މި އަހަރުގެ މިހާތަނަށް ދައުލަތަށް ލިބުނު އާމްދަނީ 29 ޕަސެންޓު އިތުރުވެ، ދައުލަތުގެ މާލީ ހާލަތަށް ރަނގަޅު ފެށުމެއް ލިބިފައިވާކަން ފިނޭންސް މިނިސްޓްރީން އާންމުކުރި ތަފާސްހިސާބުތަކުން ދައްކައިފި އެވެ.ފިނޭންސުން އާންމުކުރި ރިޕޯޓުން ދައްކާ ގޮތުގައި ސަރުކާރަށް 7.7 ބިލިއަން ރުފިޔާގެ އާމްދަނީއެއް ލިބުނު އިރު، ލޯނު ހަރަދާއި އިންވެސްޓުމަންޓުތައް ހިމެނޭހެން 6.9 ބިލިއަން ރުފިޔާ ވަނީ ހަރަދުކޮށްފަ އެވެ.ސަރުކާރުން އަހަރު މިހާތަނަށް އެންމެ ބޮޑު ހަރަދެއް ކުރީ ސަރުކާރުގެ ހިންގުމުގެ ހަރަދުތަކަށް (2.8 ބިލިއަން ރުފިޔާ) އެވެ. ދެން އެންމެ ބޮޑު ހަރަދެއް ކުރީ މުސާރަތައް ދިނުމަށް (2.6 ބިލިއަން ރުފިޔާ) އެވެ. ރިކަރަންޓު ހަރަދުގެ ގޮތުގައި ޖުމްލަ 5.4 ބިލިއަން ރުފިޔާ ވަނީ ހަރަދުކޮށްފަ އެވެ.އާމްދަނީގެ ގޮތުގައި އަހަރުގެ މިހާތަނަށް ލިބުނު ފައިސާގެ އަދަދު މިދިޔަ އަހަރުގެ އެ މުއްދަތަށް ވުރެ 1.7 ބިލިއަން ރުފިޔާ އިތުރެވެ. މި އިތުރުވުމުގެ ފަހަތުގައިވާ މައިގަނޑު ސަބަބަކީ ޓެކްސް އާމްދަނީއަށް އައިސްފައިވާ ދޮޅު ބިލިއަން ރުފިޔާގެ އިތުރުވުމެވެ. ޓެކްސްތަކުން 6.4 ބިލިއަން ރުފިޔާ ލިބުނުއިރު، ޓެކްސް ނޫން އާމްދަނީގެ ގޮތުގައި ލިބުނީ 1.2 ބިލިއަން ރުފިޔާ އެވެ.ޓެކްސް އާމްދަނީ އިތުރުވީ މައިގަނޑު ސަބަބަކީ ރެކޯޑު މުގުރަމުން އައި ޓޫރިޒަމާ އެކީ ޓޫރިޒަމާ ގުޅުން ހުރި ޓެކްސްތަކުން ލިބުނު އާމްދަނީ އިތުރުވުމެވެ. ސޮވެރިން ޑިވެލޮޕްމަންޓް ފަންޑަށް (އެސް.ޑީ.އެފް) ޖަމާކުރި އަދަދުވެސް ވަނީ 2.5 އިންސައްތަ އިތުރުވެ، 287.1 މިލިޔަން ރުފިޔާއަށް އަރާފަ އެވެ. ބޭރު ފައިސާގެ އާމްދަނީއަށް ބަލާއިރު، މި މުއްދަތުގައި 222.8 މިލިޔަން އެމެރިކާ ޑޮލަރު ދައުލަތަށް ލިބިފައިވާކަމަށް މާލީ ވުޒާރާގެ ރިޕޯޓުން ދައްކަ އެވެ.މިއީ މި އަހަރު ފެށުނު ފަހުން، މި ރިޕޯޓު އާންމުކުރި ފުރަތަމަ ފަހަރެވެ. ފިނޭންސް މިނިސްޓްރީން ހާމަކުރިގޮތުގައި ކޮންމެ މާލީ އަހަރެއް ފަށައިގަންނައިރު ބައެއްސަބަބުތަކާއި ހެދި މާލީ ހިސާބުތައް ހަމާކުރުމުގައި ލަސްވެއެވެ. ވަކިން ހާއްސަކޮށް، މިއަހަރު ދައުލަތުގެ އެކައުންޓިން ނިޒާމުގެ އޮނިގަނޑަށް ގެނެވުނު ބަދަލުތަކާގުޅިގެން، ކޮންމެ ހަފްތާއަކު ގަވާއިދުން ނެރޭ "ވީކްލީ ފިސްކަލް ޑިވެލޮޕްމަންޓްސް" ރިޕޯޓު ޝާއިއުކުރުން ވަނީ ލަސްވެފަ އެވެ. މި ބަދަލުތަކުގެ ތެރޭގައި ޝަރުއީ ދާއިރާއަށްދެވޭ "ސެކްޓޯރަލް ގްރާންޓް" ނިޒާމު ތައާރަފުކުރުމާއި، ޒަކާތު ފަންޑަށް ހާއްސަ ވަކިލެޖާ އެކައުންޓެއް ގާއިމުކުރުން ހިމެނެ އެވެ.