"ހަވީރު" ނޫހުގެ 35 ވަނަ އަހަރީ ދުވަހުގެ ހަފުލާ މިރޭ ދަރުބާރުގޭގައި ބާއްވާ ގޮތަށް ހަމަޖައްސައިފި އެވެ. މިރޭ 9:00 ގައި ދަރުބާރުގޭގެ ރަންނަބަނޑޭރި މާލަމުގައި ބާއްވާ މި ހަފުލާގައި، "ހަވީރަ"ށް އެކި ގޮތްގޮތުން ހިދުމަތް ކުރެއްވި 88 ބޭފުޅަކަށް ހަނދާނީ ލިޔުން ދޭ ގޮތަށް ވަނީ ހަމަޖައްސައިފަ އެވެ. ވީޓީވީން ލައިވް ކުރާ މި ހަފުލާ ޝަރަފުވެރި ކޮށްދެއްވާނީ ނައިބު ރައީސް މުހައްމަދު ޖަމީލް އަހުމަދެވެ. "ހަވީރު"ގެ އެޑިޓަރު މޫސާ ލަތީފު ވިދާޅުވި ގޮތުގައި މި ހަފުލާގައި، ރާއްޖޭގެ އެންމެ ގިނަ ދުވަސްވީ ނޫހުގެ މާޒީއާ ބެހޭ ބައެއް މައުލޫމާތުތައް އެނގިގެންދާނެ އެވެ. "ހަވީރު"ގެ ނިއުސްރޫމްގެ މުވައްޒަފުން.---ހަވީރު ފޮޓޯ: ނަސްރުﷲ ސޯލިހް "ހަވީރަކީ ގިނަ ދުވަސްވީ މާޒީއެއް އޮތް ނޫހެއް. އެހެންވީމާ ކުރީގެ ބައެއް ހަނދާންތައް މިރޭގެ ހަފުލާގައި އެނގިގެންދާނެ. މީގެ އިތުރުން ހަވީރުގައި މިހާތަނަށް މަސައްކަތް ކުރެއްވި ބޭފުޅުންގެ ތެރެއިން، އަޅުގަނޑުމެންގެ ޓީމަކު ހޮވި ބޭފުންނަށް އިނާމު ދިނުން އޮންނާނެ. މިދިޔަ 35 އަހަރު ހަވީރަށް އެކި ގޮތްގޮތުން ހިދުމަތް ކުރެއްވި ބޭފުޅުންތަކެއް އެބަތިއްބެވި. އޭގެ ތެރެއިން ބައެއް ބޭފުޅުން ވަނީ ހަވީރުން ވަކިވެވަޑައިގެންފައި. އެ ބޭފުޅުންގެ އަގު ވަޒަން ކުރުން ވެސް މިރޭ އޮންނާނެ،" މޫސަ ވިދާޅުވި އެވެ.