ޣައްޒާގައި ހަނގުރާމަ ހުއްޓާލުން ފެށުމަށް ހަމަޖެހިފައި އޮތީ އިއްޔެ ހެނދުނު ރާއްޖެ ގަޑިން 11:30 ގައެވެ. ފަލަސްތީނުގެ އާންމު ރައްޔިތުންނަށް އަމާޒުކޮށް 15 މަސް ދުވަސް ވަންދެން އިސްރާއީލުން ދިން ލާއިންސާނީ ވޭންދެނިވި ހަމަލާތައް ފަލަސްތީނުގެ ރައްޔިތުން އައީ ތަހައްމަލު ކުރަމުންނެވެ. އޭގެތެރޭގައި އަލްޤިދްރާގެ އާއިލާ ވެސް ހިމެނެއެވެ. އެ އާއިލާއިން ވަނީ އެތައް ފަހަރަކު އެ މީހުންގެ ގެދޮރު ދޫކޮށް ވަގުތީ ހިޔާތަކުގައި ދިރިއުޅެފައެވެ. އެ މުއްދަތުގައި އިސްރާއީލުން ޝަހީދުކޮށްލި ފަލަސްތީނުގެ 46،900 އަށް ވުރެ ގިނަ މީހުންގެ ތެރޭގައި އެމީހުންގެ ގާތްތިމާގެ މީހުން ވެސް ހިމެނެއެވެ. ހަމަލާތައް ހުއްޓާލާނެ ކަމަށް އިއުލާނުކުރިއިރު، އަލްޤިދްރާ އާއިލާގެ ބައެއް މީހުން ވެސް ވަނީ ހަމަލާތަކުން ސަލާމަތްވެފައެވެ. އެ މީހުން ބޭނުންވެފައި ތިބީ އަނބުރާ ގެއަށް ދިއުމަށެވެ. އަހުމަދު އަލް ޤިދްރާ އޭނާގެ ހަތް ދަރިން ހިމާރު ގާޑިޔަލަކަށް އަރުވައިގެން އިރުމަތީ ޚާން ޔޫނިސްއަށް މިސްރާބު ޖެހިއެވެ. ނަމަވެސް ހަމާސްއިން ރަހީނުންގެ ލިސްޓު ފޯރުކޮށްނުދޭ ކަމަށްބުނެ ހަނގުރާމަ ހުއްޓާލުން ލަސްކޮށްފައިވާކަން ދަތުރު ފެށިއިރު، އެ އާއިލާއަކަށް ނޭގެއެވެ. އަދި އެ ވަގުތުކޮޅު ވެސް ޣައްޒާއަށް ވައިގެ ހަމަލާތައް ދިނުމަށް އިސްރާއީލުން ތައްޔާރަށް އޮތް ކަމެއް އާއިލާއަކަށް ނޭގެއެވެ. ގޮވުން އަޑުގަދަވިއެވެ. އަހުމަދުގެ އަންހެނުން ހަނާނަށް އެ އަޑު އިވުނެވެ. ހަނާން އޭރު ހުރީ ޣައްޒާގެ މެދުތެރޭގައި ހުންނަ ގާތްތިމާގެ މީހެއްގެ ގެއެއްގައި އެ މީހުންގެ ސާމާނުތައް އެއްކޮށް، ދެތިން ގަޑިއިރު ފަހުން ފިރިމީހާއާއި ދަރިން އަންނާނެ ވަގުތެއްގެ އިންތިޒާރުގައެވެ. "އެ ގޮވުން ހީވީ ހިތުގައި ޖެހި ގޮވިހެން،" ހަނާން ބުންޏެވެ. އަދި އެވަގުތު އޭނާގެ ކުދިންނަށާއި ފިރިމީހާއަށް ކޮންމެ ވެސް ކަމެއް ވެއްޖެކަން އިހުސާސްވި ކަމަށް ހަނާން ބުންޏެވެ. "އަހަރެންގެ ކުދިން، އަހަރެންގެ ކުދިން،" ހަނާން ހަޅޭލަވަން ފެށިއެވެ. ފިރިމީހާއާއި ކުދިން ދަތުރުކުރަމުންދިޔަ ގާޑިޔަލަށް ބޮން ގޮއްވާލީއެވެ. ހަނާންގެ ދޮށީ ދަރިފުޅު އުމުރުން 16 އަހަރުގެ އަދުލީ މަރުވިއެވެ. އެއާއިލާގެ އެންމެ ހަގު ކުއްޖާ ހަ އަހަރުގެ ސަމާ ވެސް މަރުވީއެވެ. އުމުރުން 12 އަހަރުގެ ޔާސްމީން ކިޔައިދިން ގޮތުގައި ހަނގުރާމަ ހުއްޓާލުމުގެ އުފާފާޅުކުރުމުގެ ގޮތުން މީހުން ގޮވައިގެން ދަތުކުރި ކާރެއް ގާޑިޔަލުގެ ކުރިމަތީގައި އޮތެވެ. ފަހަރެއްގައި އެއީ ބޮން އެޅި ސަބަބަކަށް ވެދާނެއެވެ. އަހުމަދު އަލްޤިދްރާގެ އާއިލާ ދަތުރުކުރި ޙިމާރު ގާޑިޔާގެ ކުރިމަތީގައި ދަތުރުކުރަމުންދިޔަ ކާރަށް ހަމަލާ އަމާޒުވެފައި. ފޮޓޯ/އަލް ޖަޒީރާ "އަހަންނަށް ފެނުނީ ސަމާ އާއި އަދްލީ ބިންމައްޗަށް ވެއްޓިފައި ތިއްބައި. ބައްޕަގެ ގައިން ލޭ އޮހޮރި ހޭނެތިފައިވާ ހާލުގައި އޮތީ ގާޑިޔާ ތެރޭގައި." ޔާސްމީން ބުންޏެވެ. އެމީހުން ތިބި ތަނަށް ދެވަނަ ހަމަލާއެއް އައުމުގެ ކުރިން އޭނާގެ އަށް އަހަރުގެ ކޮއްކޮ އަސީލް ދަމައިގަތެވެ. އުމުރުން އެގާރަ އަހަރުގެ މުހައްމަދު ވެސް ވަނީ ސަލާމަތްވެފައެވެ. ނަމަވެސް ހަނާންގެ ފިރިމީހާ އަޙުމަދު ވަނީ ހޮސްޕިޓަލަށް ގެންދިޔަ ފަހުން މަރުވެފައެވެ. "އަހަރެންގެ ކުދިންނަކީ އަހަރެންގެ ދުނިޔެ،" ޚާން ޔޫނިސްގެ ނަސީރު ހޮސްޕިޓަލުގައި އަނިޔާވެފައިވާ އަންހެން ދަރިފުޅު އީމާންގެ ހޮސްޕިޓަލް އެނދުގެ އަރިމަތީގައި އިށީނދެގެން އިން ހަނާން އަދިވެސް އިނީ ޝޮކެއްގައެވެ. ހަނގުރާމަ ހުއްޓާލަން އެއްބަސްވި ނަމަވެސް ތިން ގަޑިއިރަށް ލަސްވި ލަސްވުމުގައި އެމީހުން އާއިލާގެ މެމްބަރުން ޝަހީދުވެގެންދާނެ ކަމެއް އެ އާއިލާއަކަށް ނޭގެއެވެ. އެމީހުން ހިމެނެނީ ހަނގުރާމަ ހުއްޓާލަން މަދު ވަގުތުކޮޅަކަށްވެފައި ވަނިކޮށް އިސްރާއީލުން ދިން ލާއިންސާނީ ހަމަލާތަކުގައި މަރުވި 19 މީހުންގެ ތެރޭގައެވެ. ހަނާން އޭނާގެ ދެ ކުދިންނާއެކު ހޮސްްޕިޓަލްގައި. ފޮޓޯ/އަލް ޖަޒީރާ ހަނާންގެ ލޯ ކަރުނައިން ފުރި ހިތް ފަޅައިގެން ދިޔައެވެ. އޭނާއަށް ދެން ޖެހޭނީ ފިރިމީހާއާއި ދެ ދަރިންނާ ނުލައި ދިރިއުޅުމާ ކުރިމަތިލާށެވެ. "ސަމާ އަކީ އަހަރެންގެ އެންމެ ހަގު ދަރިފުޅު. އަހަރެން އެހެން ކުއްޖަކު ހޯދާ ވާހަކަ ދައްކާ ކޮންމެ ފަހަރަކު ސަމާ ރުޅި އާދޭ." އަދުލީ އަކީ އޭނާގެ "ސަޕޯޓް ތަނބު" އެވެ. އޭނާގެ ދަރިންނަކީ އޭނާގެ ދުނިޔެއެވެ. "އަހަރުމެން މި މުޅި ހަނގުރާމަ ތަހައްމަލު ކުރިން، ބޮން ގޮއްވުމުގެ އެންމެ ނުރައްކާތެރި ހާލަތްތަކާ ކުރިމަތިލާން ޖެހުނު. އަހަރެންގެ ދަރިން ތިބީ ބަނޑުހައިހޫނުކަމާއި. ޒަރޫރީ ބޭނުންތަކުން މަހުރޫމުވެގެން،'' ހަނާން ބުންޏެވެ. އުފާވެރި ދުވަހެއްގެ ނިމުން އަލްޤިދްރާގެ އާއިލާއާ ބައްދަލުކުރީ ހިތާމަވެރިކޮށެވެ.