މިއަހަރުގެ ފިތުރު ޢީދު ދުވަހަށް ވާނީ އަންނަ ހުކުރު ދުވަސް ކަމަށް މޯލްޑިވްސް ރިފޯމް މޫވްމަންޓުގެ ޒައީމް، އަދި ރާއްޖޭގެ ވެރިކަން އެންމެ ގިނަ ދުވަހު ކުރެއްވި، ފަލަކީ އިލްމުވެރިޔާ އަލްއުސްތާޛް މައުމޫން އަބްދުލްޤައްޔޫމް ވިދާޅުވެއްޖެއެވެ.
ރައީސް މައުމޫން މިފަދައިން ވިދާޅުވީ، އިތުބާރު ހުރި ފަލަކީ ހިސާބަށް ރިއާޔަތްކޮށެވެ.
އިތުރުބާރު ހިފޭ ފަލަކީ ހިސާބުތަކަށް ރިއާޔަތްކޮށް ކަލަންޑަރުގައިވާ ގޮތުން ވެސް، މިއަހަރުގެ ރަމަޟާންމަހުގެ ފަހު ދުވަހަކީ 20 އޭޕްރީލް 2023ވާ ބުރާސްފަތި ދުވަހެވެ. ފިތުރު އީދު ދުވަހަކީ 21 އޭޕްރީލް 2023ވާ ހުކުރު ދުވަހެވެ.
މިއާ ޚިލާފަށް އަންނަ ބުރާސްފަތި ދުވަހު ޝައްވާލް މަހުގެ ހަނދު ފެނުމުގެ ފުރުސަތެއް ނެތްކަމަށާއި އެހެންކަމުން ފިތުރު އީދު ދުވަހަކީ އަންނަ ހޮނިހިރު ދުވަހަށް ވެދާނެ ކަމަށް އިންޓަނޭޝަނަލް އެސްޓްރޮނޮމިކަލް ސެންޓަރު (އައިއޭސީ) އިން ވަނީ ބުނެފައެވެ.
އައިއޭސީގެ އިދާރާއިން ބުނީ އެ އިދާރާއިން އަންދާޒާކުރަނީ ފަލަކީ ހިސާބުތަކުގެ މައްޗަށް ބިނާކޮށް ކަމަށެވެ. އަދި ފިތުރު އީދުގެ ފުރަތަމަ ދުވަހަކީ ކޮން ދުވަހެއްކަން، ކަމާ ބެހޭ އިދާރާތަކުން ކަށަވަރުކުރާނީ ޝައްވާލު މަހުގެ ހަނދު ފެނުމުން ކަމަށްވެސް ބުނެފައި ވެއެވެ.
އަންނަ ބުރާސްފަތި ދުވަހު އަރަބި އަދި އިސްލާމީ ދުނިޔޭގެ އެއްވެސް ތަނަކަށް ހަމަލޮލަށް ހަނދު ފެނުމަކީ ނާދިރުކަމެއް ކަމަށާއި އަރަބި ގިނަ ގައުމުތަކަށް ޓެލެސްކޯޕަކުން ބަލައިގެންވެސް ހަނދު ފެނުމުގެ ފުރުސަތު ކުޑަކަމަށް އެއިދާރާއިިން ވަނީ ބުނެފައެވެ.
ނަމަވެސް އިސްލާމީ ބައެއް ގައުމަކަށް ޓެލެސްކޯޕަކުން ހަނދު ފެނުމުގެ ފުރުސަތު އޮތުމުން، އިސްލާމީ ގިނަ ގައުމުތަކުން ހުކުރު ދުވަހު ޝައްވާލް މަސް ފެށޭކަން އިއުލާނު ކުރާނެކަމަށް ވެސް އައިއޭސީން ބުނެފައިވެއެވެ.
ހުކުރު ދުވަހަކީ ފިތުރު ޢީދު ދުވަސްކަމަށް ރައީސް މައުމޫން ބުނެފައި މިވަނީ، އައިއޭސީއާ ހަވާލާދީ ރާއްޖޭގެ ބައެއް މީޑިއާތަކުން ފިތުރު ޢީދު ދުވަހަކީ ހޮނިހިރު ދުވަސްކަމަށް ބުނަމުންދިއުމާ ގުޅިގެން، މިކަމާމެދު އާންމުން ބަހުސްކުރަމުންދާ ދަނޑިވަޅެއްގައެވެ.