ޔަހޫދީ އިސްރާއީލާއި ދުނިޔޭގެ ރަސްކަން ދިފާއު ކުރަން މަސައްކަތް ކުރާ އެމެރިކާ އިސްވެ އޮވެ, އީރާނަށް ދިން ހަމަލާއާ ގުޅިގެން, މެދުއިރުމަތީގައި އުފެދިފައިވާ ހަމަނުޖެހުންތަކާ ގުޅިގެން, މި ދުވަސްވަރު ރާއްޖެ އަންނަ މަހުޖަނުންގެ ޕްރައިވެޓް ޖެޓްތައް އިތުރު ވެފައިވާ ކަމަށާއި މިއީ ރާއްޖޭން މިކަމުގެ ފައިދާ ނަގަންވީ ވަގުތު ކަމަށް އޭވިއޭޝަން ދާއިރާގެ ބައެއް ތަޖުރިބާކާރުން ވިދާޅުވެއްޖެއެވެ. ހޮނިހިރު ދުވަހު ފެށުނު ހަނގުރާމައިގެ ރައްދު ހަމަލާގެ ގޮތުގައި އީރާނުން އަންނަނީ ޔޫއޭއީ އާއި ގަތަރު ހިމެނޭ ގޮތަށް, ދުނިޔޭގެ މައި ވައިގެ ބަނދަރުތައް ހުރި ގައުމުތަކަށް ހަމަލާތައް ދެމުންނެވެ. އޭގެ ނަތީޖާއެއްގެ ގޮތުން އެ ބާރު ބޮޑު އޭވިއޭޝަން ދާއިރާއަށް އެތައް ގޮންޖެހުމެއް ކުރިމަތިވެ, ފްލައިޓްތަކުގެ ދަތުރުތަކަށް ވަނީ ބުރޫ އަރައިފައެވެ. ރާއްޖޭގައި ވެސް އެތައް ހާސް ފަތުރުވެރިން ތާށިވިއެވެ. https://www.sun.mv/218670 މީގެ ގެއްލުން ރާއްޖެއަށް ވެސް ވަރަށް ބޮޑަށް ކުރިމަތިވެފައިވެއެވެ. އެއީ ރާއްޖެއަށް އެންމެ ގިނައިން ފަތުރުވެރިން އަންނަނީ ޔޫއޭއީ އާއި ގަތަރު މަގުން ކަމަށް ވާތީއެވެ. މި ހަނގުރާމައިގެ ސަބަބުން އެ ގައުމުތަކުގެ ވައިގެ ސަރަހައްދު ގިނަ ވަގުތުތަކަކަށް ބަންދު ކޮށްފައިވާތީ ރާއްޖެ އަންނަ ފަތުރުވެރިންގެ އަދަދު 50 ޕަސެންޓް ދަށް ވެފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. ނަމަވެސް އެހެން އެކަން އޮއްވައި ކުއްލިއަކަށް ރާއްޖެ އަންނަ މަހުޖަނުންގެ ޖެޓްތައް މި ވަނީ އިތުރުވާން ފަށައިފައެވެ. "ސަން"އަށް އެނގިފައިވާ ގޮތުގައި މިއަދުގެ މިހާތަނަށް ވެސް, ވެލާނާ އިންޓަނޭޝަނަލް އެއާޕޯޓް (ވީއައިއޭ)އަށް 16 އަށް ވުރެން ގިނަ ޖެޓް އައުމަށް ޝެޑިއުލް ކޮށްފައި އެބަވެއެވެ. މިއީ އާއްމުކޮށް މި ދުވަސްވަރު ރާއްޖެއަށް މިފަދަ ޖެޓްތައް އަންނަ އަދަދަށް ވުރެން ބޮޑަށް އިތުރު އަދަދެއް ކަމަށް އެ ދާއިރާގައި މަސައްކަތް ކުރާ މީހުން ބުނެއެވެ. އާއްމުކޮށް ރާއްޖެއަށް ޖެޓްތައް ގިނައިން އަންނަނީ ކްރިސްމަސް އާއި އާ އަހަރު ފަދަ ބޮޑެތި ބަންދުތަކާ ގުޅިގެންނެވެ. މިކަމާ ގުޅިގެން, އޭވިއޭޝަން ދާއިރާގެ ތަޖުރިބާކާރެއް ކަމަށްވާ, އިނަ މޯލްޑިވްސްގެ ވެރިޔާ މުޙައްމަދު ފިރާގު ވިދާޅުވިގޮތުގައި, މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން، އެ ސަރަހައްދުގައި ބޭނުންކުރާ ގިނަ އަދަދެއްގެ ބިޒްނަސް ޖެޓުތައް އޭޝިއާގެ އެހެން ގައުމުތަކަށް ބަދަލުކުރުމުގެ ފުރުސަތު ބޮޑެވެ. މީގެ ފައިދާ ނެގުމަށްޓަކައި މިއީ ރާއްޖެއިން ސްޓްރެޓެޖިކް ގޮތެއްގައި ބޭނުންހިފަންޖެހޭ ފުރުސަތެއް ކަމަށް އޭނާ ވިދާޅުވިއެވެ. ހަނގުރާމައިގެ ސަބަބުން ނުފުރި ރާއްޖޭގައި ތާށިވި ޓޫރިސްޓުންގެ ހާލު ޓޫރިޒަމް މިނިސްޓަރު ތޯރިގް އިބްރާހީމް ބައްލަވާލައްވަނީ-- ފޮޓޯ: ޓޫރިޒަމް މިނިސްޓްރީ ފިރާގު ވިދާޅުވީ މެދުއިރުމަތީގައި ގިނަ އަދަދެއްގެ ބިޒްނަސް ޖެޓުތައް އޮޕަރޭޓުކުރަމުންދާ ކަމަށެވެ. ނަމަވެސް މިހާރު އެ ސަރަހައްދުގެ ހާލަތު އޮތް ގޮތުން، އެ ބޯޓުތައް އެހެން ސަރަހައްދުތަކަށް ބަދަލުކުރުމަކީ ވަރަށް ގާތް ކަމެއް ކަމަށް އޭނާ ފާހަގަކުރެއްވިއެވެ. އެހެންކަމުން، މި ބަދަލުވުމުގެ ތެރެއިން ރާއްޖެ ފަދަ ގައުމުތަކަށް އާ ފުރުސަތުތަކެއް ހުޅުވޭނެ ކަމަށާއި، މިކަމަށް ތައްޔާރުވެ ތިބުން މުހިންމު ކަމަށް އޭނާ ވިދާޅުވިއެވެ. މި ފުރުސަތުގެ ބޭނުން އެންމެ ފުރިހަމަ ގޮތުގައި ހިފުމަށްޓަކައި ގައުމީ ފެންވަރެއްގައި ފިޔަވަޅުތަކެއް އެޅުމަށް ފިރާގު ވަނީ ކަމާބެހޭ ފަރާތްތަކަށް ގޮވާލައްވާފައެވެ. އޭގެ ތެރޭގައި، ޖެނެރަލް އޭވިއޭޝަން ޕާކިންއަށް ވަގުތީ އިންސެންޓިވްތަކެއް ނުވަތަ ލުއިތަކެއް ތަޢާރަފުކުރުމާއި، ރާއްޖޭގެ މަތިން އުދުހުމަށާއި ޖެއްސުމަށް ނަގަންޖެހޭ ހުއްދަތައް ދޫކުރުމުގެ މަރުހަލާ މިހާރަށްވުރެ ހަލުވިކޮށް ފަސޭހަކުރުން ހިމެނެއެވެ. މީގެ އިތުރުން، ރާއްޖޭގެ ދެކުނުން އައްޑޫ ގަން އިންޓަނޭޝަނަލް އެއާޕޯޓާއި އުތުރުން ހަނިމާދޫ އިންޓަނޭޝަނަލް އެއާޕޯޓަކީ ރައްކާތެރި ޕާކިން ހަބެއްގެ ގޮތުގައި ޕްރޮމޯޓު ކުރުމުގެ މުހިންމުކަން އޭނާ ފާހަގަކުރެއްވިއެވެ. މިކަން ކާމިޔާބުކުރުމަށްޓަކައި އެއާޕޯޓުތަކާއި، އޭވިއޭޝަން ދާއިރާގެ އިދާރާތަކާއި، ސަލާމަތީ ބާރުތަކުގެ މެދުގައި ވަރަށް ވަރުގަދަ ގުޅުމެއް ގާއިމުކުރަންޖެހޭނެ ކަމަށްވެސް ފިރާގު ވިދާޅުވިއެވެ. ފިރާގު ގަބޫލުކުރައްވާ ގޮތުގައި، މިފަދަ ހަރުދަނާ ފިޔަވަޅުތަކެއް ދުރާލާ އެޅިއްޖެނަމަ، ބައިނަލްއަގުވާމީ އޭވިއޭޝަން ދާއިރާގައި ރާއްޖޭގެ ސްޓްރެޓެޖިކް މަގާމު އިތުރަށް ވަރުގަދަވާނެއެވެ. އަދި އޭގެ ސަބަބުން ގައުމީ ފެންވަރުގައި އޭވިއޭޝަން ދާއިރާއިން އާމްދަނީ ހޯދޭނެ އާ މަގުތަކެއް ތަނަވަސްވާނެ ކަމަށްވެސް އޭނާ ވިދާޅުވިއެވެ. ދުނިޔޭގެ މުހިންމު ލޮކޭޝަނެއްގައި އޮތް ރާއްޖެ, ވައިގެ ދަތުރުފަތުގެ ހަބަކަށް ހެދިއްޖެނަމަ އެއީ ގިނަ ފައިދާތަކެއް ގައުމަށް ވާނެ ކަމެކެވެ. ޚާއްސަކޮށް ހަނިމާދޫ އެއާޕޯޓް މިހާރު ވަރަށް ބޮޑަށް ތަރައްގީ ކޮށްފައިވާއިރު އެ ތަން ރަނގަޅަށް ހިންގުމަށްޓަކައި އެފަދަ ނިޒާމެއް ކޮންމެހެން ވެސް މިއޮތީ ބޭނުން ޖެހިފައެވެ.