މިދިޔަ ބުރާސްފަތި ދުވަހުގެރޭ ޑރ. ޖަމީލާއި ސަންދާނު އަހައްމައިދީ ފުލުސް އޮފީހަށް ހާޒިރުކުރުމުން އެސަރަހައްދަށް އެއްވި މީހުންގެ ތެރެއިން ތޭވީސް ޑިސެމްބަރު އިއްތިހާދުގެ ޢަބްދުﷲ މުޙައްމަދު ފުލުހުންނާއެކު – ދިއިސްލާމް ފޮޓޯ : އިބްރާހީމް އަޝްވާޤްގައުމީ ޕާޓީގެ ނައިބް ރައީސް ޑރ. މުޙައްމަދު ޖަމީލް އަޙްމަދާއި އެޕާޓީގެ ކައުންސިލް މެންބަރު އަޙްމަދު އިބްރާހީމް ދީދީ (ސަންދާނު އަހައްމައިދީ) ސަރުކާރާ ބެހޭ ގޮތުން ދައްކާ ވާހަކަތަކަކީ ޙަޤީޤަތެއް ކަމަށް ތޭވީސް ޑިސެމްބަރު އިއްތިހާދުން ބުނެފިއެވެ.ވީޓީވީގެ “ފަސްމަންޒަރު” ޕްރޮގްރާމްގައި ވާހަކަފުޅުދައްކަވަމުން އިއްތިހާތުގެ ސްޕޯކްސްޕާސަން ޢަބްދުﷲ މުޙައްމަދު ރޭ ވިދާޅުވީ ހޯމް މިނިސްޓަރ ޙަސަން އަފީފް ވިދާޅުވާ ގޮތުގައި ފުލުހުން ތަޙްޤީޤްކުރާނީ ހަޤީޤަތާ އެއްގޮތަށް ހުށަހެޅޭ މައްސަލަތައް ކަމަށް ވުމުން، ޑރ. ޖަމީލާއި ސަންދާނު އަހައްމައިދީގެ ވާހަކަތައް ތަޙްޤީޤްކުރާނީ އޭގައި ޙަޤީޤަތެއް ވާތީ ކަމަށެވެ.އިއްޔެ ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަފީފް ވިދާޅުވީ ފުލުހުންނަށް ބެލޭނީ ހަގީގަތާ އެއްގޮތަށް ހުށަހެޅޭ މައްސަލަތައް ކަމަށެވެ. އަދި އިދިކޮޅު ފަރާތްތަކުން ސަރުކާރާ ބެހޭ ގޮތުން ހުށަހެޅި މައްސަލަތަށް ނުބެލި ހުރީ އެ މައްސަލަތަކުގައި ހަގީގަތެއް ނެތުމުން ކަމަށް އަފީފް ވިދާޅުވިއެވެ.ސަރުކާރާ ބެހޭ ގޮތުން ސާބިތު ނުހިފޭ ވާހަކަތައް ދައްކާކަމަށް ބުނެ ރައީސުލްޖުމްހޫރިއްޔާ މުޙައްމަދު ނަޝީދު އަންގަވައިގެން، ޑރ. ޖަމީލާއި ސަންދާނު އަހައްމައިދީ އެކިފަހަރު މަތިން ފުލުސް އޮފީހަށް ހާޒިރުކޮށް، ފުލުހުން ވަނީ އެދެބޭފުޅުން ހައްޔަރުކޮށް ދޫނިދޫ އަށްވެސް ގެންގޮސްފައެވެ. ސަންދާނު އަހައްމައިދީ މިދިޔަ ބުރާސްފަތި ދުވަހުގެ ރޭ ހައްޔަރުކުރުމަށްފަހު، ހުކުރު ދުވަހުގެރޭ ވަނީ ދޫކޮށްލާފައެވެ. އަދި ޑރ. ޖަމީލް ރޭ ހައްޔަރުކުރުމަށްފަހު ދޫކޮށްލާފައިވަނީ ޖަމީލް ހައްޔަރުކުރީ ޤާނޫނާ ޚިލާފަށް ކަމަށް ކަނޑައަޅައި އޭނާ ދޫކޮށްލުމަށް ކްރިމިނަލް ކޯޓުން އަމުރުކުރުމުންނެވެ.ގައުމީ ޕާޓީން ވަނީ ރާއްޖެއާ ގުޅޭގޮތުން ރައީސް ނަޝީދު ބޭރުގެ މީޑިއާތަކުގައި އިތުރުފުޅުހައްދަވައި ވާހަކަފުޅުދައްކަވާ ކަމަށް ބުނާ މައްސަލައާއި، ރައީސް އޮފީހުގެ ޕްރެސް ސެކްރެޓަރީ މުހައްމަދު ޒުހައިރު މީޑިއާއަށް އިންޒާރު ދެއްވައި ބިރުދައްކަވާ މައްސަލަ ފުލުސް އޮފީހަށް ހުށަހަޅާފައެވެ. އަދި އުމަރު ނަސީރު ވަނީ މަސްތުވާތަކެތި ބޭނުންކުރުމަށް ހިތްވަރުލިބޭ ގޮތަށް ރައީސް ނަޝީދު ވާހަކަފުޅުދައްކަވާ ކަމަށް ބުނާ މައްސަލައެއް ވެސް ހުށަހަޅާފައެވެ.