ރޯދަ މަހު ގުރުއާން ޚަތިމްކުރުމަކީ ކޮންމެހެން ކުރަންޖެހޭ ކަމެއް ނޫން ކަމަށް ކުރީގެ ރައީސް، މައުމޫން އަބްދުލްގައްޔޫމް ވިދާޅުވެއްޖެ އެވެ.
ރޭ ރާއްޖެޓީވީގެ ޕްރޮގްރާމެއްގައި ވާހަކަފުޅުދައްކަވަމުން މައުމޫން ވިދާޅުވީ ގުރުއާން ހަތިމް ކުރުމަކީ ސުންނަތެއް ނޫން ކަމަށާއި އެއީ އޮންނަ ކަމެއް ވެސް ނޫން ކަމަށެވެ. އެގޮތުން އަންގަވާފައި އޮންނަނީ ގުރުއާނުން ފަސޭހަވި ތަނެއް ކިޔެވުމަށް ކަމަށާއި ކޮންމެހެން ގުރުއާން ފެށުނީއްސުރެ ނިމެންދެން ކިޔެވުމަށް އެއްވެސް ތަނެއްގައި އަންގަވާފައި ނުވާ ކަމަށް މައުމޫން ވިދާޅުވި އެވެ.
"އަޅުގަނޑުމެން އެކަން ކުރަނީ ދެން އެ ގިނައިން ކުރީމަ އޭގެ ބަރަކާތް ހާސިލުވާނެ ކަމަށް ބަލާފައި. އެއީ ހަމަ ވަރަށް ރަނގަޅު ކަމެއް. އެހެން ނަމަވެސް އެއީ ކޮންމެހެން ކުރަން ޖެހޭނެ ކަމެއް ނޫން. ގުރުއާން އެއްކޮޅުން އަނެއް ކޮޅަށް ނިންމުމަކީ ވަކި މުއްދަތެއްގެ ތެރޭގައި ކުރަން ޖެހޭނެ ކަމެއް ނޫން." މައުމޫން ވިދާޅުވި އެވެ.
މައުމޫން ވިދާޅުވީ ގުރުއާން ގިނައިން ކިޔެވި ވަރަކަށް ސަވާބު ލިބޭނެ ކަމަށާއި ގުރުއާން ކިޔަވާއިރު ކިޔަވަން ވާނީ ކިޔަވާ އެއްޗަކާ މެދު ވިސްނައި އޭގެއިން ފައިދާއެއް ކުރާނެ ގޮތަކަށް ކަމަށެވެ. އަސްލު ގުރުއާން ކިޔަވަންވީ ގޮތަކީ ވެސް އެއީ ކަމަށާއި އަވަސް އަރުވާލައިގެން ގުރުއާން ކިޔެވުމުން އޭގެ ސަވާބު ވެސް ނުލިބޭނެ ކަމަށް ވިދާޅުވި އެވެ.
"ތިމާ އަމިއްލަ އަށް ކިޔަވާ އެއްޗެއްގެ މާނަ ތިމާ އަށް އެނގެން ޖެހޭނެ. އޭގެއިން އިބްރަތެއް ހާސިލުކުރަންޖެހޭނެ. އޭގެއިން ފިލާވަޅެއް ލިބިގަންނަންޖެހޭނެ. އެގޮތުގައި ގުރުއާން ކިޔަވަންޖެހޭނީ." މައުމޫން ވިދާޅުވި އެވެ.