ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މާމެންފުށި ކުންފުންޏަށް ދޫކޮށްފައިވާ މާނެންފުށީގެ އެއްބަސްވުން ސަރުކާރުން ބާތިލްކުރުން ފަސްކުރުމުގެ އަމުރު ނުދޭން ސިވިލް ކޯޓުން ނިންމި ނިންމުން ހައި ކޯޓުން ބާތިލްކުރި މައްސަލަ ދައުލަތުން ސުޕްރީމް ކޯޓުގައި އިސްތިއުނާފްކޮށްފި އެވެ. ގާސިމްގެ މާނެންފުށި ކުންފުންޏަށް ރިސޯޓް ހަދަން ދޫކުރި މާނެންފުށީގެ އެއްބަސްވުން މިދިޔަ ފެބްރުއަރީ މަހު ސަރުކާރުން ބާތިލްކުރި މައްސަލަ މާނެންފުށި ކުންފުނިން ކޯޓަށް ހުށަހެޅުމުން ސިވިލް ކޯޓުން ނިންމީ ސަރުކާރުން އެގޮތަށް އަމަލްކުރުން ފަސްކުރުމުގެ އަމުރު ދެވެން ނެތް ކަމަށެވެ. ސިވިލް ކޯޓުގެ އެ ނިންމުން މާނެންފުށީގެ ފަރާތުން އިސްތިއުނާފް ކުރުމުން މިދިޔަ ޖޫން މަހު ހައި ކޯޓުން އެންގީ އެ ކުންފުނިން އަލުން އެފަދަ ވަގުތީ އަމުރަކަށް ސިވިލް ކޯޓުގައި އެދިއްޖެ ނަމަ އެ އަމުރާ މެދު ކޯޓުން އަލުން ގޮތެއް ނިންމުމަށެވެ. ހައި ކޯޓުގެ އެ ނިންމުން ދައުލަތުން ސުޕްރީމް ކޯޓުގައި އިސްތިއުނާފް ކުރުމުން އެ މައްސަލަ އެ ކޯޓުން ބަލައިގަތުމާ މެދު އަދި ގޮތެއް ނުނިންމަ އެވެ. މާނެންފުށީގެ އިތުރުން ގާސިމްގެ ވިލާ ކުންފުންޏާއި އޭނާގެ މަސްލަހަތު އޮންނަ އެހެން ބައެއް ކުންފުނިތަކަށް ސަރުކާރުން ދޫކޮށްފައިވާ ރަށްތަކާއި ފަޅުތަކުގެ އެއްބަސްވުން ވެސް ސަރުކާރުން ވަނީ ބާތިލްކޮށްފަ އެވެ. އެ މައްސަލަތައް ވެސް ކޯޓުތަކުގެ އެކި މަރުހަލާތަކުގައި ދަނީ ހިނގަމުންނެވެ. މީގެ އިތުރުން އެ ފަޅުތަކާއި ރަށްތަކުގެ ކުއްޔާއި ޖޫރިމަނާގެ ގޮތުގައި 90 މިލިއަނަށް ވުރެ ގިނަ ޑޮލަރު ދައްކަން ސަރުކާރުން ވަނީ އަންގާފަ އެވެ. އެކަމާ ދެކޮޅަށް ވެސް ގާސިމްގެ ކުންފުނިތަކުން ކޯޓަށް ވަނީ މައްސަލަތައް ހުށަހަޅައިފަ އެވެ.