އުރީދޫ ދިވެހި ޕްރިމިއާ ލީގުގެ ފަހު މެޗުގައި މިރޭ، އެކަކު މަދުކޮށް ކުޅެ ޓީސީ ސްޕޯޓްސްއާ ނިއު ރޭޑިއަންޓުން 1-1 އިން އެއްވަރުކުރިއިރު، މެޗަށް ފަހު ޗެމްޕިއަން ނިއު އިން ލީގުގެ އައްޑަނަ އުފުލާލައިފި އެވެ. ނިއު އިން ވަނީ މިދިޔަ ހޮނިހިރު ދުވަހުގެރޭ މާޒިޔާ އަތުން 3-1 އިން މޮޅުވެ ލީގު ޗެމްޕިއަންކަން ކަށަވަރުކޮށްފަ އެވެ. ނިއު ލީގު ނިންމާލީ 33 ޕޮއިންޓާ އެކު އެވެ. ޓީސީ ދެ ވަނަ ހޯދީ 29 ޕޮއިންޓާ އެކު އެވެ. ސައުވީސް ޕޮއިންޓާ އެކު ކްލަބް އީގަލްސް ތިން ވަނަ ހޯދިއިރު ހަތަރު ވަނަ ހޯދީ 21 ޕޮއިންޓާ އެކު މާޒިޔާ އެވެ. މިރޭގެ މެޗު ފަށައިގެން ހަތް ވަނަ މިނެޓުގައި ޓީސީގެ އިބްރާހިމް ރިޒްވާން (ބަގޭ) ވަނީ އެ ޓީމަށް ލީޑު ނަގައިދީފަ އެވެ. ނިއު އަށް އިތުރު މައްސަލަތަކެއް ކުރިމަތިވީ 16 ވަަނަ މިނެޓުގައި ކެޕްޓަން އަސްހަދު އަލީ (އަޑުބަރޭ) އަށް ރަތްކާޑު ދެއްކުމުންނެވެ. އޭނާ އަށް ރަތްކާޑު ދެއްކީ ޓީސީގެ ގޯލްކީޕަރު މުހައްމަދު އިމްރާނަށް، ކުރި ނުރައްކާތެރި ފައުލަކާ ގުޅިގެންނެވެ. އެކަކު މަދުވި ނަމަވެސް، ނިއު އިން ވަނީ މެޗުގެ ކޮންޓްރޯލް ނަގައިފަ އެވެ. އެ ޓީމަށް 43 ވަނަ މިނެޓުގައި ނަތީޖާ ހަމަހަމަކުރަން ރަނގަޅު ފުރުސަތެއް ލިބުނެވެ. ރިލްވާން ވަހީދު (ރިލޭ) ނެގި ހުރަސް ގޯލްކުރިމަތީ ހުހަށް ހުރި އަލީ ފާސިރު (ސެންޓޭ) ފޮނުވާލުމުން، ޓީސީގެ ކީޕަރު އިމްރާން އެ ބޯޅަ މަތަކުރި އެވެ. ނިއުގެ ލިލީ (ކ) ލަނޑު ޖެހުމަށް ފަހު އުފާފާޅުކުރަނީ. --ހަވީރު ފޮޓޯ: މުހައްމަދު ޝަރުހާން ނިއު އަށް އެއްވަރުކޮށްދިނީ 51 ވަނަ މިނެޓުގައި އަހުމަދު އަބްދުﷲ (ލިލީ) އެވެ. އޭރިއާ ބޭރުން ރިލޭ ނެގި ހުރަސް ގޯލް ތެރެއަށް ލިލީ ވައްދާލީ ގޯލް ކުރިމަތީ ހުހަށް ހުރެ އެވެ. އޭގެ ފަހުން ސެންޓޭ އަށް ލީޑު ނަގަން ރަނުގެ ފުރުސަތެއް ލިބުނެވެ. އޭނާ އޭރިއާ ތެރެއަށް އެކަނިމާއެކަނި ވަދެ، ބޭނުން ގޮތަކަށް ޖަހަން ލިބުނު އިރު އޭނާ ފޮނުވާލި ބޯޅަ ދިޔައީ ގޯލް މަތިންނެވެ. ލީގުގެ މޮޅު ކުޅުންތެރިޔާގެ މަގާމް ހޯދީ ޓީސީގެ ޒުވާން ފޯވާޑް ނާއިޒް ހަސަން އެވެ. މިރޭގެ މެޗުގެ މޮޅު ކުޅުންތެރިޔާގެ މަގާމް ހޯދީ ނިއުގެ ހަމްޒާ މުހައްމަދު (ހަމްޕު) އެވެ. މިއީ ނިއު ލީގު ކާމިޔާބުކުރި ފަސް ވަނަ ފަހަރެވެ. އެންމެ ފުރަތަމަ ލީގު 2006 ވަނަ އަހަރު ކާމިޔާބުކުރިއިރު އޭގެ ފަހުން 2012 އިން ފެށިގެން މި އަހަރާ ހަމަޔަށް ނިއު ލީގު ކާމިޔާބުކުރީ އެވެ. ލީގުގެ ޓްރޮފީއާ އެކު ނިއު އަށް އިނާމް ފައިސާގެ ގޮތުގައި 1 މިލިއަން ރުފިޔާ ލިބޭނެ އެވެ. ކުރިން ލީގުގެ ޗެމްޕިއަން ޓީމަށް ދެނީ 100،000ރ. އެވެ.