އިނގިރޭސި ޕްރިމިއާ ލީގުގެ ކްލަބް މެންޗެސްޓަރ ސިޓީގެ ކުރީގެ ޑިފެންޑަރ ބެންޖަމިން މެންޑީ އަށް މުސާރައިގެ ގޮތުގައި ދޭން ޖެހޭ 14.3 މިލިއަން އެމެރިކާ ޑޮލަރު އޭނާއަށް ދިނުމަށް ކޯޓުން ހުކުމްކޮށްފި އެވެ.
ފްރާންސަށް އުފަން މެންޑީ އަށް މުސާރަ ނުދީ އޭނާއާއިއެކު މެންޗެސްޓަރ ސިޓީ އިން ހަދާފައިވާ އެއްބަސްވުން އުވާލާފައިވަނީ އޭނާއާއި ދެކޮޅަށް ހުށައެޅުނު ތުހުމަތަކާއި ގުޅިގެން 2021 ވަނަ އަހަރުގެ އޮގަސްޓް މަހު އެވެ. ޖިންސީ ގޯނާގެ މައްސަލައެއްގައި މެންޑީ ހައްޔަރުކޮށް އޭނާގެ މައްޗަށް ދައުވާ ކުރުމާއި ގުޅިގެން ސިޓީއިން ވަނީ އޭނާއަށް 2021 ވަނަ އަހަރުގެ ސެޕްޓެމްބަރ މަހުން ފެށިގެން 2023 ވަނަ އަހަރުގެ ޖޫން މަހުގެ ނިޔަލަށް މުސާރަ އާއި އިނާޔަތްތައް ދިނުން ހުއްޓާލާފަ އެވެ.
2017 ވަނަ އަހަރު 52 މިލިއަން ޕައުންޑްގެ ފީއަކަށް ފްރާންސްގެ މޮނާކޯ އިން މެންޗެސްޓަރ ސިޓީ އާއި ގުޅުނު މެންޑީ އަށް މުސާރައިގެ ގޮތުގައި އަހަރަކު 6 މިލިއަން ޕައުންޑް ދޭން ޖެހެއެވެ.
ނަމަވެސް މި މައްސަލަ ފެންމަތިވުމާއިއެކު އޭނާއަށް އެ ކްލަބުގެ ފަރިތަކުރުންތަކުގައި ބައިވެރިވެފައިނުވާތީ ކްލަބުގެ ފަރާތުން އޭނާއަށް އެއްވެސް އިނާޔަތެއް އަދި މުސާރައެއް ދީފައިނުވާކަމަށް އޭނާ ވަނީ ކޯޓަށް މައްސަލަ ހުށައަޅާފަ އެވެ. އަދި ދާދި ފަހުން އޭނާއަށް ދެކޮޅަށް ހުށައެޅުނު ޖިންސީ އަނިޔާގެ މައްސަލައިގައި މެންޑީ ކުށްވެރިނުވާކަމަށް ނިންމާފައިވާއިރު އޭނާއަށް މުސާރަ އާއި އަދި އިނާޔަތުގެ ގޮތުގައި ލިބެންޖެހޭ ފައިސާ ދިނުމަށް ކޯޓުން ވަނީ ހުކުމްކޮށްފަ އެވެ.
މެންޗެސްޓަރ ސިޓީ އިން އެއްބަސްވި ގޮތަށް މުސާރަ ދީފައިނުވާތީ މެންޑީ އެ މައްސަލަ އެމްޕްލޯއިމަންޓް ޓްރައިބިއުނަލް އަށް ހުށައަޅާފައިވަނީ މިދިޔަ އަހަރު އެވެ. އެގޮތުން އޭނާ ހުށައަޅާފައިވަނީ 2021 ވަނަ އަހަރުގެ ސެޕްޓެމްބަރ މަހުން ފެށިގެން 2023 ވަނަ އަހަރުގެ ޖޫން މަހުގެ ނިޔަލަށް އޭނާގެ ކޮންޓްރެކްޓްގެ މުއްދަތު ހަމަވުމާއި ހަމައަށް އެ ކްލަބުން އޭނާއަށް ދޭން ޖެހޭ މުސާރަ އާއި އިނާޔަތްތައް ހޯދުމަށް އެދި އެވެ.
ސިޓީ އާއި ދެކޮޅަށް މި މައްސަލަ ނިމިފައިވާއިރު, އިނގިރޭސި އެފްއޭ އިން ވެސް ދަނީ ސިޓީ އާއި ދެކޮޅަށް ގިނަ މައްސަލަތަކެއް ބަލަމުންނެވެ. އަދި މި ހިނގާ ނޮވެމްބަރ މަހުގެ ފަހު ކޮޅު އެ މައްސަލައިގައި ގޮތެއް ނިންމާނެކަމަށް މީޑިޔާ ރިޕޯޓްތައް ވަނީ ބުނެފަ އެވެ.