އެންމެ ހެޔޮ ޢަމަލުގެ ގޮތުގައި ރަސޫލް ޞައްލަﷲ ޢަލައިވަސައްލަމަ ވަނީ ބައެއް ކަންކަން ޙަދީޘްފުޅު ކުރައްވަވައިފައެވެ. އެއިގެ ތެރެއިން ކޮންމެ ކަމަކީވެސް އެކަމެއް ކުރުމުން އެމީހަކަށް ވަރަށް ގިނަ ޘަވާބް ދެއްވަވާނެ ކަމެކެވެ. ﷲ ތަޢާލާގެ ޙަޟްރަތުގައި އެމީހެއްގެ ޤަދަރު އުފުލިގެންދާނެ ކަމެކެވެ. 
އެންމެ ހެޔޮ ޢަމަލުގެ ގޮތުގައި ރަސޫލް ޞައްލަﷲ ޢަލައިހި ވަސައްލަމަ ޙަދީޘްފުޅުކުރައްވަވާފައިވާ 2 ކަމެއް ފާހަގަކޮށްލާނަމެވެ. 
ރަސޫލާ ޞައްލަ ﷲ ޢަލައިހި ވަސައްލަމް ޙަދީޘު ކުރައްވާފައިވެއެވެ. 
- أنَّ رجلًا سأل رسولَ اللهِ صلى الله عليه وسلم أيُّ الإسلامِ خيرٌ ؟ قال : تطعم الطعامَ، وتقرأ السلامَ، على من عرفتَ ومن لم تعرف 
މާނައީ: ”މީހަކު ރަސޫލާ صلى الله عليه وسلم ގެ އަރިހުން ސުވާލުކުރެއްވިއެވެ. އިސްލާމްދީނުގައި އެންމެ މާތްވެގެންވާ ޢަމަލަކީ ކޮބައިހެއްޔެވެ؟ ޙަދީޘްކުރެއްވިއެވެ. ތިބާ މީސްތަކުންނަށް ކާންދޭށެވެ. އަދި ތިބާ ދަންނަ މީހުންނާއި ތިބާ ނުދަންނަ މީހުންނަށް ސަލާމްކުރާށެވެ.“ 
މިޙަދީޘްފުޅުގައިވާ ފުރަތަމަކަމަކީ މީސްތަކުންނަށް ކާންދިނުމެވެ. ގޭތެރޭގެ ދަތިކަން ހުންނަ ގޮތުން ގެއަށް މީހަކު ގެންގޮސްގެން ކާންދޭން އުނދަގޫވާނަމަ އެމީހާއަށް އެއްފަހަރު ކެވޭނެ މިންވަރަށް ފައިސާ ދިނަސް އެއީ ކާންދިނުމެވެ. މިގޮތުން ރާއްޖޭގެ މިއަދުގެ އަގުތަކަށް ބަލާއިރު 40 ރުފިޔާއަކީ އެކަށީގެންވާ ރަނގަޅު ޢަދަދެކެވެ.  
ދެވަނައަށް ޙަދީޘްފުޅުކުރައްވަވާފައި އެއޮތީ ތިބާ ދަންނަ މީހުންނާއި ތިބާ ނުދަންނަ މީހުންނަށް ސަލާމްކުރުމަށެވެ. މީހަކާއި ބައްދަލުވުމުން "ޢައްސަލާމް ޢަލައިކުމް" ބުނެލިނަމަވެސް އެއޮތީ ސަލާމް ގޮވިފައެވެ. އެންމެ ކޫޑަމިނުން އެވަރުކޮށްލަން މަސައްކަތްކުރާށެވެ. އެއީ ކޮންމެހެން ތިމާ ދަންނަ ނުވަތަ އެކުވެރިއަކަސްވާކަށް ނުޖެހެއެވެ. ކޮންމެ މީހަކާއި ބައްދަލުވިނަމަވެސް އެންމެ ކުޑަމިނުން އެވަރުކޮށްލުމަކީ ބުރަކަމެއް ހެއްޔެވެ؟  
ހިތާމައަކީ އެކަންކޮށްލުންވެސް މިއަދު ގިނަ ބައަކު ކުރަން ބުރަކަމަކަށް ހަދާފައިވާކަމެވެ. ނަތީޖާއެއްގެ ގޮތުން ސަލާމްކުރުމަކީ ބީރައްޓެހިކަމަކަށް ވަމުން އަންނަ ކަމެވެ. އެކަން އިޞްލާޙްކުރުން ކީއްތޯއެވެ.