ޔޫކްރެއިންގެ މައްސަލާގައި ޓްރަމްޕް ކަންބޮޑުވާ ކަންކަމަށް ހައްލު ހޯދުމަށް ފަރަންސޭސި ރައީސް އެމެނުއަލް މެކްރޯނާއި އިނގިރޭސި ބޮޑުވަޒީރު ކީރ ސްޓާމާ މި ހަފްތާގައި ވޮޝިންގްޓަނަށް ޒިޔާރަތްކުރާއިރު، ދެ ލީޑަރުން ގެންގުޅުއްވަނީ ތަފާތު ދެ އުކުޅެވެ. ޓްރަމްޕާ ސީދާ މަޝްވަރާކުރުމަށް ޖެހިލުން ނުވާ މެކްރޯން، ވަނީ ރަޝިޔާގެ ރައީސް ލަޑިމިއާ ޕުޓިންގެ ކުރިމަތީގައި ބަލިކަށިނުވުމަށް ޓްރަމްޕަށް އިންޒާރުދެއްވާފަ އެވެ. އަދި ސްޓާމާ ވަނީ އެމެރިކާއާއި ޔޫރަޕްގެ ދެމެދު ފާލަމަކަށް ވުމުގެ ވާހަކަ ދައްކަވާފަ އެވެ.
އެމެރިކާ އިންކާރުކުރާ ކަންކަން ހައްލުކުރުން
ޔޫކްރެއިންގެ މުސްތަގުބަލާ ގުޅޭ މަޝްވަރާތަކުގައި އެ ގައުމުގެ އަޑު އިވެންޖެހޭނެކަމަށް މެކްރޯނާއި ސްޓާމާ ވޮޝިންގްޓަންގައި ޓްރަމްޕް އަރިހު ދަންނަވާނެ އެވެ. އެގޮތުން ޔޫކްރެއިންގެ ސަލާމަތަށް ޔޫރަޕްގެ ސިފައިން ފޮނުވުމާ ގުޅޭ ޕްލޭނަކަށް އެމެރިކާގެ އެހީތެރިކަން ހޯދުމަށް މަސައްކަތްކުރައްވާނެ އެވެ.
ވިޔަފާރި އާއި ޓެރިފްގެ މައްސަލަ
މެކްރޯނާއި ސްޓާމާގެ ދަތުރުފުޅުގައި، އެމެރިކާ އިން އަޅަން އުޅޭ ޓެރިފްތަކުގެ މައްސަލައާމެދުވެސް މަޝްވަރާކުރެވޭނެ އެވެ. ބްރެގްޒިޓާ ގުޅިގެން އިނގިރޭސިވިލާތަށް އަމާޒުވާ ޓެރިފް ކުޑަކުރުމަށް އެ ގައުމުން އުންމީދުކުރެ އެވެ. އަދި އިނގިރޭސިވިލާތުން ޓްރަމްޕަށް އެގައުމަށް ޒިޔާރަތްކުރެއްވުނަށް ރަސްމީ ދައުވަތެއް ދިނުމަށްވެސް ރޭވިފައިވެ އެވެ.
އެމެރިކާގެ ސިޔާސަތަށް އަންނަ ބަދަލުތަކާމެދު ޔޫރަޕް ކަންބޮޑުވުން އިތުރުވެއްޖެ
ޔޫކްރެއިނާއި މެދު އެމެރިކާގެ ސިޔާސަތު ބަދަލުވަމުންދާތީ، ޔޫރަޕްގެ ލީޑަރުން ވަރަށް ބޮޑަށް ކަންބޮޑުވެ އެވެ. ފަރަންސޭސި ރައީސް މެކްރޯން ވަނީ މިދިޔަ ހަފްތާގައި ޔޫރަޕްގެ ލީޑަރުންގެ ކުއްލި ބައްދަލުވުމެއް ބާއްވަވާފަ އެވެ. އަދި ޓްރަމްޕް ވަނީ ވޭތުވެދިޔަ ތިން އަހަރު ތެރޭގައި މެކްރޯނާއި ސްޓާމާ "އެއްވެސް ކަމެއް" ނުކުރައްވާކަމަށް ތުހުމަތުކުރައްވާފަ އެވެ.
ރަޝިޔާގެ ކުރިމަތީގައި ފަސްޖެހުން
ޑިޕްލޮމަސީގެ ދާއިރާގައި ހިތްވަރުގަދަ ލީޑަރެއްގެ ގޮތުގައި ފާހަގަކުރެވޭ މެކްރޯން ވިދާޅުވެފައިވަނީ، އެމެރިކާއާއި ޔޫރަޕްގެ މަސްލަހަތު އެއްގޮތްކަން ޓްރަމްޕަށް ވިދާޅުވެދެއްވާނެކަމަށެވެ. އަދި "ރަޝިޔާއަށް ޔޫކްރެއިން ހިފަން ދޫކޮށްލައިފިނަމަ، އެކަން ހުއްޓުވޭނެ ގޮތެއް ނޯންނާނެ" ކަމަށް އޭނާ ވިދާޅުވެފައިވެ އެވެ.
އިނގިރޭސިވިލާތުން ޔޫކްރެއިން ދެމެހެއްޓުމަށް ގެންގުޅޭ ސިޔާސަތުތައް
ޔޫކްރެއިންގެ ރައީސް ޒެލެންސްކީއަކީ "ޑިކްޓޭޓަރެއް" ކަމަށާއި އެ ހަނގުރާމަ ފެށީ ޔޫކްރެއިންކަމަށް ޓްރަމްޕް ދެއްކެވި ވާހަކަ ސްޓާމާވެސް ވަނީ ދޮގުކޮށްފަ އެވެ. އަދި ޔޫކްރެއިންގެ މިނިވަންކަމާއި ސިޔާދަތު ދެމެހެއްޓުމަށް މަސައްކަތްކުރުމަށް އެމެރިކާގެ ރައީސާ ވާހަކަދައްކަވާނނެކަމަށް ވިދާޅުވެފައިވެ އެވެ.
ދިފާއީ ހަރަދުތައް އިތުރުކޮށް ޔޫރަޕްގެ ހަނގުރާމައިގެ މަސައްކަތް ހަރުދަނާކުރުން
ޔޫރަޕްގެ ދިފާއީ ހަރަދުތައް އިތުރުކުރުމަށް މެކްރޯނާއި ސްޓާމާ ވަނީ އެއްބަސްވެފައެވެ. ފްރާންސްއިން މިހާރު ޖީޑީޕީގެ 2% ދިފާއީ ކަންކަމަށް ހަރަދުކުރެ އެވެ. އަދި "ޔޫރަޕްގެ ހަނގުރާމައިގެ މަސައްކަތްތައް އިތުރުކުރަން ޖެހޭނެ" ކަމަށް މެކްރޯން ވަނީ މިދިޔަ ހަފްތާގައި ވިދާޅުވެފަ އެވެ.
އިނގިރޭސިވިލާތުން 2.3% ދިފާއީ ކަންކަމަށް ހަރަދުކުރާއިރު، އެ އަދަދު 2.5% އަށް އިތުރުކުރާނެކަމަށް ސްޓާމާ ވަނީ ވިދާޅުވެފަ އެވެ. މި ލަނޑުދަނޑި ހާސިލުކުރާނެ ތާރީހެއް އޭނާ ވޮޝިންގްޓަންގެ ދަތުރުގައި އިއުލާންކުރެއްވުން އެކަށީގެންވެ އެވެ.
ގާޒާގެ މައްސަލަ
ފަލަސްތީނުގެ ރައްޔިތުން ގާޒާއިން ބޭރުކޮށް އެ ސަރަހައްދު އެމެރިކާގެ ބާރުގެ ދަށަށް ގެންދިއުމަށް ޓްރަމްޕް ހުށަހަޅާފައިވާ ހުށަހެޅުމާ ދެކޮޅަށް އިނގިރޭސިވިލާތުން ވާހަކަދައްކާނެ އެވެ. އަދި އެމެރިކާގެ އަސްކަރީ ބޭސް އެއް ހުރި ޗާގޯސް ޖަޒީރާތައް މޮރިޝަސްއާ ހަވާލުކުރުމާ ގުޅޭ ގޮތުން އެމެރިކާގެ ކަންބޮޑުވުންތަކަށް ޖަވާބުދާރީވާނެ އެވެ.
ޓްރަމްޕް އިނިގިރޭސިވިލާތަށް ޒިޔާރަތްކުރެއްވުމަށް ދައުވަތުދެއްވާނެ؛ ބަލްމޯރަލް ގަނޑުވަރުގައި މެހެމާންދާރީ
އިނގިރޭސިވިލާތުގެ ބޮޑުވަޒީރު ކީރ ސްޓާމާ އެމެރިކާގެ ކުރީގެ ރައީސް ޑޮނަލްޑް ޓްރަމްޕް އިނގިރޭސިވިލާތަށް ވަޑައިގަތުމަށް ދައުވަތުދެއްވައި، ސްކޮޓްލެންޑްގެ ގަނޑުވަރެއްގައި މެހެމާންދާރީ އަދާކުރުމަށް ރާވާކަމަށް ބައެއް ރިޕޯޓުތައް ބުނެ އެވެ. ޓްރަމްޕް ހުންނަވާނެ ތަނެއްގެ ގޮތުގައި ލޭބާ ސަރުކާރުން ވިސްނަމުންދަނީ ބަލްމޯރަލް ގަނޑުވަރެވެ.