މާލޭގެ މަގުތަކުގެ ތޮއްޖެހުން ބޮޑުވާތީ ބޮޑެތި ލޮރީ އަދި ޕިކަޕްތަކުގައި ދުވާލު މުދާ އުފުލުން މަނާވާ ގޮތަށް ޓްރާންސްޕޯޓް އޮތޯރިޓީން ހެދި އާ ގަވައިދުގައި ވިޔަފާރި މުދާ އުފުލަން ކަނޑައަޅާފައިވާ ގަޑިތައް ކަމާބެހޭ ފަރާތްތަކާއެކު މަޝްވަރާކުރުމަށްފަހު ބަދަލުކޮށްފި އެވެ.
ކުރިން ރޭގަނޑު 10:00 އިން ހެނދުނު 6:00 އޮތް ގޮތް ބަދަލުކޮށް މުދާ އުފުލަން މިހާރު ކަނޑައަޅާފައިވަނީ ހަވީރު 6:00 އިން ހެނދުނު 6:00 އަށެވެ.
މުދާއުފުލަން ގެނައި ބަދަލާއެކު އެމްޕީއެލުން ވެސް ވަނީ މުދާ ކްލިއާކުރުން ރޭގަނޑަށް ހަދާފަ އެވެ.
އިކޮނޮމިކް މިނިސްޓްރީން މިރޭ ވަނީ ގަޑި އިސްލާހުކޮށް އިއުލާނެއް ނެރެފަ އެވެ. މިރޭ ނެރުނު އިއުލާނުގައިވާ ގޮތުން ވިއްކުމަށާއި ގުދަންކުރުމަށް ގަނޑުކޮށް އުފުލާ މުދަލާއި ލަކުޑި، ދަނގަޑު، ހިލަވެލި، ބިއްލޫރި، ސިމެންތި އަދި ގެ އެޅުމަށް ބޭނުންކުރާ ގަލާއި ފެންކޭސް ފަދަ މުދާ އެއްތަނުން އަނެއްތަނަށް އުފުލޭނީ ހަވީރު ހައެއްގެ ފަހުންނެވެ. ނަމަވެސް ޑެލިވަރީގެ ގޮތު އުފުލާ ކައްކާ ގޭސް ހެނދުނު 8:30 އިން މެންދުރު 11:00 އަށް އުފުލޭނެ އެވެ. އާންމުކޮށް މުދާ އުފުލާ ގަޑީގައި ވެސް ގޭސް އުފުލޭނެ އެވެ.
މިނިސްޓްރީން ވަނީ މުދާ އުފުލުމުގައި މި ގަޑިތަކަށް ފަރުވާތެރިވުމަށް އަންގާފަ އެވެ.
ދުވާލު މުދާ ނުއުފުލޭ ގަވާއިދަށް އަންނަ އާދީއްތަ ދުވަހު އަމަލުކުރަން ފަށާނެ އެވެ.