ކުރިއަށް އޮތް ދެމަސް ދުވަހުގެތެރޭގައި ކިޑްނީ ޓްރާންސްޕްލާންޓް ކުރުމަށް ދެ މީހުން ފޮނުވުމަށް މަސައްކަތް ކުރަމުންދާ ކަމަށް އާސަންދަ ކުންފުނިން ހާމަކޮށްފިއެވެ.
އާސަންދައިން މިކަން ހާމަކުރީ، މިއަހަރުގެ ޖެނުއަރީ 15 ގައި ޔޫއޭއީއާއެކު ކުރެވުނު އެއްބަސްވުމެއްގެ ދަށުން، ކިޑްނީ ޓްރާންސްޕްލާންޓް ކުރުމަށް ދިވެހީން އެ ޤައުމަށް ގެންދިއުމާ ގުޅޭ މަސައްކަތްތައް ކުރިއަށްދާ ވަގުތެއްގައެވެ. "މިހާރު ވަނީ ކިޑްނީ ބަދަލުކުރަން ޖެހިފައިވާ ދެ މީހަކު ޝޯޓްލިސްޓް ކުރެވިފައި،" އާސަންދައިން ދައުލަތުގެ މީޑިއާއަށް މައުލޫމާތު ދެމުން ބުނެފައިވެއެވެ.
އާސަންދައިން އިތުރަށް ހާމަކުރި ގޮތުގައި، މި އެއްބަސްވުމުގެ ދަށުން އަމަލުކުރާނެ އުސޫލު އެކުލަވާލުމާއި އިދާރީ މަސައްކަތްތައް މިހާރުދަނީ ކުރިއަށެވެ. އަދި މި އުސޫލު އެކުލަވާލާ ނިމުމާއެކު، ކުރިއަށް އޮތް ދެމަހުގެ ތެރޭގައި ޝޯޓްލިސްޓް ކުރެވިފައިވާ ދެ މީހުން ޔޫއޭއީއަށް ފޮނުވޭނެއެވެ.
މި އެއްބަސްވުމަކީ ކިޑްނީ ބަދަލުކުރަން ޖެހޭ ފަރާތްތަކަށް ލިބުނު ވަރަށް ބޮޑު އުއްމީދެކެވެ. ޚާއްސަކޮށް "ފަސްޓް ޑިގްރީ" ނުވަތަ އާއިލާގެ ތެރެއިން މައިންބަފައިންނާއި ދަރިންނާއި އެއްބަނޑު އެއްބަފާ މީހުންގެ ތެރެއިން ކިޑްނީ ކްރޮސްމެޗް ނުވާ ފަރާތްތަކަށް މިއީ އައު އުއްމީދެކެވެ.
ސަރުކާރުން މި އެއްބަސްވުން ޤާއިމުކޮށްފައިވަނީ ކިޑްނީގެ ބަލިތަކަށް ފަރުވާ ހޯދަމުންދާ ދިވެހިންނަށް އިތުރު ލުއިފަސޭހަކަން ހޯދައިދިނުމުގެ މަޤްސަދުގައެވެ. މި އެއްބަސްވުމުގެ ސަބަބުން ކިޑްނީ ބަދަލުކުރުމުގެ ފަރުވާ ހޯދުމަށް ކުރިމަތިވެފައިވާ ގޮންޖެހުންތައް ކުޑަވެގެންދާނެ ކަމަށް އުއްމީދު ކުރެވެއެވެ.