ޝަރީއަތުގެ އަޑުއެހުން ސިއްރުކޮށް އަވަސް އަވަހަށް ހުކުމް ކުރުމަކީ ބަލައިގަނެވޭނެ ކަމެއް ނޫން ކަމަށް އިދިކޮޅު އިއްތިހާދުން ބުނެފި އެވެ. ކުރީގެ ނައިބު ރައީސް އަހުމަދު އަދީބާއި ކުރީގެ ޕްރޮސެކިއުޓާ ޖެނެރެލް މުހުތާޒް މުހުސިނާއި އެމްއެންޑީއެފްގެ ސްޓާފް ސާޖަންޓް ހަސަން ރިކާޒާއި ކޯޕްރަލް އަޖުމަދު އާމިރުގެ މައްޗަށް ކްރިމިނަލް ކޯޓުން ރޭ ކުރި ހުކުމާ ގުޅިގެން އިއްތިހާދުން މިއަދު ނެރުނު ބަޔާނެއްގައި ބުނެފައި ވަނީ އެ ހަތަރު ބޭފުޅުންގެ މައްޗަށް އުފުލި ދައުވާތަކުންނާއި އިއްވި ދިގު ޖަލު ހުކުމް ތަކުން ރާއްޖޭގައި ސިޔާސީ ހާލަތު ހީނަރުވަމުން އަންނަކަން ވަރަށް ސާފުކޮށް ހާމަވާ ކަމަށެވެ. ރައީސް ޔާމީން ދަތުރުފުޅު ކުރެއްވި ރިޔާސީ ލޯންޗުކޮޅު "ފިނިފެންމާ"ގައި އައިއީޑީއެއް ގޮއްވާލިކަން ސާބިތުވެ ކުރީގެ ނައިބު ރައީސް އަހުމަދު އަދީބު އަބްދުލް ޣަފޫރު 15 އަހަރަށް އަދި އެމަނިކުފާނުގެ ކުރީގެ ދެ ބޮޑީގާޑުން 10 އަހަރަށް ޖަލަށް ލުމަށް ކްރިމިނަލް ކޯޓުން ރޭ ވަނީ ހުކުމް ކޮށްފަ އެވެ. އަދި ސައްހަ ނޫން ކޯޓު އަމުރެއް ތައްޔާރުކޮށްގެން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ގާނޫނާ ޚިލާފަށް ހައްޔަރުކުރަން އުޅުނުކަން ސާބިތުވެ، ކުރީގެ ޕްރޮސިކިއުޓާ ޖެނެރަލް މުހްތާޒު މުހުސިންގެ މައްޗަށް 17 އަހަރުގެ ޖަލު ހުކުމެއް ރޭ ވަނީ އިއްވައިފަ އެވެ. އިދިކޮޅު އިއްތިހާދުން ބުނީ އެ ހަތަރު ބޭފުޅުންގެ މައްޗަށް ހުކުމް އިއްވާފައި ވަނީ ގާނޫނު އަސާސީގައި ބަޔާންވެގެންވާ ފަދަ އަދުލުވެރި ޝަރީއަތުން މަހުރޫމުކޮށް، އިންސާފުވެރި ޝަރުއީ ނިޒާމުގެ އުސޫލުތަކާ ހިލާފަށް ކަމަށެވެ. "ޝަރީއަތުގައި ދިފާއީ ހެކި ހުށަހެޅުމަށް ފުރުސަތު ނުދިިނުމާއި ވަކީލުންނަށް އެކަށީގެންވާ ވަގުތު ނުދިނުމާއި ޝަރީއަތަށް ހުށަހެޅުނު ތަޙުލީލު ރިޕޯޓުތަކުގައި ކަންބޮޑުވާ އެތައް ކަމެއް ހުރިކަމަށް ދިފާއީ ވަކީލުން ފާހަގަ ކުރި ނަމަވެސް އެއިން އެއްވެސް ކަމަކަށް ބެއްލެވުމެއް ނެތި، ގާނޫނާ ހިލާފަށް ސިއްރުކޮށް އަވަސް އަވަހަށް ހުކުމް ކުރުމަކީ ބަލައިގަނެވޭނެ ކަމެއް ނޫނެވެ." އިދިކޮޅު އިއްތިހާދުގެ ބަޔާނުގައިވެ އެވެ. އިދިކޮޅު އިއްތިހާދުން ބުނީ އެއީ އިސްލާމީ ޝަރީއަތާއި ގާނޫނީ ހަމަތަކާ ކަނޑައެޅިގެން ހިލާފު ކަންކަން ކަމަށެވެ. އިދިކޮޅު އިއްތިހާދުން ބުނީ "ޝަރުއީ ނިޒާމުގެ ދޯދިޔާކަމުން" ބައިނަލްއަގުވާމީ މުޖުތަމައުގައި ދިވެހިރާއްޖެއާ މެދު ދެކޭ ގޮތް ބަދަލުވެ އިންވެސްޓަރުންގެ އިތުބާރު ދަށްވެ ދިވެހިންނަށް ހައްގު ތަރައްގީއަށް ހުރަސްއެޅިފައިވާ ކަމަށެވެ.