މިއަދު ހެނދުނު 9:00 އިން ފެށިގެން ހަވީރު 6:00 އާ ދެމެދު ދިރާގު ކަސްޓަމަރުންނަށް ސައުދީއަރަބިއާއަށް ހިލޭ ގުޅޭނެ ކަމަށް ދިރާގުން ބުނެފިއެވެ. އެ ގޮތަށް ހަމަޖައްސާފައި ވަނީ މި ދަތި ދަނޑިވަޅުގައި މައްކާގައި ހައްޖަށް ގޮސްތިބި މީހުންނާ ގުޅޭނެ ގޮތް ހެދުމަށް ކަމަށް ދިރާގުން ބުނެއެވެ. ހުކުރު ދުވަހު ހަވީރު މައްކާއަށް މޫސުމް ގޯސްވެ ހަރަމްފުޅު ތެރެއަށް ބިޔަ ކްރޭނެއް ވެއްޓި ހިނގި ހިތާމަވެރި ހާދިސާގައި މަރުވި މީހުންގެ އަދަދު 107 އަށް އަރައި އެ ހާދިސާގައި ޒަޚަމްވި މީހުންގެ އަދަދު 238 އަރާފައިވާ ކަމަށް ސައުދީ އަރަބިއްޔާގެ ރަސްމީ އިދާރާތަކުން ވަނީ ބުނެފައެވެ. އެހާދިސާގައި ދިވެހި އެއްވެސް ހައްޖުވެރިއަކަށް ގެއްލުމެއް ލިބިފައި ނުވާކަން ރާއްޖޭގެ ކަމާ ގުޅޭ އިދާރާތަކުން ހާމަކޮށްފައިވާ އިރު، ސައުދީގައި ހުންނަ ޕާކިސްތާނުގެ ކޮންސަލް ޖެނެރަލް އަފްތާބް ވިދާޅުވެފައި ވަނީ، ކްރޭން ވެއްޓުނު ހާދިސާގައި ޒަޚަމްވި މީހުންގެ ތެރޭގައި އެގައުމުގެ 15 މީހަކު ހިމެނޭ ކަމަށެވެ. އަދި އެމީހުންނަށް މައްކާގެ ދެ ހޮސްޕިޓަލެއްގައި ފަރުވާ ދެމުން އަންނަ ކަމަށެވެ. އިންޑިއާގެ ކޮންސަލްސް ޖެނެރަލް ބީއެސް މުބާރަކް ވިދާޅުވީ، ޒަހަމްވި މީހުންގެ ތެރޭގައި އެގައުމުގެ 10 މީހުން ހިމެނޭ ކަމަށެވެ. ބަނގުލަދޭޝްގެ ކޮންސަލް ޖެނެރަލް އޭކޭއެމް ޝާހިދުލް ކަރީން ވިދާޅުވީ ޒަޚަމްވި މީހުންގެ ތެރޭގައި އެގައުމުގެ 25 ވަރަކަށް މީހުން ހިމެނޭ ކަމަށެވެ. މި ހިތާމަވެރި ހާދިސާ ހިނގާފައި ވަނީ، މިމަހުގެ 21 ވަނަ ދުވަހު، ހައްޖުގެ މާތް އަޅުކަން އަދާކުރުމަށް ދުނިޔޭގެ އެކި ކަންކޮޅުތަކުން އެތަކެއް ހާސް ހައްޖުވެރީން މައްކާއަށް ޖަމާވަމުން ދަނިކޮށެެވެ. މައްކާގެ އަމީރު އަދި ދެ ހަރަމްފުޅުގެ އިމާމް އަމީރު ޚާލިދު އަލް ފައިސަލް ވަނީ، އެ ހާދިސާގެ ތަހުގީގެއް ހިންގުމަށް ގޮވާލައްވައިފަ އެވެ.