އަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު 1.4 މިލިއަނަށްވުރެ މަތިވެއްޖެއެވެ.
ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާގޮތުގައި މިމަހުގެ 15 ވަނަ ދުވަހުގެ ނިޔަލަށް ރާއްޖެއަށް 1,421,769 (އެއް މިލިއަން ހަތަރުލައްކަ އެކާވީސްހާސް ހަތްސަތޭކަ ފަސްދޮޅަސް ނުވަ) ފަތުރުވެރިން ޒިޔާރަތް ކޮށްފައިއެވެ. މިއީ ފާއިތުވި އަހަރުގެ އެ މުއްދަތާ އަޅާބަލާއިރު 10.2 އިންސައްތަ އިތުރު އަދަދެކެވެ.
މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވާ ގައުމުތަކަށް ބަލާއިރު ޗައިނާ އިން 207،700 (ދެލައްކަ ހަތްހާސް ހަތްސަތޭކަ) ފަތުރުވެރިން، ރަޝިއާ 154،100 (އެއްލައްކަ ފަންސާސް ހަތަރުހާސް އެއް ސަތޭކަ) ފަތުރުވެރިން، އިނގިރޭސިވިލާތުން 121،900 (އެއްލައްކަ އެކާވީސްހާސް ނުވަސަތޭކަ) ފަތުރުވެރިން، އިޓަލީން 103،700 (އެއްލައްކަ ތިންހާސް ހަތް ސަތޭކަ) ފަތުރުވެރިން އަދި ޖަރުމަނުވިލާތުން ލައްކައަކަށްވުރެ ގިނަ ފަތުރުވެރިން ޒިޔާރަތް ކޮށްފައިވެއެވެ.
މީގެ އިތުރުން އިންޑިއާއިން 85،800 ފަތުރުވެރިން، އެމެރިކާއިން 48،100 ފަތުރުވެރިން، ފަރަންސޭސިވިލާތުން 40،100 ފަތުރުވެރިން، ސްޕެއިނުން 31،800 ފަތުރުވެރިންގެ އިތުރުން ސްވިޓްޒަލޭންޑްން 26،400 ފަތުރުވެރިން މިއަހަރުގެ މިހާތަނަށް ވަނީ ޒިޔާރަތް ކޮށްފައެވެ.
ރާއްޖޭގައި މިހާރު 174 ރިސޯޓެއް އޮޕަރޭޝަނަށް ގެނެސްފައިވާއިރު، 14 ހޮޓަލަކާއި، 881 ގެސްޓް ހައުސްގެ އިތުރުން، 153 ސަފާރީ ދަނީ އޮޕަރޭޓުކުރަމުން ކަމަށް ތަފާސްހިސާބުތަކުން ދައްކައެވެ.
މި އަހަރު ސަރުކާރުުގެ އަމާޒަކީ ރާއްޖެއަށް2 މިލިއަން ފަތުރުވެރިން ގެނައުމެވެ.