕަރު ވަނީ ރެއާލް މެޑްރިޑް ކޮޅަށް ގޯލެއް ވެސް ޖަހާފައެވެ. ގިނަ ބައެއްގެ ފާޑުކިޔުން ރެއާލަށް އަމާޒުވީވެސް މި ލަނޑާއެކު އެވެ. މީގެއިތުރުން ރޮޑްރިގޯއާއި އަސެންސިއޯއަށް ވަނީ ދެ ރީނދޫ ކާޑާއެކު ރަތްކާޑުވެސް ދައްކާފައެވެ. މި ހިތި ތަޖުރިބާތަކަށް މާ ގިނަ ދުވަސްތަކެއް ނުވަނީސް އަނެއްކާވެސް ބެންފިކާއާ ދެކޮޅަށް ކުޅޭ މި މެޗަކީ އެތަކެއް ގޮތަކުން ހާއްސަވާނެ މެޗެކެވެ. ޔުއެފާ ޗެމްޕިއަންސް ލީގުގެ ޕްލޭއޮފްގައި ވާދަކުރާ އެހެން ޓީމުތަކުގެ ތެރެއިން އެންމެ ފަހުގެ ޗެމްޕިއަން ފްރާންސްގެ ޕީއެސްޖީ އާއި މޮނާކޯ ބައްދަލުކުރާއިރު، އިޓަލީގެ ޔުވެންޓަސް އާއި ދެކޮޅަށް ކުޅޭނީ ތުރުކީގެ ގަލަޓަސަރާއީ އެވެ. އަދި އިންޓަ މިލާނާއި ދެކޮޅަށް ބޯޑޯ/ގްލިމްޓް ނިކުންނައިރު، ނިއުކާސަލް ޔުނައިޓެޑް އާއި ދެކޮޅަށް ކުޅޭނީ ގަރަބަގްއެވެ. ޕްލޭ އޮފްގައި އެތުލެޓިކޯ މެޑްރިޑް އާއި ދެކޮޅަށް ކުޅޭނީ ކްލަބް ބްރޫޖްއެވެ. ހޯމް އެންޑް އަވޭ އުސޫލުން ކުޅޭ ބެންފިކާއާއި ރެއާލް މެޑްރިޑުގެ ކުރިމަތިލުމުގެ ފުރަތަމަ ކުރިމަތިލުން އޮންނާނީ ފެބްރުއަރީ 17 ވަނަ ދުވަހުގައެވެ. އޭގެފަހުން ދެވަނަ ލެގު ކުޅޭނީ ފެބްރުއަރީ 25 ގައެވެ.