މެޑްރިޑް (ޖެނުއަރީ 17) - ސްޕެނިޝް ކަޕްގެ ގަދަ 16 ބުރުގައި އިތުރު ވަގުތުގެ ދެ ހާފް ކުޅެގެން 5-2 އިން ސެލްޓަ ވިގޯ ބަލިކޮށް ރެއާލް މެޑްރިޑުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.
ރެއާލް ދަނޑުގައި ކުޅުނު ރޭގެ މެޗުގެ ފުރިހަަމަ ވަގުތު ހަމަވިއިރު، ދެ ޓީމު އޮތީ 2-2 އިން އެއްވަރުވެފަ އެވެ. އެކަމަކު، އިތުރު ވަގުތުގެ ދެ ހާފު ކުޅެގެން ރެއާލުން ނަތީޖާ ނެރުނީ އެވެ.
ރޭގެ މެޗުގައި، ފުރަތަަމަ ހާފުގައި ލީޑުނެގީ، ކީލިއަން އެމްބާޕޭ ޖެހި ގޯލުންނެވެ. އަދި ދެ ވަނަ ހާފުގެ ކުރީކޮޅުގައި ވިނީޝިއުސް ޖޫނިއާ ލަނޑު ޖަހައި، ރެއާލްގެ ލީޑުފުޅާކޮށްދިނެވެ. އެކަމަކު، މެޗުގެ ފަހު ކޮޅުގައި ސެލްޓާ އިން ދެ ލަނޑު ޖަހައި މެޗު އެއްވަރުކުރި އެވެ. ސެލްޓާގެ ލަނޑުތައް ޖެހީ، ޖޮނަތަން ބަމްބާ އާއި ޕެނަލްޓީ އަކުން މާކޮސް އަލޮންސޯ އެވެ.
އިތުރު ވަގުތުގެ ދެ ހާފުގެ ތެރޭގައި ރެއާލުގެ ލަނޑުތައް ޖެހީ، އެންޑްރިކް ދެ ގޯލާއި ފެޑެރީކޯ ވަލްވޭޑޭ އެވެ. އަށާރަ އަހަރުގެ އެންޑްރިކް އަންނަނީ ފަހަކަށް އައިސް މި ގޮތަށް ލިބޭ ފުރުސަތުތަކުގައި ތަފާތު ދައްކަމުންނެވެ.
ސްޕެނިޝް ކަޕްގެ އެންމެ ފަަހުގެ ޗެމްޕިއަން، އެތުލެޓިކް ބިލްބާއޯ ވަނީ ރޭގެ މެޗުން 3-2 އިން އޮސަސޫނާ އަތުން ބަލިވެ، މުބާރާތުން ކަޓައިފަ އެވެ. ބާސެލޯނާ އިން ވަނީ 5-1 އިން ރެއާލް ބެޓިސް ބަލިކޮށް ކުއާޓާ ފައިނަލަށް ދަތުރުކޮށްފަ އެެވެ.