"ދިވެހިރާއްޖޭގެ ރަހުންނާއި ރަނިން" އިނގިރޭސިބަހަށް ތަރުޖަމާކޮށް ނިންމައިފިއެވެ.
ދިވެހި ބަހުގެ އެކެޑަމީގެ ރައީސް އަޝްރަފު އަލީ އޭނާގެ ފޭސްބުކް ޕޯސްޓެއްގައި މިއަދު ވިދާޅުވީ "ދިވެހިރާއްޖޭގެ ރަހުންނާއި ރަނިން" އިނގިރޭސިބަހަށް ތަރުޖަމާކޮށް ނިންމާފައިވާކަމަށާއި އިލްމީ ބުރަ މަސައްކަތް ކުރެއްވި ފޮތުގެ މުސައްނިިފް ނޢޢވ މުހުތަރަމާ ނަސީމާ މުހައްމަދު ކަލޭފާނަށް ހިތުގެ އެންމެ މަތީ އިހުތިރާމާއެކު ތާރީފުދަންނަވައި ޝުކުރު ދަންނަވާ ކަމަށެވެ.
''ވަންއޮންލައިން'' އަށް މައުލޫމާތު ދެއްވަމުން "ދިވެހިރާއްޖޭގެ ރަހުންނާއި ރަނިން" ފޮތް ލިޔުއްވި ނަސީމާ މުހައްމަދު ކަލޭފާނު ވިދާޅުވީ ފޮތް އިގިރޭސި ބަހަށް ތަރުޖަމާކުރުމުގެ މަސައްކަތް ނިމިފައި ވީނަމަވެސް އަދި ބައެއް ކަންކަން ހިމަނަން ޖެހޭ ކަމަށެވެ.
އަދި ފޮތް ޗާޕާ ހަމައަށް ނުދާކަން ފާހަގަކުރައްވައި ނަސީމާ ވިދާޅުވީ އެފޮތް އަޝްރަފް ބައްލަވައި ލެއްވި ކަމަށެވެ. 370 ސޮފްހާގެ މައްޗަށް ލިޔެފައިވާ އެފޮތް ތަރުޖަމާކުރަން ގާތްގަނޑަކަށް ހަތަރު މަސް ދުވަސް ހޭދަކުރެއްވި ކަމަށް ނަސީމާ ވިދާޅުވިއެވެ.
ނިޝާން އިއްޒުއްދީންގެ އިއްޒަތުގެ ވެރިޔާ އަދި ކުރީގެ ފަސްޓްލޭޑީ ނަސީމާ މުހައްމަދަކީ ވަރަށް ގިނަ ގޮތްގޮތުން ފާހަގަކޮށްލެވޭ ތަފާތު ޝަހުސިއްޔަތެކެވެ. އޭނާ ވަނީ ރާއްޖޭގެ ސިއްހީ ދާއިރާއަށާއި ދިވެހި ތާރީހަށް ގިނަ ގުނަ ހިދުމަތްތަކެއް ކުރައްވާފައެވެ.
ނަސީމާ ދިރާސާކުރައްވައިގެން ލިޔުއްވި ފޮތްތަކުގެ ތެރޭގައި އާންމުގެ މެދުގައި އެންމެ މަގުބޫލު އެއްފޮތަކީ ''ދިވެހިރާއްޖޭގެ ރަހުންނާއި ރަނީން'' މިފޮތެވެ. މިފޮތުގައި ރާއްޖޭގައި ރަސްކަން ކުރެއްވި ރަސްރަސްކަލުންނާއި ރަނިރަނިކަނބަލުންގެ ވާހަކަތައް ވަރަށް ތަފްސީލީ ގޮތެއްގައި ނަސީމާ ލިޔުއްވާފައިވެއެވެ.
މިފޮތަކީ ކުރިން ލިޔެވިފައިވާ ލޯމާފާނުތަކާއި ކުރިން ލިޔެވިފައި ހުރި ބައެއް ލިޔުންތަކުން މައުލޫމާތު ނަންގަވައި ވަރަށް ބޮޑު ދިރާސާތަކެއް ކުރައްވައިގެން ނަސީމާ ލިޔުއްވާފައިވާ ފޮތެކެވެ.
އެފޮތަކީ މިހާރު ޔުނިވާސިޓީތަކުގައި ތައުލީމު ހާސިލު ކުރަމުން ގެންދާ ކުދިންގެ އެންމެ މުއުތަބަރު ރިޕަރެންސަކަށް ބޭނުން ކުރަމުން ގެންދާ އެއްފޮތެވެ. މޯލްޑިވްސް ލައިބްރަރީ އެސޯސިއޭޝަނުން ހާމަކުރާ ގޮތުގައި 2019 ވަނަ އަހަރުގެ އެންމެ މަގުބޫލު 50 ފޮތުގެ ތެރޭގައި "ދިވެހިރާއްޖޭގެ ރަހުންނާއި ރަނީން" މިފޮތް ހިމެނެއެވެ.
ނަސީމާގެ ލިޔުއްވުންތައް އެންމެ ފުރަތަމަ ފެންނަން ފެށީ 1970ގެ އަހަރުތަކުގެ ތެރޭގައި ނުކުތް މޫންލައިޓް ނޫހުންނެވެ. އިނގިރޭސި ވާހަކަ، ދިވެހިބަހަށް ތަރުޖަމާ ކުރައްވައިގެންނެވެ. އާންމު ގޮތެއްގައި ތާރީހީ ލިޔުއްވުންތައް ލިޔުއްވަން ފެށްޓެވީ، 1995 ވަނަ އަހަރުއެވެ.
ނަސީމާ މުހައްމަދަކީ ރާއްޖޭގެ ދެވަނަ ޖުމްހޫރިއްޔާގެ ފުރަތަމަ ފަސްޓްލޭޑީއެވެ. ސުމުއްވުލް އަމީރު އިބްރާހީމް ނާސިރު ރަންނަބަނޑޭރި ކިލޭގެފާނު އެކަމަނާއާ ކާވެނި ބައްލަވައިގަތީ 31 މޭ 1969 ގައެވެ.