އަންނަ އަހަރުގެ ޖެނުއަރީން ފެށިގެން ރާއްޖޭގައި މަސައްކަތްކުރާ ބިދޭސީންގެ ވޯކް ވިސާއަށް އެދޭ އެޕްލިކޭޝަން ބަލައިގަންނާނީ ބިދޭސީންނަށް މެޑިކަލް ހެއްދުމަށް ހުއްދަ ދީފައިވާ ކަމާ ބެހޭ ހޮސްޕިޓަލް ނުވަތަ ކްލިނިކަކުން އެންޑޯޒްކޮށް ދޫކޮށްފައިވާ ހަ މަސް ހަމަނުވާ މެޑިކަލް ރިޕޯޓެއް ހުށަހަޅަން ޖެހޭ ގޮތަށް އިމިގްރޭޝަން ޑިޕާޓްމަންޓުން ބުނެފި އެވެ. އެ ޑިޕާޓްމަންޓުން އިއްޔެ ނެރުނު އިއުލާނެއްގައި ވަނީ ޖެނުއަރީ 2016 އިން ފެށިގެން ވޯކް ވިސާ ނޫން އެހެން ހުރިހާ ކެޓަގަރީތަކަކަށް ބިދޭސީންނަށް ވީިޒާއަށް އެދޭ އެޕްލިކޭޝަން ބަލައިގަންނާނީ އެފަދަ މެޑިކަލް ހެއްދުމަށް ހުއްދަ ދެވިފައިވާ ރާއްޖޭގެ ކަމާބެހޭ ހޮސްޕިޓަލް ނުވަތަ ކްލިނިކްއަކުން އެންޑޯޒްކޮށް ދޫކޮށްފައިވާ މެޑިކަލް ރިޕޯޓެއް ހުށަހެޅުމުންނެވެ . މިގޮތުން ހުށަހަޅާ މެޑިކަލްއަކީ، އެ ކެޓަގަރީއެއްގެ ވިސާ މުއްދަތަށް ވެލިޑިޓީ އޮތް މެޑިކަލްއެއް ކަމުގައި ވާންވާނެ ކަމަށް ވެސް އިމިގްރޭޝަނުން ބުންޏެވެ. " ވޯކް ޕާމިޓް މެޑިކަލް " ހެދުމުގައި ކޮންމެހެން ހަދަންޖެހޭ ޓެސްޓްތަކާއި ބަލަން ޖެހޭ ކަންތައްތަކުގެ ތެރޭގައި ތަފާތު ހަތް ކަމެއް ހިމަނާފައިވެ އެވެ. އޭގެ ތެރޭގައި ޓީބީއަށް ޗެސްޓް އެކްރޭ އާއި އެޗްއައިވީ ފަދަ ޓެސްޓްތައް ހިމެނެ އެވެ.