“މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ” ބިލު އިޞްލާހު ކުރެވިދާނެކަމަށާއި، ނަމަވެސް ބިލު އަނބުރާ ގެންދަންޖެހޭކަމަށް ޤަބޫލު ނުކުރައްވާކަމަށް ބަންޑާރަ ނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.
މީޑިއާ ރެގިއުލޭޓް ކުރުމުގެ ނަމުގައި ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު އަބޫބަކުރު ރައްޔިތުންގެ މަޖިލީހަށް ހުށަހެޅި މީޑިއާ ރެގިއުލޭޓްކުރާ ބިލު އަނބުރާ ބިލު އަނބުރާ ގެންދަން ނޫސްވެރިން ގޮވަމުން ދަނިކޮށް ބޭއްވި ޕްރެސް ކޮންފަރެންސްގައި އުޝާމް ވިދާޅުވީ، މީޑިއާ ރެގިއުލޭޓް ކުރުމަށް މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަކީ އެންމެ ރަނގަޅު ގޮތް ކަމަށެވެ.
ރައްޔިތުންގެ މަޖިލިހުގެ މެމްބަރެއްގެ ގޮތުގައި ކުރިން އުޅުއްވި ދުވަސްވަރު އޭރު މިނިވަން މުއައްސަސާތަކާ ބެހޭ ކޮމިޓީން ވެސް ވަނީ މިފަދަ ބިލެއްގެ މަސައްކަތްކޮށް، އެއީ މީޑިއާ ކައުންސިލާއި ބްރޯޑްކޮމާއި އެކަމުގައި އުޅުއްވާ އެކި ފަރާތްތަކާ މަޝްވަރާކޮށް، ބަންޑާރަ ނައިބުގެ އޮފީހަށް ވެސް އެކަން ހިއްސާ ކޮށްފައިވާ އުޝާމް ވިދާޅުވި އެވެެ. އެފަދަ ދިރާސާއެއް ކޮށްފައި ވަނީ މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަނާ މަޝްވަރާކޮށް ހުށަހެޅުންތަކެއް ހުށަހަޅައިގެން ކަމަށް ވިދާޅުވި އެވެ.
“މިހާރު ހުށަހަޅާފައިވާ ބިލާއި ގުޅޭގޮތުން މިހާތަނަށް މި ބިލުގައި ހުރި މާއްދާތައް ދިރާސާކުރިއިރު، އަދި މިހާތަނަށް މިމަސައްކަތާއި ގުޅޭގޮތުން ބަންޑާރަ ނައިބު އޮފީހުގައި ކުރި މަސައްކަތްތަކާއި އަދި އެކިއެކި ފަރާތްތަކުން ހުށަހަޅާފައިވާ ކަންކަމަށް ބަލާއިރު، އަޅުގަނޑުގެ އޮޕީނިއަންއަކީ މިހާރު ހުށަހަޅާފައިވާ އޮތް ބިލް އިތުރަށް ރަނގަޅު ކުރެވިދާނެ ކަމަށް. އަޅުގަނޑެއް ޤަބޫލެއް ނުކުރަން ބިލު ނަގަން ޖެހޭ ކަމަކަށް.” ބަންޑާރަ ނައިބު ވިދާޅުވިއެވެ.
އުޝާމް ވިދާޅުވީ ހަންނާންގެ ފުރަތަމަ ބިލް މިދިޔަ އަހަރުގެ ތެރޭގައި ރައްޔިތުންގެ މަޖިލީހަށް ހުށަހެޅުމުން އިތުރަށް މަޝްވަރާކުރުމަށް ބަންޑާރަ ނައިބްގެ އޮފީހުން ބޭނުންވެގެން ބިލު މަޖިލީހުން ބޭރުކޮށްލީ ކަމަށެވެ. އެކަމަކު އެ ބިލާ ގުޅިގެން މަސައްކަތްތަކެއް ކުރަމުން ދަނިކޮށް އެފަދަ ބިލެއް އަލުން މަޖިލީހަށް ހަންނާން ހުށަހެޅުއްވީ އެ މަސައްކަތް އެއްކޮށް ނުނިމޭނީސްކަމަށް އުޝާމް ވިދާޅުވި އެވެ. އެ ބިލުގެ މާއްދާތައް ދިރާސާކުރަމުން އަންނަ ކަމަށާއި ބިލާ ގުޅިގެން ލިބިފައިވާ ހުށަހެޅުންތަކަށް ބަލާއިރު މި ބިލަކީ އިތުރަށް ދިރާސާ ކޮށްގެން ކުރިއަށް ދެވިދާނެ ބިލެއް ކަމަށް އުޝާމް ވިދާޅުވި އެވެ.
އުޝާމް ފާހަގަކުރެއްވި ގޮތުގައި މީޑިއާގެ އެންމެ ބޮޑު ކަންބޮޑުވުމަކަށް ވަނީ ރައީސް އައްޔަންކުރާ މެމްބަރުންތަކެއް މީޑިއާ ކޮމިޝަނުގައި ހިމެނުމާއި ރައީސް އައްޔަންކުރާ ފަރާތެއް ކޮމިޝަނުގެ ރައީސް ކަމަށް ހޮވުމެވެ. އެކަމާ ގުޅިގެން ރައީސް ވިދާޅުވެފައި ވަނީ އެކަން ކުރަން ބޭނުންފުޅު ނުވާ ކަމަށް އުޝާމް ވިދާޅުވި އެވެ.
އެމްއެމްސީ ޑްރާފްޓް ކުރި ބިލާއި މިހާރު މަޖިލީހުގައި އޮތް ބިލާއި އަޅާކިޔުންވާ ބަންޑާރަ ނައިބު ފުރަތަމަ ނެންގެވި ނުކުތާއަކީ ނޫސްވެރިންގެ އެންމެ ބޮޑު ކަންބޮޑުވުމެއް އޮތް މައްސަލަ ކަމަށްވާ ސަރުކާރު ތަމްސީލްކުރައްވާ މެންބަރުން ކޮމިޝަނުގައި ތިބުމެވެ. ބަންޑާރަ ނައިބު ވިދާޅުވީ، އޭރު އެމްއެމްސީން ހުށަހެޅި ބިލުގައި އަލަށް އެކުލަވާ ލެވޭ ކޮމިޝަނުގައި ރައީސުލްޖުމްހޫރިއްޔާ އައްޔަން ކުރައްވާ 2 މެންބަރުން ތިއްބައްވާނެކަން އޮންނަ ކަމަށެވެ. ނަމަވެސް މިހާރު މަޖިލީހުގައި އޮތް ބިލުގައި އިތުރު ފަށަލައެއް ހިމެނޭހެން މަޖިލީހުން ފާސްކުރާ މެންބަރުންތަކެއް ކޮމިޝަންގައި ތިއްބަވާ ގޮތަށް އޮތްކަން އުޝާމް ފާހަގަކުރެއްވިއެވެ.
އެމްއެމްސީގެ ޑްރާފްޓް ބިލު މައްސަލައަކަށް ނުވެފައި މިހާރު ހުށަހަޅާފައިވާ ބިލުގައި މައްސަލައެއް އޮތް ކަމަށް ދައްކަން ޖެހޭ ސަބަބެއް ސާފު ނުވާ ކަމަށް އުޝާމު ވިދާޅުވި އެވެ.
އުޝާމް ވިދާޅުވީ ނޫސްވެރިންނާ މެދު އަޅާނެ ފިޔަވަޅުތަކާ ގުޅިގެން ކަންބޮޑުވުން ފާޅުކުރަމުން އަންނައިރު އެމްއެމްސީގެ ބިލުގައި ވެސް ބޮޑެތި އަދަދުތަކުން ޖޫރިމަނާ ކުރެވޭނެ ކަމަށް އެބަ އޮތް ކަމަށެވެ.
“ވަރަށް ސާފުކޮށް މިއޮތީ މީޑިއާ ކައުންސިލުން ހުށަހެޅުއްވި ބިލުގައި ތިބޭފުޅުން ހުށަހަޅުއްވާފައި، މީޑިއާތަކާއި ދޭތެރޭ ޖިނާޢި ފިޔަވަޅު އެޅޭގޮތަށް ހުށަހަޅުއްވާފައި. މިހާރު މަޖިލީހުގައި އޮތް ބިލުގައި އެފަދަ ކަމެއް ނެތް. އަޅުގަނޑުގެ ކަންބޮޑުވުމަކީ މިހާތަނަށް މީޑިއާ ކައުންސިލުން ކޮށްފައި ހުރި މަސައްކަތުން ހުށަހަޅާފައި އޮތް ބިލުގައި ވަކި އެކްސްޓްރީމް ކޮންކަމެއްތޯ އޭ އޮތީ. މިހާރު ތިބޭފުޅުން ފަރާތުން މީޑީއާ ކައުންސިލުން ހުށަހަޅާފައި އޮތް ބިލުގައި މައްޗަށް ބިނާކޮށް އޭގައި އެހުރި ބާރުތަކަށާއި ކޮމިޝަނުގެ ބާރުތަކަށް ބިނާކޮށް މިހާރު ހުށަހަޅާ އޮތް ބިލަށް އިސްލާހު ނުގެނެވެންވީ ސަބަބެއް އަޅުގަނޑަކަށް ޤަބޫލެއް ނުކުރެވޭ.” ބަންޑާރަ ނައިބު އުޝާމް ވިދާޅުވިއެވެ.
މި އަހަރުގެ ދެވަނަ ދައުރު ނިންމައި، ޗުއްޓީގައި އޮތް މަޖިލީހުގެ ދައުރުން ބޭރުން އިއްޔެ ބޭއްވި ޖަލްސާގައި ބިލު ބަލައިގަނެ، މިނިވަން މުއައްސަސާތަކުގެ ކޮމިޓީން އައީ ބިލު ދިރާސާ ކުރަމުންނެވެ. އަދި އެ ބިލަށް އާންމުންގެ ހިޔާލު ހޯދުމަށް ވެސް މަޖިލީހުގެ އިދާރާ އިން މިއަދު މެންދުރު ފަހު އިއުލާންކުރި އެވެ.
މި ބިލާ ގުޅިގެން ހުރި ކަންބޮޑުވުންތަކާ ގުޅިގެން އިއްޔެ ރައީސް އޮފީހާއި މުލިއާގޭ ދޮށުގައި ނޫސްވެރިން ވަނީ އިހުތިޖާޖުކޮށްފައެވެ. އަދި އިއްޔެ ހެނދުނު ފެށިގެން “މީޑިއާ ފެންޑާ” ދޮށުގައި ނޫސްވެރިން ވަނީ އިހުތިޖާޖުކޮށްފައެވެ.